କୋରାପୁଟ: ଶ୍ରାବଣ ମାସର ବର୍ଷାରେ ଭିଜୁଥିବା କୋରାପୁଟ ଜିଲ୍ଲାର ସାତଟି ବ୍ଲକର ୩୦୦୦ ହେକ୍ଟର ଜମିରେ କଫି ଗଛକୁ ନୁଆଁଇ ଫଳିଥିବା ଶାଗୁଆ ରଙ୍ଗର ଟିକି ଟିକି ଫଳ କୋରାପୁଟ ଜିଲ୍ଲାର ଅର୍ଥନୈତିକ ପ୍ରଗତିର ସମ୍ଭାବନାକୁ ବହନ କରିଛି । ୧୯୩୦ ମସିହାରେ ଜୟପୁର ମହାରାଜାଙ୍କ ଦ୍ୱାରା ପରୀକ୍ଷାମୂଳକ ଭାବେ କୋରାପୁଟ ଅଞ୍ଚଳରେ କଫି ଚାଷ ଆରମ୍ଭ କରାଯାଇଥିଲା ।
ରାଜ୍ୟରେ ସର୍ବାଧିକ କଫି ଚାଷ ହେଉଥିବା ଜିଲ୍ଲାର ମାନ୍ୟତା ପାଇ କୋରାପୁଟ ଏହି କ୍ଷେତ୍ରରେ ଅଭୂତପୂର୍ବ ଅଗ୍ରଗତି କରିଥିବା କଫି ବୋର୍ଡର ସମ୍ପର୍କ ଅଧିକାରୀ ଅଜିତ କୁମାର ରାଉତ କହିଛନ୍ତି । ତେବେ କଫି ମଞ୍ଜିର ପ୍ରକ୍ରିୟାକରଣ କରିବା ପାଇଁ ବ୍ୟବସ୍ଥା ନଥିବା ଯୋଗୁଁ ଚାଷୀ ବହୁ ଅସୁବିଧାର ସମ୍ମୁଖୀନ ହେଉଛନ୍ତି । ଚାଷୀଙ୍କ ଏହି ଆବଶ୍ୟକତାକୁ ଦୃଷ୍ଟିରେ ରଖି କୋରାପୁଟ ଜିଲ୍ଲା ପ୍ରଶାସନ, କଫି ବୋର୍ଡ, କୋରାପୁଟ କଫି ଉନ୍ନୟନ ପରିଷଦ ଓ ଟିଡିସିସିର ମିଳିତ ଆନୁକୂଲ୍ୟରେ କୋରାପୁଟରେ ଏକ କଫି ପ୍ରକ୍ରିୟାକରଣ ୟୁନିଟ ସ୍ଥାପନା କରାଯାଉଥିବା ଜଳ ବିଭାଜିକା ପ୍ରକଳ୍ପର ଅଧିକାରୀ ଭବାନୀ ଶଙ୍କର କାଲୋ ସୂଚନା ଦେଇଛନ୍ତି ।
କୋରାପୁଟର ଗିରିକନ୍ଦର ମଧ୍ୟରୁ କଫିର ମହକ ବିଶ୍ବର ବିଭିନ୍ନ ଭାଗରେ ପରିଚିତ ହେଉଥିବା ବେଳେ ଝାଳବୁହା ପରିଶ୍ରମ କରି କଫି ଫଳାଇଥିବା ଏ ଅଞ୍ଚଳର ଚାଷୀ ତା ଉତ୍ପାଦର ଉଚିତ ମୂଲ୍ୟ ପାଇ ଆନନ୍ଦିତ ହୋଇଉଠିଵ ଏଥିରେ କୌଣସି ସନ୍ଦେହ ନାହିଁ ।
କୋରାପୁଟରୁ ସିଏଚ ଶାନ୍ତାକାର, ଇଟିଭି ଭାରତ
