କୋରାପୁଟ: ଆସନ୍ତାକାଲି ତଥା ଶନିବାର ଠାରୁ ତିନିଦିନ ଧରି କୋରାପୁଟର ଲାଣ୍ଡିଗୁଡାସ୍ଥିତ ସରକାରୀ ମହାବିଦ୍ୟାଳୟ ପଡ଼ିଆଠାରେ ରାଜ୍ୟ ସ୍ତରୀୟ ଆଦିବାସୀ ମହୋତ୍ସବ 'ପରବ' ର ସମାବର୍ତ୍ତନ ଉତ୍ସବ ଅନୁଷ୍ଠିତ ହେବ । ପ୍ରତିବର୍ଷ ଭଳି ଚଳିତ ବର୍ଷ ମଧ୍ୟ ୧୫ ଜଣଙ୍କୁ ବିଭିନ୍ନ କ୍ଷେତ୍ରରେ ଉତ୍କୃଷ୍ଟ ଅବଦାନ ନିମନ୍ତେ 'ପରବ' ସମ୍ମାନ ଦିଆଯିବ । ଏହାସହ ଜିଲ୍ଲାରେ ବାଲ୍ୟ ବିବାହ ନିରୋଧ ପାଇଁ ଆରମ୍ଭ ହୋଇଥିବା 'ଅପରାଜିତା' କାର୍ଯ୍ୟକ୍ରମର ପାଞ୍ଚ ଜଣ ବାର୍ତ୍ତା ବାହକଙ୍କୁ ମଧ୍ୟ ସମ୍ମାନିତ କରିବାର କାର୍ଯ୍ୟକ୍ରମ ରହିଛି । ବିଶିଷ୍ଟ ଶିକ୍ଷାବିତ୍ ତଥା ସମାଜସେବୀ ଅଚ୍ୟୁତ ସାମନ୍ତଙ୍କୁ ପରବ ଉତ୍ସବର ସର୍ବୋଚ୍ଚ ସମ୍ମାନ ଭାବେ ପରିଗଣିତ ସମ୍ମାନଜନକ ଶବରୀ ସମ୍ମାନରେ ସମ୍ମାନିତ କରାଯିବ ବୋଲି ଜିଲ୍ଲା ସଂସ୍କୃତି ଅଧିକାରୀ ଅକ୍ଷୟ କୁମାର ସେଠୀ ଜଣାଇଛନ୍ତି।
ଏହି ତ୍ରିଦିବସୀୟ ମହୋତ୍ସବର ପ୍ରଥମ ଦିନରେ ଓଡ଼ିଶାର ପରିବହନ ମନ୍ତ୍ରୀ ପଦ୍ମନାଭ ବେହେରା ମୁଖ୍ୟ ଅତିଥି ଭାବେ ଯୋଗଦେବେ। ସେହିଭଳି ରାଜ୍ୟ ଜାତି ଓ ଜନଜାତି ଉନ୍ନୟନ ତଥା ପଛୁଆବର୍ଗ କଲ୍ୟାଣ ମନ୍ତ୍ରୀ ଜଗନ୍ନାଥ ସାରକା ଏବଂ ହସ୍ତତନ୍ତ , ବୟନଶିଳ୍ପ ଓ ହସ୍ତଶିଳ୍ପ ମନ୍ତ୍ରୀ ପଦ୍ମିନୀ ଦିଆନ ସମ୍ମାନିତ ଅତିଥି ଭାବେ ଯୋଗ ଦେବାର କାର୍ଯ୍ୟକ୍ରମ ରହିଛି ।
ଚଳିତ ବର୍ଷ ଆଞ୍ଚଳିକ , ରାଜ୍ୟ ଓ ରାଜ୍ୟ ବାହାରୁ ଅନେକ ସାଂସ୍କୃତିକ ଦଳ 'ପରବ' ମଞ୍ଚରେ ଚିତାକର୍ଷକ ସାଂସ୍କୃତିକ ବିଚିତ୍ରା ପ୍ରଦର୍ଶନ କରିବାର କାର୍ଯ୍ୟକ୍ରମ ରହିଛି । ହସ୍ତତନ୍ତ , ଟେରାକୋଟା ଭଳି ହସ୍ତକାମ ସହିତ ଆଦିବାସୀଙ୍କ ଦ୍ଵାରା ପ୍ରସ୍ତୁତ ବାଉଁଶ ରେ ତିଆରି ଭଳିକି ଭଳି ଜିନିଷ , ବନ୍ଧୁଗାଁ ଅଞ୍ଚଳର ଲେମନ୍ ଗ୍ରାସ ତୈଳ ଓ ଆଦିବାସୀଙ୍କ ବଗିଚାରୁ ଆସିଥିବା କୋରାପୁଟ କଫି ଏହି ବର୍ଷର ବିଶେଷ ଆକର୍ଷଣ ହେବ ବୋଲି ଓରମାସ୍ ର ଜିଲ୍ଲା ଅଧିକାରୀ ରୋଷନ୍ କାର୍ତ୍ତିକ ଜଣାଇଛନ୍ତି । ଆସନ୍ତାକାଲିର ଉତ୍ସବ ପାଳନ ପାଇଁ ଆଜିଠାରୁ ପରବ ପଡ଼ିଆ ଚଳଚଞ୍ଚଳ ହୋଇଉଠିଛି ।
ପୋଲିସ ସୁରକ୍ଷାର ବନ୍ଦୋବସ୍ତ ସହିତ ଟ୍ରାଫିକ ବ୍ୟବସ୍ଥାର ଉଚ୍ଚପଦସ୍ଥ ଅଧିକାରୀ ମାନେ ତଦାରଖ କରୁଛନ୍ତି ।
କୋରାପୁଟରୁ ସି.ଏଚ ଶାନ୍ତାକାର, ଇଟିଭି ଭାରତ
