ଖୋର୍ଦ୍ଧା: ଗୁଳିକାଣ୍ଡ ଘଟି ଯୁବକ ଗୁରୁତର । ଏଭଳି ଘଟଣା ଦେଖିବାକୁ ମିଳିଛି ଖୋର୍ଦ୍ଧା ଜିଲ୍ଲା ଅଧିନ ବେଗୁନିଆ ଥାନା ଅଞ୍ଚଳରେ । ସୂଚନାନୁସାରେ କୌଣସି କାରଣକୁ ନେଇ ଘଟିଛି ଗୁଳିକାଣ୍ଡ । ଏଥିରେ ଜଣେ ଯୁବକ ଗୁରୁତର ଆହତ ହୋଇ ଖୋର୍ଦ୍ଧା ହସ୍ପିଟାଲରେ ଭର୍ତ୍ତି ହୋଇଥିଲେ । ପରେ ଅବସ୍ଥା ଗୁରୁତର ହେବାରୁ ଭୁବନେଶ୍ବର ଏମ୍ସକୁ ସ୍ଥାନାନ୍ତରିତ ହୋଇଛନ୍ତି ।
ଏହି ଘଟଣାରେ ଖୋର୍ଦ୍ଧା ଏସପି ରାଜ୍ କିଶୋର ଦୋରା ମେଡିକାଲରେ ପହଁଞ୍ଚି ତଦନ୍ତ ଆରମ୍ଭ କରିବା ସହ ଏହା ପାରିବାରିକ ଗଣ୍ଡଗୋଳ ଯୋଗୁଁ ହୋଇଥିବା ପୋଲିସ ପ୍ରାଥମିକ ତଦନ୍ତରୁ ଜାଣିବାକୁ ପାଇଛି । ତେବେ ଗୁଳିକାଣ୍ଡ ଘଟାଇଥିବା ବ୍ୟକ୍ତି ଜଣକ ହେଉଛନ୍ତି ପୂର୍ବତନ ସାମରିକ ଅଧିକାରୀ ପ୍ରସନ୍ନ ନାୟକ ବୋଲି ଜଣାପଡିଛି ।
ସେପଟେ ବେଗୁନିଆ ଗୁଳିମାଡ଼ ଘଟଣାର ମାତ୍ର ଦୁଇ ଘଣ୍ଟା ମଧ୍ୟରେ ପୋଲିସ ଅଭିଯୁକ୍ତକୁ ଧରିବାରେ ସଫଳ ହୋଇଛି । ଅଭିଯୁକ୍ତ ପ୍ରସନ୍ନ ନାୟକଙ୍କୁ ଧରିବା ସହ ତା ଠାରୁ ଗୋଟିଏ ପିସ୍ତଲ, ଅଫୁଟା ଗୁଳି ଖୋର୍ଦ୍ଧା ପୋଲିସର ସ୍ପେଶାଲ ସ୍କ୍ୱାର୍ଡ ଜବତ କରିଛି ।
ଏନେଇ ଖୋର୍ଦ୍ଧା ଏସପି ଫୋନ ଯୋଗେ ସୂଚନା ଦେଇ କହିଛନ୍ତି କି ଅଭିଯୁକ୍ତ ପ୍ରସନ୍ନ ଜଣେ ଅବସରପ୍ରାପ୍ତ ସୁବେଦାର ମେଜର । ତେବେ ଗୁଳିକାଣ୍ଡ ଘଟଣାରେ ଅଭିଯୁକ୍ତକୁ ଗିରଫ କରାଯାଇଥିବା ବେଳେ ଅଭିଯୁକ୍ତକୁ ଆଧିକ ପଚରା ଉଚରା ଜାରି ରହିଛି ।
ଖୋର୍ଦ୍ଧାରୁ ଗୋବିନ୍ଦ ଚନ୍ଦ୍ର ପଣ୍ଡା, ଇଟିଭି ଭାରତ
