ଭୁବନେଶ୍ବର: ମୁମ୍ବାଇ ସ୍ଥିତ ଜିଓ ୱାଲର୍ଡ ସେଣ୍ଟରରେ ପ୍ରଥମ ଜାତୀୟ ବିଧାୟକ ସମ୍ମିଳନୀ ଅନୁଷ୍ଠିତ ହେବ । ପୁଣେ ସ୍ଥିତ MIT ନ୍ୟାସନାଲ ସ୍କୁଲ ଅଫ ଗଭର୍ଣମେଣ୍ଟ ଦ୍ୱାରା ଏହି ଜାତୀୟ ସ୍ତରୀୟ ସମ୍ମିଳନୀ ଜୁନ 15 ରୁ 17 ତାରିଖ ପର୍ଯ୍ୟନ୍ତ ଆୟୋଜିତ ହେବ । ସମ୍ମିଳନୀରେ ମୁଖ୍ୟତଃ ଗଣତନ୍ତ୍ର, ରାଷ୍ଟ୍ର ଗଠନ, ଶାନ୍ତି ପ୍ରତିଷ୍ଠା, ନେତୃତ୍ୱ ଓ ଗୁଡ଼ ଗଭର୍ଣ୍ଣାନ୍ସ ଆଦି ଗୁରୁତ୍ୱପୂର୍ଣ୍ଣ ଦିଗ ଉପରେ ଆଲୋଚନା ହେବ । ଏହି ସମ୍ମିଳନୀରେ ଯୋଗଦେବାକୁ ଗଞ୍ଜାମ ଜିଲ୍ଲାର ପୂର୍ବତନ ସର୍ବକନିଷ୍ଠ ସରପଞ୍ଚ ସୁଶ୍ରୀ ଆରତୀ ଦେବୀଙ୍କୁ ନିମନ୍ତ୍ରଣ କରାଯାଇଛି ।
ପ୍ରଥମ ଜାତୀୟ ବିଧାୟକ ସମ୍ମିଳନୀରେ ସୁମିତ୍ରା ମହାଜନ, ଡ଼ଃ ମିରା କୁମାର, ଡ଼ଃ ମନୋହର ଯୋଶୀ, ଶିବରାଜ ପାଟିଲ ଓ ଲୋକସଭାର ବାଚସ୍ପତି ଓଁମ ବିର୍ଲାଙ୍କ ଭଳି ବରିଷ୍ଠ ରାଜନୀତିଜ୍ଞ ଯୋଗଦେବାର କାର୍ଯ୍ୟକ୍ରମ ରହିଛି । ସମ୍ମିଳନୀରେ ମୁଖ୍ୟତଃ ଗଣତନ୍ତ୍ର, ରାଷ୍ଟ୍ର ଗଠନ, ଶାନ୍ତି ପ୍ରତିଷ୍ଠା, ନେତୃତ୍ୱ ଓ ଗୁଡ଼ ଗଭର୍ଣନାନ୍ସ ଆଦି ଗୁରୁତ୍ୱପୂର୍ଣ୍ଣ ଦିଗ ଉପରେ ଆଲୋଚନା ହେବ । ଏହି ସମ୍ମିଳନୀରେ ଯୋଗଦେବାକୁ ଆୟୋଜକ MIT ପୁଣେ ପକ୍ଷରୁ ଗଞ୍ଜାମ ଜିଲ୍ଲାର ପୂର୍ବତନ ସର୍ବକନିଷ୍ଠ ସରପଞ୍ଚ ସୁଶ୍ରୀ ଆରତୀ ଦେବୀଙ୍କୁ ନିମନ୍ତ୍ରଣ କରାଯାଇଛି ।
ଏଭଳି ସମ୍ମାନଜନକ ତଥା ଜାତୀୟସ୍ତରୀୟ ସମ୍ମିଳନୀରେ ଯୋଗଦେବାର ସୁଯୋଗ ପାଇଥିବାରୁ ନିଜେ ଗର୍ବ ଅନୁଭବ କରିବା ସହ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ କୃତଜ୍ଞତା ଜଣାଇଛନ୍ତି ଆରତୀ । ସେ କହିଛନ୍ତି, "ଜାତୀୟ ବିଧାୟକ ସମ୍ମିଳନୀରେ ଯୋଗ ଦେବାକୁ ନିମନ୍ତ୍ରଣ କରାଯାଇଥିବାରୁ ନିଜକୁ ଗର୍ବ ଅନୁଭବ ହେଉଛି । ଏଥିପାଇଁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ଧନ୍ୟବାଦ ଜଣାଉଛି । ରାଜ୍ୟ ସରକାରଙ୍କ ବିକାଶମୂଳକ କାର୍ଯ୍ୟକୁ ସଫଳ କରିବା ପାଇଁ ମୁଁ ଚେଷ୍ଟା ଜାରି ରଖିଛି । ଆଗକୁ ମଧ୍ୟ ଲୋକଙ୍କ ସେବା ପାଇଁ କାର୍ଯ୍ୟ କରିବି ।"
ପ୍ରକାଶ ଥାଉକି, 'ଟିପ ଚିହ୍ନ ନୁହେଁ ଦସ୍ତଖତ ଦିଅ' ସ୍ଲୋଗାନ ଦେଇ ଦେଶର ସର୍ବକନିଷ୍ଠ ମହିଳା ସରପଞ୍ଚ ଭାବେ ଓଡ଼ିଶାର ଝିଅ ଆରତୀ ଦେବୀ ଉଚ୍ଚ ପ୍ରଶଂସିତ ହୋଇଛନ୍ତି । ତାଙ୍କ ରାଜନୀତି ଜୀବନର କାର୍ଯ୍ୟ ଧାରାରେ ଅନୁପ୍ରାଣିତ ହୋଇ ଏକ ବହୁଭାଷୀ ଚଳଚ୍ଚିତ୍ର 'ସାର ମ୍ୟାଡ଼ମ ସରପଞ୍ଚ' ପ୍ରସ୍ତୁତ ହୋଇଥିଲା । ଖାଲି ସେତିକି ନୁହେଁ ପୁରୁଷ ପ୍ରାଧାନ୍ୟ ସମାଜରେ ରାଜନୀତିର ପୃଷ୍ଠପୋଷକତାରେ ନିଜର ଦବଦବା ଦେଖାଇବା ସହ ସେ ଅନେକ ପରିବର୍ତ୍ତନଶୀଳ କାର୍ଯ୍ୟ ଆପଣାଇଥିଲେ । ତାହା ସେତେବେଳେ ରାଜନୀତିରେ ଜଣେ ମହିଳା ପାଇଁ ପ୍ରଥମ ପ୍ରୟାସ ଥିଲା l
ଜଣେ ଉଚ୍ଚ ଶିକ୍ଷିତା ଓ ସ୍ୱଚ୍ଛଳ ବ୍ୟାଙ୍କ ଚାକିରି ଛାଡି ରାଜନୀତିରେ ପ୍ରବେଶ କରି ୨୦୧୨ ମସିହାରେ ଦେଶର ସର୍ବକନିଷ୍ଠ ମହିଳା ସରପଞ୍ଚ ଭାବେ ନିର୍ବାଚିତ ହୋଇଥିଲେ ଏବଂ ଗଞ୍ଜାମ ଜିଲ୍ଲାର ପୋଲସରା ବ୍ଲକର ଢୁଙ୍କାପଡା ପଞ୍ଚାୟତର ସାଜିଥିଲେ ସରପଞ୍ଚ । ନାରୀ ଶିକ୍ଷା ଓ ମହିଳା ଗ୍ରାମସଭା ଭଳି କାର୍ଯ୍ୟ ହାତକୁ ନେଇ ଚର୍ଚ୍ଚାରେ ଥିଲେ । ଏଥିପାଇଁ ତାଙ୍କୁ କେବଳ ରାଜ୍ୟ ନୁହେଁ ଦେଶ ଓ ଦେଶ ବାହାରେ ପ୍ରଶଂସା ଓ ସମ୍ମାନ ମିଳିଥିଲା । ଯେଉଁଥି ପାଇଁ ତାଙ୍କୁ ଜାତୀୟ ସ୍ତରରେ ଚେଞ୍ଜ ମେକର ଭାବେ ପୁରସ୍କାର ମିଳିଥିଲା ।
ଇଟିଭି ଭାରତ, ଭୁବନେଶ୍ବର
