କୋରାପୁଟ: ଗଣମାଧ୍ୟମରେ ଘୂରିବୁଲୁଛି ଜିଲ୍ଲାପାଳଙ୍କ ଜାଲ ଦସ୍ତଖତର ନିର୍ଦ୍ଦେଶନାମା । ଓଡିଶା ଶାସନର ଲୋଗୋ ଥିବା ଏକପତ୍ରରେ ଓଡିଶା ସରକାରଙ୍କ ନିୟମାବଳୀ ପତ୍ର-୨୦୨୦ ବୋଲି ଦର୍ଶାଯାଇ ଏକ କାଗଜ ଗତ ତିନିଦିନ ଧରି ସାମାଜିକ ଗଣମାଧ୍ୟମରେ ଘୁରିବୁଲୁଛି । ଯାହାକୁ ନେଇ କିଛି ଯୁବକ କୋରାପୁଟ ଜିଲ୍ଲାପାଳ ଓ ଏସପିଙ୍କୁ ଭେଟି ଘଟଣାର ତଦନ୍ତ କରିବା ପାଇ ଦାବି କରିଛନ୍ତି ।
କାଗଜର ନିମ୍ନ ଭାଗରେ ଜିଲ୍ଲାପାଳ କୋରାପୁଟ ଲେଖାଯାଇ ଏକ ନିର୍ଦ୍ଦିଷ୍ଟ ଧର୍ମାବଲମ୍ବୀ ଲୋକେ କିପରି ବ୍ୟବହାର କରିବା କଥା ସେ ସଂକ୍ରାନ୍ତରେ ନିର୍ଦ୍ଦେଶନାମା ଥିବା ଏହି ପତ୍ରଟି ଜିଲ୍ଲାପାଳଙ୍କ ଦ୍ବାରା ପ୍ରେରିତ ହୋଇଥିବା ଭଳି ଭ୍ରମ ସୃଷ୍ଟି କରୁଛି ।
ଏହି ପତ୍ରକୁ ନେଇ ସେହି ଧର୍ମାବଲମ୍ବୀଙ୍କ ମନକୁ ଆନ୍ଦୋଳିତ କରିଥିବା ବେଳେ ଜିଲ୍ଲାପାଳ ମଧୁସୂଦନ ମିଶ୍ରଙ୍କ ଦସ୍ତଖତ ଭଳି ଦେଖାଯାଉଥିବା ଲେଖାଟିରେ ମିଶ୍ର ସ୍ଥାନରେ ଦାସ ଲେଖାଯାଇଥିବା ଦେଖି ଲୋକେ ଏଥିରେ ସତ୍ୟତା ନଥିବା ନେଇ ଆଶ୍ବସ୍ତ ହୋଇଥିଲେ ।
ତେବେ ଦାମନଯୋଡି ଖ୍ରୀଷ୍ଟିୟ ଯୁବ ସମାଜ ତରଫରୁ କିଛି ଯୁବକ କୋରାପୁଟ ଜିଲ୍ଲାପାଳ ଓ ଏସପିଙ୍କୁ ଭେଟି ଘଟଣାର ତଦନ୍ତ କରିବା ପାଇ ଦାବି କରିଛନ୍ତି । କୋରାପୁଟ ଏସପି ମୁକେଶ ଭାମୁ ଘଟଣାଟିକୁ ଗୁରୁତ୍ବର ସହ ନେଇଛନ୍ତି ଏବଂ ଆଇନ ଅନୁଯାଇ କାର୍ଯ୍ୟାନୁଷ୍ଠାନ ନିଆଯିବ ବୋଲି କୋରାପୁଟ ଏସଡିପିଓ ବଳଭଦ୍ର କୂଳଦୀପ କହିଛନ୍ତି ।
କୋରାପୁଟ ସିଏଚ ଶାନ୍ତାକାର, ଇଟିଭି ଭାରତ
