କୋରାପୁଟ: ଜିଲ୍ଲାରେ ଦିନକରେ 6 ଜଣ କରୋନା ପଜିଟିଭ ଚିହ୍ନଟ ହୋଇଛନ୍ତି । ଆଜି କୋରାପୁଟ ଜିଲ୍ଲାର ନନ୍ଦପୁର ଓ ଲକ୍ଷ୍ମୀପୁର ବ୍ଲକରୁ ଦୁଇଜଣ ଲେଖାଏଁ ଓ ଦଶମନ୍ତପୁର ବ୍ଲକ ଓ ଜୟପୁର ପୌରାଞ୍ଚଳରେ ଜଣେ ଲେଖାଏଁ ପଜିଟିଭ ଚିହ୍ନଟ ହୋଇଥିବା ଜିଲ୍ଲାପାଳ ମଧୁସୂଦନ ମିଶ୍ର ଜଣାଇଛନ୍ତି । ସେମାନେ ସମସ୍ତେ ଆନ୍ଧ୍ରପ୍ରଦେଶ ରୁ ଆସିଥିବା ଜଣାପଡିଛି । ସେମାନଙ୍କ ମଧ୍ୟରୁ ପାଞ୍ଚ ଜଣ ସରକାରଙ୍କ ଦ୍ବାରା ନିର୍ଦ୍ଧାରିତ କ୍ବାରେଣ୍ଟାଇନ କେନ୍ଦ୍ରରେ ରହିଥିବା ବେଳେ ଜୟପୁରର ବ୍ୟକ୍ତି ସହର ମଧ୍ୟରେ ଥିବା ବେଲ ରୋଡ଼ ସ୍ଥିତ ନିଜ ଘରେ ହୋମ କ୍ବାରେଣ୍ଟାଇନରେ ରହିଥିଲେ ।
ସେମାନଙ୍କ ସ୍ବାବ ରିପୋର୍ଟ ପାଇବା ପରେ ପାଞ୍ଚଜଣଙ୍କୁ ଜୟପୁରରେ ଥିବା କୋଭିଡ କେୟାର ହସ୍ପିଟାଲ ରେ ଭର୍ତି କରାଯାଇଥିବା ବେଳେ ଜୟପୁରର ବ୍ୟକ୍ତିଙ୍କ ଖୋଜ ଖବର ମିଳିଲା ନାହିଁ । ଜିଲ୍ଲା ପ୍ରଶାସନ ସେହି ବ୍ୟକ୍ତିଙ୍କୁ ଖୋଜା ଖୋଜି କରିବା ପରେ ସେ କାହାକୁ କିଛି ନ ଜଣାଇ ପୁଣିଥରେ ଆନ୍ଧ୍ରପ୍ରଦେଶକୁ କୌଣସି ଏକ ଘରୋଇ କାର୍ଯ୍ୟକ୍ରମରେ ଭାଗ ନେବା ପାଇଁ ଚାଲିଯାଇଥିବା ସୂଚନା ଦେଇଛନ୍ତି ଜିଲ୍ଲାପାଳ । ସୁରକ୍ଷା ଦୃଷ୍ଟିରୁ ଏହି ସମସ୍ତ ବ୍ୟକ୍ତି ରହିଥିବା କ୍ବାରଣ୍ଟାଇନ କେନ୍ଦ୍ର ଗୁଡିକୁ ଆହୁରି ଅଧିକ କଡାକଡି କରାଯିବ ବୋଲି ଜିଲ୍ଲାପାଳ କହିଛନ୍ତି।
କୋରାପୁଟରୁ ସିଏଚ୍ ଶାନ୍ତାକାର, ଇଟିଭି ଭାରତ
