ଖୋର୍ଦ୍ଧା: ମହଙ୍ଗା ପଡିଲା ଗାଡ଼ି ଚୋରି ନିଶା । ସ୍ଥାନୀୟ ଲୋକଙ୍କ ହାତରେ ଧରା ପଡି ନିର୍ଧୁମ ଛେଚା ଖାଇଲେ ଦୁଇ ଯୁବକ । ଘଟଣାଟି ହେଉଛି ନୟାଗଡ଼ ଜିଲ୍ଲା ଖଣ୍ଡପଡା ଥାନା ଘଣାସାଳିଆ ଗାଁରେ । ସୂଚନା ଅନୁଯାୟୀ ଶନିବାର ଦୁଇ ଜଣ ଯୁବକ ଘଣାସାଳିଆ ଗାଁର ଶ୍ରୀକାନ୍ତ ରାଉତଙ୍କ ପିକଅପ ଭ୍ୟାନରୁ କିଛି ଯନ୍ତ୍ରପାତି ଚୋରି କରୁଥିବା ବେଳେ ସ୍ଥାନୀୟ ଲୋକମାନେ ଉଭୟଙ୍କୁ କାବୁ କରିଥିଲେ । ପରେ ସେମାନଙ୍କୁ ଗଛରେ ବାନ୍ଧି ନିସ୍ତୁକ ମାଡ଼ ମାରିଥିଲେ ।
ଗାଡି ଚୋରି କରି ଗ୍ରାମବାସୀଙ୍କ ଆକ୍ରୋଶର ଶିକାର ହେଲେ ଯୁବକ
ପୋଲିସ ଯୁବକ ଦୁହିଁଙ୍କୁ ଗାଁ ଲୋକଙ୍କ ପାଖରୁ ଉଦ୍ଧାର କରି ଚିକିତ୍ସା ପାଇଁ ମେଡ଼ିକାଲରେ ଭର୍ତ୍ତି କରିଛି । ଉଦ୍ଧାର ଯୁବକ ଦ୍ବୟ ହେଲେ ଫତେଗଡ଼ ଥାନା କରବର ଗାଁର ନାରାୟଣ ଜେନା ଓ ବେଣୁଧର ପଢ଼ିଆରୀ । ସେମାନଙ୍କଠାରୁ ପୋଲିସ ଏକ ନମ୍ବରବିହୀନ ମୋଟର ସାଇକେଲ, ମୋବାଇଲ ଫୋନ ଓ ଛୁରୀ ସହ ପେଚକସ ଆଦି ଜବତ କରିଛି । ତେବେ ଏନେଇ ଖଣ୍ଡପଡା ପୋଲିସ ଏକ ମାମଲା ରୁଜୁ କରି ତଦନ୍ତ ଚଳାଇଥିବା ଖଣ୍ଡପଡା ଏସଡିପିଓ ସୂଚନା ଦେଇଛନ୍ତି ।
ଖୋର୍ଦ୍ଧାରୁ ଗୋବିନ୍ଦ ଚନ୍ଦ୍ର ପଣ୍ଡା, ଇଟିଭି ଭାରତ
