ଖୋର୍ଦ୍ଧା: ଜଟଣୀ ବ୍ଲକ ପଦନପୁର ପଞ୍ଚାୟତରେ ଉନ୍ନୟନମୂଳକ କାର୍ଯ୍ୟର ସୂଚନା ଫଳକକୁ ନେଇ ଦେଖା ଦେଇଛି ବିବାଦ । ସୂଚନା ଫଳକରେ ଜଟଣୀ ବିଧାୟକ ସୁରେଶ କୁମାର ରାଉତରାୟଙ୍କ ନାମ ନଥିବା ଓ ପୂର୍ବତନ ବିଧାୟକ ବିଭୁତି ବଳବନ୍ତରାୟଙ୍କ ନାମ ଲେଖା ହେବାକୁ ନେଇ ଗ୍ରାମବାସୀଙ୍କ ବିରୋଧ ଦେଖିବାକୁ ମିଳିଛି । ଗ୍ରାମବାସୀ ଓ ନିର୍ବାଚିତ ପ୍ରତିନିଧି ଏହାକୁ ବିରୋଧ କରିବା ସହିତ ଉଦ୍ଘାଟନ ପୂର୍ବରୁ ପୂର୍ବତନ ବିଧାୟକଙ୍କ ନାମ ଉପରେ କଳା ରଙ୍ଗ ବୋଳିଥିଲେ । ସେପଟେ ପଦନପୁର ସମିତିସଭ୍ୟ ପ୍ରିୟରଞ୍ଜନ ନାୟକ ପହଞ୍ଚି ସରପଞ୍ଚ ଅହଲ୍ୟା ନାୟକଙ୍କ ନାମକୁ ଫଳକରୁ ଲିଭାଇଥିଲେ । ତେବେ ଏଭଳି ବାଦ ବିବାଦ ଭିତରେ ଅଟକି ଯାଇଛି ଶୁଭ ଦିଆ କାର୍ଯ୍ୟ ।
ଗ୍ରାମବାସୀଙ୍କ ଅଭିଯୋଗ ଅନୁସାରେ ଜଟଣୀ ନାଇଜରରେ ନିର୍ମାଣ ହେବାକୁ ଥିବା କ୍ୟାନ୍ସର ହସ୍ପିଟାଲ ପାଇଁ ପଞ୍ଚାୟତର ଉନ୍ନତୀକରଣ ପାଇଁ ସରକାର ୨ କୋଟି ଟଙ୍କା ଅନୁଦାନ ପ୍ରଦାନ କରିଛନ୍ତି । ଏହି ଅନୁଦାନ ପାଇବା ପଛରେ ଗ୍ରାମବାସୀ, ସରପଞ୍ଚ ଓ ବିଧାୟକଙ୍କ ଅହରହ ପରିଶ୍ରମ ରହିଛି । ହେଲେ ସୂଚନା ଫଳକରେ ବର୍ତ୍ତମାନର ଜଟଣୀ ବିଧାୟକ ସୁର ରାଉତରାୟଙ୍କ ନାମ ନରଖି ପୂର୍ବତନ ବିଧାୟକ ବିଭୁତି ବଳବନ୍ତରାୟଙ୍କ ନାମ ରଖାଯିବାକୁ ନେଇ ବିବାଦ ଉଠିଛି । ସୂଚନା ଫଳକ ବଦଳାଇ ପୁଣିଥରେ ନୂଆ ଫଳକ ଲଗାଇବାକୁ ଦାବି କରିଛନ୍ତି ଗ୍ରାମବାସୀ । ସେପଟେ ଏହି ବିବାଦକୁ ନେଇ ପ୍ରତିକ୍ରିୟା ରଖିଛନ୍ତି ଜଟଣୀ ବ୍ଲକ ଅଧ୍ୟକ୍ଷା । ସେ କହିଛନ୍ତି, "ସୂଚନା ଫଳକରେ ବିକାଶ ହୁଏ ନାହିଁ । କାମ ହେଲେ ବିକାଶ ହେବ । ଏହି ବିବାଦକୁ ଆଲୋଚନା ମାଧ୍ୟମରେ ସମାଧାନ କରାଯିବ ।"
ଏହା ମଧ୍ୟ ପଢ଼ନ୍ତୁ...ଜଟଣୀ ଓଭରବ୍ରିଜ ଶ୍ରେୟ ନେବାକୁ ରାଜନୀତି ! କାମ ସରିନି ନଡିଆ ବାଡେଇଲେ ସୁର
ତେବେ ଯାହା ବି ହେଉ, ଫଳକକୁ ନେଇ ଏହି ପଞ୍ଚାୟତ ସମେତ ବ୍ଲକରେ ରାଜନୀତି ତେଜୁଥିବାର ଦେଖିବାକୁ ମିଳିଛି । ଶୁଭ ଦିଆ କାର୍ଯ୍ୟ ଅଟକି ରହିଛି । ଏନେଇ ସ୍ଥାନୀୟ ଗ୍ରାମବାସୀ ଓ ୱାର୍ଡସଭ୍ୟ କହିଛନ୍ତି, "ଏହି ଅନୁଦାନ ପାଇଁ ଆମେ ପ୍ରବଳ ଖରାରେ ଆନ୍ଦୋଳନ କରିଛୁ । ଆମ ସହିତ ଆମ ବିଧାୟକ ସୁର ରାଉତରାୟ ଓ ସରପଞ୍ଚ ଆନ୍ଦୋଳନ କରିଥିଲେ । ହେଲେ ତାଙ୍କ ନାଁ ବଦଳରେ ପୂର୍ବତନ ବିଧାୟକଙ୍କ ନାଁ ରହିଛି । ଏହାକୁ ଆମେ ବିରୋଧ କରୁଛୁ ।" ତେବେ ଏହି ଫଳକ ବିବାଦ କେବେ ସମାଧାନ ହେବ ଓ ଉନ୍ନୟନମୂଳକ କାର୍ଯ୍ୟର ଶୁଭ ଦିଆଯିବ, ତାହାକୁ ଅପେକ୍ଷା ।
ଇଟିଭି ଭାରତ, ଖୋର୍ଦ୍ଧା
