ଭୁବନେଶ୍ବର: ନୂଆ ଜାତୀୟ ଶିକ୍ଷାନୀତିକୁ ୩ ବର୍ଷ ପୂରଣ ହୋଇଛି । ଭାରତକୁ ବିଶ୍ୱ ଗୁରୁ କରିବା ପାଇଁ ଏହା ଶିକ୍ଷା କ୍ଷେତ୍ରରେ ଏକ ଅଂଶ । ଓଡ଼ିଶାରେ ୬୭ଟି କେନ୍ଦ୍ରୀୟ ବିଦ୍ୟାଳୟ ଅଛି । ପୁରା ଦେଶରେ ୧୦୫୩ଟି ସ୍କୁଲ ରହିଛି । କେନ୍ଦ୍ରୀୟ ବିଦ୍ୟାଳୟ ଗୁଡିକରେ ନୂଆ ଜାତୀୟ ଶିକ୍ଷାନୀତି ୨୦୨୧ରୁ ଧୀରେ ଧୀରେ ଲାଗୁ କରାଯାଉଛି । ୬ ବର୍ଷରୁ ଅଧିକ ହେଲେ ପ୍ରଥମ କ୍ଲାସ ନାମ ଲେଖାଉଛନ୍ତି । ପର୍ଯ୍ୟାୟ କ୍ରମେ ଛାତ୍ରଛାତ୍ରୀ ମଧ୍ୟ ଏନଇପିର ଗୁରୁତ୍ୱ ବୁଝିଲେଣି । ଛାତ୍ରଛାତ୍ରୀଙ୍କ ଭିତରେ ବିକାଶ କରିବା ପାଇଁ ଏଥିରେ ପ୍ରୟାସ କରାଯାଉଛି । ନୂଆ ଜାତୀୟ ଶିକ୍ଷା ନୀତି-୨୦୨୦ର ତୃତୀୟ ବାର୍ଷିକୀ ଉପରେ ଏକ ଆଲୋଚନା ଚକ୍ର ଆୟୋଜିତ ହୋଇଥିଲା । ଏହି କାର୍ଯ୍ୟକ୍ରମରେ ସେଣ୍ଟ୍ରାଲ ବିଶ୍ୱବିଦ୍ୟାଳୟ କୋରାପୁଟର କୁଳପତି ଆଇଆଇଟି ପ୍ରଫେସରଙ୍କ ସମେତ କେନ୍ଦ୍ରୀୟ ବିଦ୍ୟାଳୟ ସଂଗଠନ ମାନଙ୍କର କର୍ମକର୍ତ୍ତା ମାନେ ଉପସ୍ଥିତ ରହିଥିଲେ । ଓଡ଼ିଶାର ସମସ୍ତ ସ୍କୁଲରେ କିଭଳି ଶତ ପ୍ରତିଶତ ନୂଆ ଜାତୀୟ ଶିକ୍ଷାନୀତି ଲାଗୁ କରି ହେବ ତାହା ଉପରେ ଚର୍ଚ୍ଚା ହୋଇଥିଲା ।
ଜାତୀୟ ଶିକ୍ଷା ନୀତି ୨୦୨୦ର ତୃତୀୟ ବର୍ଷ ପୂର୍ତ୍ତିରେ ଓଡ଼ିଶାରେ ଗ୍ରହଣ କରାଯାଇଥିବା ପଦକ୍ଷେପ ବିଷୟବସ୍ତୁକୁ ନେଇ ସମ୍ମିଳନୀ ଅନୁଷ୍ଠିତ ହୋଇଥିଲା । ସାମ୍ବାଦିକ ସମ୍ମିଳନୀରେ ଆଇଆଇଟି ଭୁବନେଶ୍ୱରର ନିର୍ଦ୍ଦେଶକ ପ୍ରଫେସର ଶ୍ରୀପଦ କର୍ମାଲକର କହିଛନ୍ତି ଯେ,''ଜାତୀୟ ଶିକ୍ଷା ନୀତି ଭାରତକୁ ଏକ ଜୀବନ୍ତ ଜ୍ଞାନ ଆଧାରିତ ସମାଜ ଓ ବିଶ୍ୱ ଗୁରୁ ଭାବେ ରୂପାନ୍ତରିତ କରିବ । ଏନଇପି ଛାତ୍ରଛାତ୍ରୀଙ୍କ ଅଭିନବ କ୍ଷମତାକୁ ଉଜାଗର କରି ଗୁରୁତ୍ୱପୂର୍ଣ୍ଣ ବିଚାର, ବୈଜ୍ଞାନିକ ମନୋଭାବ, ବାସ୍ତବ ଅଧ୍ୟୟନକୁ ପ୍ରୋତ୍ସାହିତ କରିଛି । ଏନଇପିର ପରିକଳ୍ପନା ଅନୁଯାୟୀ, ଆଇଆଇଟି ଭୁବନେଶ୍ୱର ଛାତ୍ରଛାତ୍ରୀଙ୍କୁ ଆତ୍ମନିର୍ଭରଶୀଳ କରିବା ଲାଗି ବହୁବିଷୟକ ଶିକ୍ଷାକୁ ପ୍ରୋତ୍ସାହନ ମିଳିବ ।''
ଗଣମାଧ୍ୟମକୁ ସୂଚନା ଦେଇ କେନ୍ଦ୍ରୀୟ ବିଶ୍ୱବିଦ୍ୟାଳୟ ଓଡ଼ିଶାର କୁଳପତି ପ୍ରଫେସର ଚକ୍ରଧର ତ୍ରିପାଠୀ କହିଛନ୍ତି ଯେ, କୋରାପୁଟ ସ୍ଥିତ କେନ୍ଦ୍ରୀୟ ବିଶ୍ୱବିଦ୍ୟାଳୟ ପରିସରରେ ଏକ ଭାଷା ପାଠାଗାର ପ୍ରତିଷ୍ଠା କରାଯାଇଛି । ଭାଷାକୁ ନେଇ ଗବେଷଣା ଜାରି ରହିଥିବା ବେଳେ ଭାରତୀୟ ଜ୍ଞାନ ବ୍ୟବସ୍ଥା, ଭାଷା, ସଂସ୍କୃତି, ଦେଶାତ୍ମବୋଧ ଓ ମୂଲ୍ୟବୋଧ ଉପରେ ଗୁରୁତ୍ୱାରୋପ କରାଯାଉଛି । ଓଡ଼ିଆ ସାହିତ୍ୟ ଗ୍ରନ୍ଥକୁ ଇଂରାଜୀ ଓ ହିନ୍ଦୀ ଭାଷାରେ ଅନୁବାଦ କରିବା କାର୍ଯ୍ୟ ଜାରି ରହିଛି । ଆଞ୍ଚଳିକ ଭାଷାରେ ବିଷୟବସ୍ତୁ ପ୍ରସ୍ତୁତ କରିବା ଲାଗି କେନ୍ଦ୍ରୀୟ ବିଶ୍ୱବିଦ୍ୟାଳୟ ଓଡ଼ିଶା ନିଷ୍ପତ୍ତି ନେଇଛି । କୋରାପୁଟ ଜିଲ୍ଲାରେ କଥିତ କୁଇ ଓ ଦେଶିଆ ଭାଷାରେ ବହି ପ୍ରକାଶ କରିବା ପାଇଁ ମଧ୍ୟ ପ୍ରୟାସ କରାଯାଉଛି ।''
