କୋରାପୁଟ: ଚଇତି ପରବ୍ ବେଣ୍ଟ ଉତ୍ସବରେ ଗଡିଲା ମୁଣ୍ଡ । ସାମାନ୍ୟ ବଚସାକୁ କେନ୍ଦ୍ର କରି ୨ଜଣଙ୍କୁ ଅତି ନିର୍ମମ ଭାବେ ହତ୍ୟା କରାଯାଇଥିବା ବେଳେ ଜଣେ ଗୁରୁତର । ଏଭଳି ଅଭାବନୀୟ ଘଟଣା ଘଟିଛି ଦାମନଯୋଡି ନିକଟସ୍ଥ ସିନ୍ଧିପାର ଗାଁରେ । ମୃତକ ଦ୍ବୟ ହେଲେ ପୂର୍ଣ୍ଣ ନାୟକ ଏବଂ ସୁରେନ୍ଦ୍ର ଦାମି ଏବଂ ଗୁରୁତର ହୋଇଥିବା ସୋମନାଥ ଦାମିଙ୍କୁ ବିଶାଖାପାଟଣା ସ୍ଥାନାନ୍ତର ହୋଇଥିବା ସୂଚନା ମିଳିଛି ।
ସୂଚନାନୁଯାୟୀ, କୋରାପୁଟରେ ଚଇତି ପରବ ବେଣ୍ଟ ପରେ ଦାମନଯୋଡି ନିକଟସ୍ଥ ସିନ୍ଧିପାର ଗାଁରେ ଲୋକେ ଉତ୍ସବ ପାଳୁଥିଲେ । ଏହି ସମୟରେ କୌଣସି କାରଣରୁ କିଛି ଯୁବକଙ୍କ ମଧ୍ୟରେ ଝଗଡା ହୋଇଥିଲା । ଏହାପରେ କିଛି ଦୁର୍ବୃତ୍ତ ଏକ ଧାରୁଆ ଅସ୍ତ୍ରରେ ଆକ୍ରମଣ କରିବାରୁ ପୂର୍ଣ୍ଣ ନାୟକ ଏବଂ ସୁରେନ୍ଦ୍ର ଦାମିଙ୍କ ମୃତ୍ୟୁ ହେବା ସହ ସୋମନାଥ ଗୁରୁତର ଆହତ ହୋଇଥିଲେ । ଏନେଇ ଖବର ପାଇ ଦାମନଯୋଡି ଥାନା ଅଧିକାରୀ ଗୌରହରି ସାହୁଙ୍କ ସମେତ ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି । ଏଥି ସହ କିଛି ଲୋକଙ୍କୁ ଅଟକ ରଖାଯାଇଥିବା ବେଳେ ମୁଖ୍ୟ ଅଭିଯୁକ୍ତ ଫେରାର ରହିଥିବା ସୂଚନା ରହିଛି ।
କୋରାପୁଟରୁ ସିଏଚ ଶାନ୍ତାକାର, ଇଟିଭି ଭାରତ
