ଖୋର୍ଦ୍ଧା: ଉଧାର ଟଙ୍କା ଫେରି ନ ପାଇବାରୁ ଯୁବକଙ୍କ ଆତ୍ମହତ୍ୟା । ମୃତ୍ୟୁ ପୂର୍ବରୁ ଭିଡିଓ କରି ନିଜର ଦୁଃଖ ଓ ଆତ୍ମହତ୍ୟାର କାରଣ ଜଣାଇଲେ ଯୁବକ । ଖୋର୍ଦ୍ଧା ଜିଲ୍ଲା ଟାଙ୍ଗୀ ଥାନା ଅନ୍ତର୍ଗତ ମାନସିଂହପୁର ପଞ୍ଚାୟତ ଡୋମଣି ସାହିରେ ଏଭଳି ଏକ ଅଭାବନୀୟ ଘଟଣା ଘଟିଛି । ମୃତକ ହେଉଛନ୍ତି ମାନସିଂହପୁର ଗ୍ରାମର ବୁଲୁ ବେହେରା । ସେ ଆତ୍ମହତ୍ୟା କରିବା ପୂର୍ବର ଭିଡିଓ ଏବେ ସାମ୍ନାକୁ ଆସିଛି । ସେ ଧାର ଦେଇଥିବା ଟଙ୍କା ଫେରି ନ ପାଇବାରୁ ଆତ୍ମହତ୍ୟା କରିଥିବା ଜଣାପଡିଛି ।
ଭିଡିଓରୁ ଶୁଣିବାକୁ ମିଳୁଛି ଯେ, ବୁଲୁ ବେହେରା ନିଜର କଷ୍ଟ ଅର୍ଜିତ ୨ ଲକ୍ଷ ଟଙ୍କା ସାହାଯ୍ୟ କରିବା ଉଦ୍ଦେଶ୍ୟରେ ମାତ୍ର ୩ ମାସ ପାଇଁ ତରାପି ଗ୍ରାମର ଲିଙ୍ଗା ବିଶ୍ବାଳ ଓରଫ ପପୁ , ତପୁ ବିଶ୍ବାଳ, ମୀନାକ୍ଷୀ ବିଶ୍ବାଳ ଓ ପ୍ରଫୁଲ୍ଲ ବିଶ୍ବାଳଙ୍କୁ ଦେଇଥିଲେ । ଟଙ୍କା ଧାର ନେଇଥିବା ବ୍ୟକ୍ତିମାନେ ନିର୍ଦ୍ଧାରିତ ସମୟ ମଧ୍ୟରେ ପରିଶୋଧ କଲେନାହିଁ । ଯାହାକୁ ନେଇ ବୁଲୁ ମାନସିକ ଚାପରେ ରହୁଥିଲେ । ଦିନ ପରେ ଦିନ ଗଡି ୩ ବର୍ଷ ବିତିଗଲା ହେଲେ ସେ ଧାର ଦେଇଥିବା ୨ ଲକ୍ଷ ଟଙ୍କା ଫେରି ପାଇଲେ ନାହିଁ । ନିଜ ପିଲାଙ୍କ ଭବିଷ୍ୟତ ପାଇଁ ସଞ୍ଚୟ କରିଥିବା ଟଙ୍କା ନ ପାଇ ଶେଷରେ ବୁଲୁ ଭିଡିଓରେ ନିଜର ଦୁଃଖ ବଖାଣି ବିଷ ପିଇ ଆତ୍ମହତ୍ୟା କରିଛନ୍ତି । ସ୍ବାମୀଙ୍କ ମୃତ୍ୟୁ ପାଇଁ ଟଙ୍କା ଉଧାର ନେଇଥିବା ବ୍ୟକ୍ତିଙ୍କୁ ଦାୟୀ କରିଛନ୍ତି ମୃତକଙ୍କ ପତ୍ନୀ ।
ଇଟିଭି ଭାରତ, ଖୋର୍ଦ୍ଧା
