ସ୍ୱଚ୍ଛତା ହିଁ ସେବା: ଭୁବନେଶ୍ବରରେ ସଫେଇ କଲେ ବିଜେପି ନେତା, ସାମିଲ ହେଲେ ସବୁ ବର୍ଗର ଲୋକେ

ଆଜି ଦେଶ ପାଳିଛି 'ସ୍ୱଚ୍ଛତା ହିଁ ସେବା' ଅଭିଯାନ । ଭୁବନେଶ୍ବରରେ ବିଜେପି ନେତାମାନେ ହାତରେ ଝାଡୁ ଧରି ସଫେଇ କରିଥିବା ଦେଖିବାକୁ ମିଳିଛି । ଅଧିକ ପଢନ୍ତୁ

ଭୁବନେଶ୍ବର: ଆଜି ଦେଶ ପାଳିଛି 'ସ୍ୱଚ୍ଛତା ହିଁ ସେବା' ଅଭିଯାନ । ନିଜେ ହାତରେ ଝାଡୁ ଧରି ସଫେଇ କରିଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । ଗାନ୍ଧୀ ଜୟନ୍ତୀ ପୂର୍ବରୁ ସାରା ଦେଶରେ ସ୍ୱଚ୍ଛତା ଅଭିଯାନ କରାଯାଇଛି । ଏହି ପରିପ୍ରେକ୍ଷୀରେ ଆଜି ଦେଶ ସାରା 'ସ୍ଵଚ୍ଛତା ହିଁ ସେବା ଅଭିଯାନ' ପାଳନ କରାଯାଇଛି । ସେହିପରି ଭୁବନେଶ୍ଵରରେ ଲିଙ୍ଗରାଜ ମନ୍ଦିର ନିକଟରେ ବିଜେପିର ପୂର୍ବତନ ସଭାପତି ସମୀର ମହାନ୍ତି ନିଜେ ଝାଡୁ ଧରି ସଫେଇ କରିଥିବା ଦେଖିବାକୁ ମିଳିଛି । ଏହାସହିତ ବିଜେପି ସାଂସଦ ଅପରାଜିତା ଷଡଙ୍ଗୀ ମଧ୍ୟ ଏହି କାର୍ଯ୍ୟକ୍ରମରେ ଯୋଗ ଦେଇଥିଲେ ।

ଓଡ଼ିଶାର ସବୁ ଜିଲ୍ଲାରେ ବିଜେପି ନେତାମାନେ ଏହାକୁ ପାଳନ କରିଛନ୍ତି । ସେହିପରି ସାଂସଦ ଜୁଏଲ ଓରାମ ଲୁମ୍ବିନୀ ବିହାର ଏବଂ ବିଜେପି ରାଜ୍ୟ ସଭାପତି ମନମୋହନ ସାମଲ ଆଇଡି ମାର୍କେଟରେ ପାଳନ କରିଛନ୍ତି 'ସ୍ଵଚ୍ଛତା ହିଁ ସେବା ଅଭିଯାନ' । ମନମୋହନ ସାମଲ କହିଛନ୍ତି, "ପ୍ରଧାନମନ୍ତ୍ରୀଙ୍କ ଆହ୍ଵାନ କ୍ରମେ ଆଜି ସାରା ଦେଶରେ ଏହି ଦିବସ ପାଳନର ନିଷ୍ପତ୍ତି ନିଆଯାଇଛି । ଏହି କାର୍ଯ୍ୟକ୍ରମରେ ସମାଜରେ ସବୁ ବର୍ଗର ଲୋକମାନେ ସାମିଲ ହୋଇଥିଲେ । ଏହା ଏକ ଜନ ଆନ୍ଦୋଳନରେ ପରିଣତ ହୋଇଛି । ପ୍ରଧାନମନ୍ତ୍ରୀଙ୍କ ନେତୃତ୍ଵ ସାରା ଦେଶକୁ ପ୍ରଭାବିତ କରିଛି।"

ସେପଟେ ହାତରେ ଝାଡ଼ୁ ଧରି, ଗ୍ଲୋବସ ପିନ୍ଧି ଛାତ୍ରଛାତ୍ରୀଙ୍କ ସହ ମିଶି ସ୍ୱଚ୍ଛତା ଅଭିଯାନରେ ସାମିଲ ହୋଇଛନ୍ତି କେନ୍ଦ୍ର ଶିକ୍ଷାମନ୍ତ୍ରୀ ଧର୍ମେନ୍ଦ୍ର ପ୍ରଧାନ । ସ୍ୱଚ୍ଛ ଭାରତ ଅଭିଯାନର ୯ ବର୍ଷ ପୂର୍ତ୍ତି ଅବସରରେ 'ସ୍ଵଚ୍ଛତା ହିଁ ସେବା ଅଭିଯାନ' ପାଳିତ ହୋଇଛି । ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଆହ୍ୱାନ କ୍ରମେ ସ୍ୱଚ୍ଛତା ପାଇଁ ୧ ଘଣ୍ଟା ସାମୂହିକ ଶ୍ରମଦାନ କରିଛନ୍ତି ଜନତା । ଦିନ ୧୦ଟାରୁ ୧୧ ଯାଏଁ ନିଜ ନିଜ ଅଞ୍ଚଳରେ ସ୍ୱଚ୍ଛତା ରକ୍ଷା ପାଇଁ ଘଣ୍ଟାଏ ଶ୍ରମଦାନ କରିବାକୁ ଦେଶବାସୀଙ୍କୁ ଗତ 'ମନ୍ କି ବାତ୍'ରେ ଅପିଲ କରିଥିଲେ ପ୍ରଧାନମନ୍ତ୍ରୀ । ତେବେ ରାଜ୍ୟ ସମେତ ଦେଶବ୍ୟାପୀ ଏହି ଅଭିଯାନ ପାଳନ ହୋଇଛି । ବିଭିନ୍ନ ବର୍ଗର ଲୋକେ ସାମିଲ ହୋଇ ସ୍ବଚ୍ଛ ଓ ନିର୍ମଳ ପରିବେଶର ବାର୍ତ୍ତା ଦେବା ପାଇଁ ସଫେଇ କରିଛନ୍ତି । ସ୍ବଚ୍ଛ ଭାରତ ଅଭିଯାନକୁ 9 ବର୍ଷ ପୂର୍ତ୍ତି ହୋଇଥିବାବେଳେ ଦେଶବାସୀଙ୍କ ମଧ୍ୟରେ ସ୍ବଚ୍ଛତାର ପ୍ରତିଫଳନ ଦେଖିବାକୁ ମିଳିଛି।

ଇଟିଭି ଭାରତ, ଭୁବନେଶ୍ବର