ଖୋର୍ଦ୍ଧା: ବୋଲଗଡ ବ୍ଳକ ସାନପଦର ପଞ୍ଚାୟତର ସାନପଦର ସାନପାଟଣା ସାହିର ଜଣେ ୨୦ ବର୍ଷୀୟ ଗଞ୍ଜାମ ଫେରନ୍ତା ଯୁବକଙ୍କୁ କୋରୋନା ପଜିଟିଭ ଚିହ୍ନଟ ପରେ ସୋମବାର ଉକ୍ତ ଗ୍ରାମକୁ କଣ୍ଟେନମେଣ୍ଟ ଜୋନ ଭାବେ ଘୋଷଣା କରିଛି ଜିଲ୍ଲା ପ୍ରଶାସନ ।
ଜନସାଧାରଣ ବୃହତ୍ତର ସ୍ବାର୍ଥ ଦୃଷ୍ଟିରୁ ଗୋଷ୍ଠୀ ସଂକ୍ରମଣ ପ୍ରତିହତ କରିବା ପାଇଁ ଏଭଳି ପଦକ୍ଷେପ ନିଆଯାଇଛି । ଏହି ଦୁଇ ସାହିର ବାସିନ୍ଦାମାନେ କୋଭିଡ-୧୯ ନିୟମ ଅନୁଯାୟୀ ସୋମବାର ଠାରୁ ଗୁରୁବାର ଅପରାହ୍ନ ପର୍ଯ୍ୟନ୍ତ ଘର ବାହାରକୁ ନଯିବା ସହିତ ବାହାର ଲୋକଙ୍କୁ ଉକ୍ତ ଅଞ୍ଚଳକୁ ପ୍ରବେଶ ନକରିବାକୁ ପ୍ରଶାସନ ପକ୍ଷରୁ ସୂଚନା ଦିଆଯାଇଛି ।
ଏଥିପାଇଁ ପ୍ରଶାସନ ପକ୍ଷରୁ ବିଭିନ୍ନ ପଦକ୍ଷେପ ନେବା ପାଇଁ ପାଞ୍ଚଟି ଟିମ ଗଠନ କରାଯାଇଛି । ସେହିପରି ସମସ୍ତ ଟିମର କାର୍ଯ୍ୟକ୍ରମକୁ ତଦାରଖ କରିବା ପାଇଁ ବୋଲଗଡ ତହସିଲଦାର ମୋନାଲିସା ପଣ୍ଡାଙ୍କୁ ଦାୟିତ୍ବ ଦିଆଯାଇଥିବା ଜିଲ୍ଲା ପ୍ରଶାସନ ପକ୍ଷରୁ ସୂଚନା ମିଳିଛି ।
ଖୋର୍ଦ୍ଧାରୁ ଗୋବିନ୍ଦ ଚନ୍ଦ୍ର ପଣ୍ଡା, ଇଟିଭି ଭାରତ
