ଖୋର୍ଦ୍ଧା : ଆଜି ପବିତ୍ର କୁମାରପୂର୍ଣ୍ଣିମାରେ ଜଣେ ଯୁବତୀଙ୍କ ଝୁଲନ୍ତା ମୃତଦେହ ବିଲ ମଧ୍ୟରୁ ଉଦ୍ଧାର ହୋଇଛି । ଏଭଳି ଅଭାବନୀୟ ଘଟଣା ଘଟିଛି ଖୋର୍ଦ୍ଧା ଜିଲ୍ଲା ବେଗୁନିଆ ଥାନା ଅନ୍ତର୍ଗତ ଭୁଆସୁଣିପାଟଣା ଗ୍ରାମରେ । ମୃତ ମହିଳା ଜଣଙ୍କ ସୁଶାନ୍ତ ବେହେରାଙ୍କ ଝିଅ ଶିବାନୀ ବେହେରା ବୋଲି ଜଣାପଡିଛି ।
ସୂଚନା ଅନୁଯାୟୀ, ଗତ ଦୁଇଦିନ ତଳେ ଶିବାନୀ ଘରୁ ନିଖୋଜ ଥିଲେ । ତେଣୁ ଗତ ଶନିବାର ଥିବା ତାଙ୍କ ମା ବେଗୁନିଆ ଥାନାରେ ଅଭିଯୋଗ କରିଥିଲେ । କିନ୍ତୁ ରବିବାର ଶିବାନୀଙ୍କ ମୃତଦେହ ଗ୍ରାମ ନିକଟ ଗହିର ମଧ୍ୟରେ ଏକ ଗଛରେ ଝୁଲନ୍ତା ଅବସ୍ଥାରେ ଥିବା ଦେଖି ଗ୍ରାମବାସୀ ପୋଲିସକୁ ଖବର ଦେଇଥିଲେ ।
ଖବର ପାଇ ବେଗୁନିଆ ପୋଲିସ ଘଟଣା ସ୍ଥଳରେ ପହଞ୍ଚି ମୃତଦେହକୁ ଉଦ୍ଧାର କରି ଖୋର୍ଦ୍ଧା ଡାକ୍ତରଖାନାକୁ ବ୍ୟବଚ୍ଛେଦ ପାଇଁ ପାଠାଇଛି । ତେବେ ଶିବାନୀ ଆତ୍ମହତ୍ୟା କରିଛନ୍ତି ନା ତାଙ୍କୁ କିଏ ହତ୍ୟା କରିଛି ତାହା ରିପୋର୍ଟ ଆସିଲେ ସ୍ପଷ୍ଟ ହେବ ବୋଲି କହିଛନ୍ତି ବେଗୁନିଆ ଥାନା ଅଧିକାରୀ ।
ଖୋର୍ଦ୍ଧାରୁ ଗୋବିନ୍ଦ ଚନ୍ଦ୍ର ପଣ୍ଡା, ଈଟିଭି ଭାରତ
