ଖୋର୍ଦ୍ଧା: ବୋଲଗଡ ବ୍ଲକ ଅସରଳା ଗ୍ରାମରେ ଚୋରଙ୍କ ଆତଙ୍କ । ଗୋଟିଏ କି ଦୁଇଟି ନୁହେଁ 5ଟି ସ୍ଥାନରେ ଦେଖିବାକୁ ମିଳିଛି ଚୋରଙ୍କ ଉତ୍ପାତ । ଝିଅ ବାହାଘର ପାଇଁ ରଖାଯାଇଥିବା ନଗଦ ଲକ୍ଷେ ଟଙ୍କାର ସୁନାଗହଣା ଚୋରି ହୋଇଥିବା ବେଳେ ଅନ୍ୟ ଏକ ସ୍ଥାନରୁ ଆଲମିରା ଭାଙ୍ଗି ଚୋରି ଉଦ୍ୟମ କରୁଥିବାର ଅଭିଯୋଗ ହୋଇଛି।
ସୂଚନାଯୋଗ୍ୟ, ସୋମବାର ମଧ୍ୟ ରାତିରେ ଉକ୍ତ ଗ୍ରାମର ବଂଶୀ ସ୍ବାଇଁଙ୍କ ତାଙ୍କ ଝିଅ ବାହାଘର ପାଇଁ ରଖିଥିବା ନଗଦ ଲକ୍ଷେ ଟଙ୍କାର ସୁନାଗହଣା ଚୋରି କରିଥିବା ବେଳେ ସୁର ମିଶ୍ରଙ୍କ ଆଲମିରା ଭାଙ୍ଗି 5000ଟଙ୍କା ନେବାକୁ ଉଦ୍ୟମ କରିଥିଲେ ଚୋର । ହେଲେ ପରିବାରଲୋକଙ୍କ ନିଦ ଭାଙ୍ଗିଯିବାରୁ ଫେରାର ହୋଇଥିଲେ ଅଭିଯୁକ୍ତ ।
ସେହିପରି ଲକ୍ଷଣ ପ୍ରଧାନ, ବାବାଜୀ ପାଇକରାୟ, ପବନା ବଳିୟାର ସିଂ ଓ ଭୁଜ ସାମନ୍ତରାୟଙ୍କ ଘରେ ରାତିରେ ଚୋର ପସି ଉତ୍ପାତ କରିଥିବା ଜଣାପଡିଛି । ଫଳରେ ଗାଁରେ ଭୟର ପରିବେଶ ସୃଷ୍ଟି ହୋଇଥିବା ବେଳେ ପୋଲିସ ପକ୍ଷରୁ ପାଟ୍ରୋଲିଂ ପାଇଁ ଗ୍ରାମବାସୀମାନେ ଦାବି କରିଛନ୍ତି ।
ଖୋର୍ଦ୍ଧାରୁ ଗୋବିନ୍ଦ ଚନ୍ଦ୍ର ପଣ୍ଡା, ଇଟିଭି ଭାରତ
