କୋରାପୁଟ: ମୁଣ୍ଡରେ ପଡିଥିଲା ଟାଙ୍ଗିଆ ଚୋଟ । ଏପରି ଅବସ୍ଥାରେ ଦୀର୍ଘ ୨୪ ଘଣ୍ଟା ଧରି ନିଜ ଜୀବନ ସହ ସଙ୍ଘର୍ଷ କରିଥିଲେ ଜଣେ ଅଜଣା ବ୍ୟକ୍ତି। ଅଚେତ ଅବସ୍ଥାରେ ପଡି ରହିଲେ ହସ୍ପିଟାଲ ଶଯ୍ୟାରେ । ମୁଣ୍ଡର ଗଭୀର ଭାଗରେ ଆଘାତ ଲାଗିଥିବାରୁ ଚିକିତ୍ସାରେ ବିଳମ୍ବ ହୋଇଥିଲା । ଶେଷରେ ହରାଇଥିଲେ ନିଜ ଜୀବନ ।
ସୂଚନା ମୁତାବକ, ନବରଙ୍ଗପୁରର ଆମ୍ବୁଲାନ୍ସ ଗତକାଲି ରାତିରେ ଏକ ଅଜଣା ବ୍ୟକ୍ତିଙ୍କୁ କ୍ଷତବିକ୍ଷତ ଅବସ୍ଥାରେ ଆଣି କୋରାପୁଟସ୍ଥିତ ଶହୀଦ ଲକ୍ଷ୍ମଣ ନାୟକ ମେଡିକାଲ କଲେଜ ଓ ହସ୍ପିଟାଲରେ ଛାଡି ଚାଲିଯାଇଥିଲା । ତେବେ ଗୁରୁତର ଅବସ୍ଥାରେ ସେହି ଅଜଣା ବ୍ୟକ୍ତିଙ୍କ ଚିକିତ୍ସା ଆରମ୍ଭ କରିଥିଲେ ହସ୍ପିଟାଲ କର୍ମଚାରୀ । ତେବେ ସେ ଅତ୍ୟଧିକ ଗୁରୁତର ଥିବାରୁ ତାଙ୍କୁ କୋରାପୁଟରେ ଚିକିତ୍ସା କରିବା ସମ୍ଭବ ନଥିବା ହସ୍ପିଟାଲ କର୍ତ୍ତୃପକ୍ଷ କହିଛନ୍ତି।
କିନ୍ତୁ ଅଜଣା ବ୍ୟକ୍ତିଙ୍କ ସହ କେହିନଥିବାରୁ ତାଙ୍କୁ ଅନ୍ୟତ୍ର ସ୍ଥାନାନ୍ତର କରିବା ପାଇଁ ନିଷ୍ପତ୍ତି ନିଆଯାଇଥିଲେ ସୁଦ୍ଧା କୌଣସି ପଦକ୍ଷେପ ନେଇପାରି ନଥିଲେ ମେଡିକାଲ କର୍ତ୍ତୃପକ୍ଷ । ସେପଟେ ତାଙ୍କ ଅବସ୍ଥା ଅଧିକ ଗୁରୁତର ହେବାରୁ ଶେଷରେ ଆଜି ସନ୍ଧ୍ୟାରେ ବ୍ରହ୍ମପୁର ପଠାଇବା ପାଇଁ ପ୍ରସ୍ତୁତ ହୋଇଥିଲେ । କିନ୍ତୁ ଆମ୍ବୁଲାନ୍ସ ଆସିବା ମଧ୍ୟରେ ବ୍ୟକ୍ତି ଜଣକ ନିଜ ଜୀବନ ହରାଇଥିଲେ।
କୋରାପୁଟରୁ ସିଏଚ୍ ଶାନ୍ତାକାର, ଇଟିଭି ଭାରତ
