କୋରାପୁଟ: ଜଲାପୁଟ ଜଳଭଣ୍ଡାର ଦ୍ବାରା ବିସ୍ଥାପିତ ଓ ପ୍ରଭାବିତ ହୋଇଥିବା ପାଡୁଆ ଥାନା ଅଞ୍ଚଳର ପାନ୍ତଲୁଙ୍ଗ ଓ ଅନ୍ୟାନ୍ୟ 156ଟି ଗ୍ରାମର ଲୋକଙ୍କ ଜଳଭଣ୍ଡାର ପାଇଁ ସର୍ଭେ ଚାଲିଥିଲା । ସେ ସମୟରେ ଅଞ୍ଚଳବାସୀଙ୍କ 18,200 ଏକର ଜମି ଜଳସମାଧି ହେଉଥିବା କାରଣରୁ ସେମାନଙ୍କୁ ଉତ୍ତମ ସ୍ବାସ୍ଥ୍ୟ, ଶିକ୍ଷା ଓ ଜୀବନ ଜୀବିକା ନିମନ୍ତେ ସ୍ବତନ୍ତ୍ର ବ୍ୟବସ୍ଥା କରାଯିବ ବୋଲି ପ୍ରତିଶ୍ରୁତି ଦିଆଯାଇଥିଲା । ହେଲେ ସରକାର ନିଜ ପ୍ରତିଶ୍ରୁତି ରଖିନଥିବାରୁ ଏନେଇ ଅତୀତରେ ଅନେକବାର ଆନ୍ଦୋଳନ ହୋଇଛି ।
ଗତ ଜାନୁଆରୀ ମାସରେ ବୁଡି ଅଞ୍ଚଳ ବିସ୍ଥାପିତ ସଂଘର ସଦସ୍ୟ ଏନେଇ ରାଜ୍ୟର ଶକ୍ତି ମନ୍ତ୍ରୀ ଦିବ୍ୟ ଶଙ୍କର ମିଶ୍ରଙ୍କୁ ଭୁବନେଶ୍ବର ଯାଇ ଭେଟିଥିଲେ । ଶକ୍ତି ମନ୍ତ୍ରୀ ଫେବୃଆରୀ 7 ତାରିଖରେ ସେମାନଙ୍କ ଅଞ୍ଚଳକୁ ଆସି ସମସ୍ୟାର ସମାଧାନ ଦିଗରେ କାମ କରିବେ ବୋଲି ପ୍ରତିଶ୍ରୁତି ଦେଇଥିବା ସଂଘର ସଭାପତି ଲଳିତ ଟାଙ୍ଗୁଲୁ ଜଣାଇଛନ୍ତି । କିନ୍ତୁ ସେ ମଧ୍ୟ ପ୍ରତାରଣା କରି ଅଞ୍ଚଳକୁ ଆସିନଥିବା ଯୋଗୁଁ ଗୁରୁବାର ସଂଘର କର୍ମକର୍ତ୍ତା କୋରାପୁଟ ଆସି ଉପଜିଲ୍ଲାପାଳଙ୍କ ପାଖରେ ପୁଣି ଥରେ ଦାବିପତ୍ର ଦେଇଛନ୍ତି ।
ତେବେ ଆସନ୍ତା 2 ମାସ ମଧ୍ୟରେ ଅଞ୍ଚଳର ସମସ୍ୟା ପ୍ରତି ସରକାର ଦୃଷ୍ଟି ନଦେଲେ ଆନ୍ଧ୍ରପ୍ରଦେଶ ପ୍ରତି ସମସ୍ତ ଅଞ୍ଚଳବାସୀ ଆନୁଗତ୍ୟ ପ୍ରକାଶ କରିବେ ବୋଲି ସଂଘ ଚେତାବନୀ ଦେଇଛି ।
କୋରାପୁଟରୁ ସିଏଚ୍ ଶାନ୍ତାକାର, ଇଟିଭି ଭାରତ
