କୋରାପୁଟ : ସାଧାରଣ ନିର୍ବାଚନ ପ୍ରକ୍ରିୟା ଆରମ୍ଭ ହେବା ପରଠାରୁ କୋରାପୁଟର ଲାଣ୍ଡିଗୁଡା ସ୍ଥିତ ସରକାରୀ ମହାବିଦ୍ୟାଳୟର କଳା ଓ ବାଣିଜ୍ୟ ବିଭାଗର ଶ୍ରେଣୀଗୃହ ଓ ଗ୍ୟାଲେରୀ ଗୁଡିକୁ ଜିଲ୍ଲାପ୍ରଶାସନ ଦ୍ବାରା ଷ୍ଟ୍ରଙ୍ଗରୁମ ଏବଂ ପରବର୍ତ୍ତୀ ପର୍ଯ୍ୟାୟରେ ଇଭିଏମ ବିତରଣ ଓ ଗ୍ରହଣ କେନ୍ଦ୍ର ଭାବେ ବ୍ୟବହାର କରାଯାଇଥିଲା । ହେଲେ ବର୍ତ୍ତମାନ ବି ଏହା କିଛି କାମରେ ଲାଗି ପାରୁନି । ମହାବିଦ୍ୟାଳୟକୁ ହସ୍ତାନ୍ତର କରୁନି ପ୍ରଶାସନ ।
ବ୍ୟାପକ ଭାବେ ପରିବର୍ତ୍ତନ ହୋଇଥିବା ଅବସ୍ଥାରୁ ମୁକୁଳିଯାଇ ଶ୍ରେଣୀଗୃହକୁ କାର୍ଯ୍ୟକ୍ଷମ କରିବା ପାଇଁ ଆବଶ୍ୟକୀୟ ଅର୍ଥ ମହାବିଦ୍ୟାଳୟ ପାଖରେ ନାହିଁ ବୋଲି ମହାବିଦ୍ୟାଳୟର ଭାରପ୍ରାପ୍ତ ଅଧ୍ୟକ୍ଷ ଦୀପକ ପଟ୍ଟନାୟକ ଜଣାଇଛନ୍ତି ।
ଷ୍ଟ୍ରଙ୍ଗରୁମ ପାଇଁ କେମିତି ବଦଳା ଗଲା ମହାବିଦ୍ୟାଳୟ ରୂପ ...
ଷ୍ଟ୍ରଙ୍ଗରୁମ ପାଇଁ ପ୍ରଥମେ ଶ୍ରେଣୀଗୃହ ଗୁଡିକର ଝରକା ଉପାଡି ଦେଇ ସେହିସ୍ଥାନରେ ସିମେଣ୍ଟ ଓ ଇଟା ଭର୍ତ୍ତି କରି ସମ୍ପୂର୍ଣ୍ଣ ରୂପେ ବନ୍ଦ କରିଦିଆଗଲା । ଅନ୍ୟାନ୍ୟ କୋଠରୀରେ ଥିବା କାଠ ଓ ଲୁହା ବେଞ୍ଚ ଗୁଡିକୁ କାଢ଼ିଦେଇ ମୁକ୍ତ ଆକାଶ ତଳେ ଏକପ୍ରକାର ଫିଙ୍ଗି ଦିଆଗଲା । ତେବେ ଭୋଟ ଗଣତି କାର୍ଯ୍ୟକ୍ରମ ସରିବାର ମାସେ ବିତିଗଲେ ବି ପ୍ରଶାସନର ଦେଖାନାହିଁ ।
ଖରା ଛୁଟି ସାରି ମହାବିଦ୍ୟାଳୟର ଛାତ୍ରଛାତ୍ରୀ ଫେରିଲେଣି । କିନ୍ତୁ ଜିଲ୍ଲା ପ୍ରଶାସନ ଏ ପର୍ଯ୍ୟନ୍ତ କୋଠରି ଗୁଡିକୁ ମହା ଵିଦ୍ୟାଳୟ କର୍ତ୍ତୃପକ୍ଷଙ୍କୁ ଫେରାଇଦେବାର ନାଁଗନ୍ଧ ନେଉନଥିବା ଚିନ୍ତାର ବିଷୟ ହୋଇପଡିଛି ।
କୋରାପୁଟରୁ ସିଏଚ ଶାନ୍ତାକାର ,ଇଟିଭି ଭାରତ
