ଖୋର୍ଦ୍ଧା: ମାଳ ମାଳ ସରକାରୀ ଯୋଜନା ଖାଇ ବି ଆଜି ଯାଏଁ ଅନେକ ଗାଁକୁ ସଂଯୋଗ କରିବା ପାଇଁ ରହିଛି ରାସ୍ତାର ଅଭାବ । ଏପରି ଏକ ଗାଁ ହେଉଛି ବେଗୁନିଆ ବ୍ଲକ ବେଗୁନିଆ ଏବଂ ବଡବେରଣା ଗ୍ରାମପଞ୍ଚାୟତ ଅଧିନସ୍ଥ ଦୁର୍ଗାପୁର ଗାଁ । ଏଠାରେ ଗାଁକୁ ଯିବା ନାହିଁ ପକ୍କା ରାସ୍ତାଟିଏ । ଏନେଇ ବାରମ୍ବାର ଜିଲ୍ଲା ପ୍ରଶାସନର ଦ୍ବାରସ୍ଥ ହୋଇଥିଲେ ଫଳ ଶୂନ ।
ବାରମ୍ବାର ପ୍ରଶାସନ ଦ୍ବାରା ହତାଶ ହେବା ପରେ ଶେଷରେ ନିଜେ ରାସ୍ତା ନିର୍ମାଣ କରିବାକୁ ଅଣ୍ଟା ଭିଡିଛନ୍ତି ଗାଁର ଛୁଆଠୁ ବୁଢା । ଗାଁକୁ ରାସ୍ତାଟିଏ ନଥିବାରୁ ଯାତାୟତରେ ଅସୁବିଧା ସାଙ୍ଗକୁ ଅତ୍ୟାବଶ୍ୟକ ସ୍ଥଳେ ଆମ୍ବୁଲାନ୍ସ ସେବା ବି ଗ୍ରାମବାସୀଙ୍କୁ ମିଳିପାରୁ ନାହିଁ । ପିଲାମାନେ ସ୍କୁଲ ଯିବା ପାଇଁ ମଧ୍ୟ ଭୋଗୁଛନ୍ତି ନାହିଁ ନଥିବା ଅସୁବିଧା ।
ଏତେ ସବୁ ଅସୁବିଧାରୁ ଥକିଯାଇ ଶେଷରେ ନିଜେ ମାଟି ଆଣି ରାସ୍ତା କାମ ଆରମ୍ଭ କରିଛନ୍ତି ଗ୍ରାମବାସୀ । କେବଳ ସେତିକି ନୁହେଁ ନିଜସ୍ବ ଖର୍ଚ୍ଚରେ ବି ଏପରି ଏକ କାର୍ଯ୍ୟ ଆରମ୍ଭ କରିଥିବାରୁ ଏବେ ଅନ୍ୟଙ୍କ ପାଇଁ ଉଦାହରଣ ପାଲଟିଛନ୍ତି ଏହି ଗ୍ରାମବାସୀ ।
ଖୋର୍ଦ୍ଧାରୁ ଗୋବିନ୍ଦଚନ୍ଦ୍ର ପଣ୍ଡା, ଇଟିଭି ଭାରତ
