ଭୁବନେଶ୍ବର: ପଶ୍ଚିମ ଓଡିଶାରେ କେବେ ପ୍ରତିଷ୍ଠା ହେବ ହାଇକୋର୍ଟର ସ୍ଥାୟୀ ବେଞ୍ଚ ? ଏନେଇ ବାରମ୍ବାର ଦାବି ହେଉଥିଲେ ବି ପ୍ରକ୍ରିୟା ଆଗକୁ ବଢ଼ିବାର ନାଁ ନେଉନାହିଁ । କେନ୍ଦ୍ର-ରାଜ୍ୟ ପରସ୍ପରଙ୍କ କୋର୍ଟକୁ ବଲ ଫିଙ୍ଗାଫିଙ୍ଗି ଭିତରେ ଅଟକିଛି ଦାବି । ପଶ୍ଚିମ ଓଡିଶାରେ ହାଇକୋର୍ଟ ବେଞ୍ଚ ପ୍ରତିଷ୍ଠା ପାଇଁ ରାଜ୍ୟ ସରକାର ପୂର୍ଣ୍ଣାଙ୍ଗ ପ୍ରସ୍ତାବ ଦେଇନଥିବା ସୂଚନା ମିଳିଛି । ବର୍ତ୍ତମାନ କୌଣସି ରାଜ୍ୟରୁ ହାଇକୋର୍ଟ ବେଞ୍ଚ ପ୍ରତିଷ୍ଠା ନେଇ ପୂର୍ଣ୍ଣାଙ୍ଗ ପ୍ରସ୍ତାବ ଆସିନାହିଁ । ବିଜେଡି ସାଂସଦ ସସ୍ମିତ ପାତ୍ରଙ୍କ ପ୍ରଶ୍ନର ଲିଖିତ ଉତ୍ତରରେ ଏହା କହିଛନ୍ତି କେନ୍ଦ୍ର ଆଇନ ମନ୍ତ୍ରୀ ଅର୍ଜୁନ ରାମ ମେଘୱାଲ । ସେ କହିଛନ୍ତି ଯେ, ବେଞ୍ଚ ପ୍ରତିଷ୍ଠା ପାଇଁ ସମ୍ପୃକ୍ତ ରାଜ୍ୟର ହାଇକୋର୍ଟ ମୁଖ୍ୟ ବିଚାରପତିଙ୍କ ସମ୍ମତି ସହ ରାଜ୍ୟପାଳଙ୍କ ଦେଇ ପ୍ରସ୍ତାବ ଆସିବା ଦରକାର । ୨୦୧୯ରେ ଜଲପାଇଗୁଡ଼ିରେ କଲିକତା ହାଇକୋର୍ଟର ସର୍କିଟ ବେଞ୍ଚ ପ୍ରତିଷ୍ଠା ହୋଇଥିଲା । ଏହାକୁ ରାଜ୍ୟ ରାଜନୀତି ସରଗରମ ହୋଇଛି ।
କଂଗ୍ରେସର ବରିଷ୍ଠ ବିଧାୟକ ନରସିଂହ ମିଶ୍ର କହିଛନ୍ତି,‘‘ପଶ୍ଚିମ ଓଡିଶାରେ ହାଇକୋର୍ଟ ବେଞ୍ଚ ପାଇଁ ରାଜ୍ୟ ସରକାର ପ୍ରସ୍ତାବ ଦେଇଛନ୍ତି । କିନ୍ତୁ ନିୟମ ଅନୁସାରେ ଦେଇ ନାହାନ୍ତି । ଆଇନ ଅନୁସାରେ ପ୍ରସ୍ତାବ ନଦେଲେ କେନ୍ଦ୍ର ସରକାର ତାହା ଗ୍ରହଣ କରେନାହିଁ । କପିଲ ଶିବଲ କେନ୍ଦ୍ର ଆଇନ ମନ୍ତ୍ରୀ ଥିବାବେଳେ ସେ ସମୟରେ ରାଜ୍ୟ ସରକାରଙ୍କୁ ଚିଠି ଲେଖିଥିଲେ । ପଶ୍ଚିମ ଓଡିଶା ହାଇକୋର୍ଟର ବେଞ୍ଚ ପ୍ରତିଷ୍ଠା ପାଇଁ ନୀତିଗତ ନିଷ୍ପତ୍ତି ନେଉଛୁ । କିନ୍ତୁ ସୁପ୍ରିମକୋର୍ଟଙ୍କ ଜଜମେଣ୍ଟ ଅନୁସାରେ ରାଜ୍ୟ ଦରଖାସ୍ତ କରୁ । କେଉଁ ସ୍ଥାନରେ ବେଞ୍ଚ ପ୍ରତିଷ୍ଠା ହେବ, କଣ ସୁବିଧା ଅସୁବିଧା ଅଛି, ଖର୍ଚ୍ଚ ବହନ କରିବେ ନା ନାହିଁ । ରାଜ୍ୟ ସରକାର ସେଥିପାଇଁ କମିଶନ ବସାଇଥିଲେ । ପାଲ କମିଶନରେ କଣ ଲେଖା ଗଲା ଜଣାପଡିଲା ନାହିଁ । ତାକୁ ସରକାର ଦବେଇ ଦେଲେ । ଦାବି ଦାବି ହୋଇ ରହିଗଲା । ଯେଉଁଥି ପାଇଁ ପଶ୍ଚିମ ଓଡିଶାବାସୀ କ୍ଷୁବ୍ଧ । କିନ୍ତୁ କେନ୍ଦ୍ର ସରକାର ଚାହିଁଥିଲେ ଓଡିଶା ସରକାର ଉପରେ ଚାପ ପକେଇଥାନ୍ତେ । ରିପୋର୍ଟ ନେଇଥାନ୍ତେ ।’’
ସେହିପରି ବିଜେପି ନେତା ପ୍ରଦୀପ ପୁରୋହିତ କହିଛନ୍ତି, ‘‘ପଶ୍ଚିମ ଓଡ଼ିଶାରେ ହାଇକୋର୍ଟର ସ୍ବତନ୍ତ୍ର ବେଞ୍ଚ ପ୍ରତିଷ୍ଠାକୁ ବିଜେଡି ସରକାର ଚାହୁଁନାହାନ୍ତି । ଯଦି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କର ପଶ୍ଚିମ ଓଡିଶା ବାସୀଙ୍କ ପ୍ରତି ଆନ୍ତରିକତା ଥାନ୍ତା, କେବେ ଠାରୁ ବେଞ୍ଚ ପ୍ରତିଷ୍ଠା ହୋଇସାରନ୍ତାଣି । ଜଶବନ୍ତ କମିଶନଙ୍କ ରିପୋର୍ଟ ଆଧାରରେ ବିଭିନ୍ନ ରାଜ୍ୟରେ ହାଇକୋର୍ଟର ବେଞ୍ଚ ପ୍ରତିଷ୍ଠା ହେଉଛି । ବିଭିନ୍ନ ସମୟରେ ବିଜେଡି ସାଂସଦ ପଚାରିଥିବା ପ୍ରଶ୍ନରେ କେନ୍ଦ୍ରମନ୍ତ୍ରୀ ଉତ୍ତର ରଖି ସାରିଛନ୍ତି । ଆଇନ ମନ୍ତ୍ରଣାଳୟ ଅନେକ ଥର ଓଡିଶା ସରକାର ମଧ୍ୟ ଚିଠି କରିଛନ୍ତି । ହାଇକୋର୍ଟଙ୍କ ସହ ବିଚାର ବିମର୍ଷ କରି ଏକ ପୂର୍ଣ୍ଣାଙ୍ଗ ରିପୋର୍ଟ ଦେବାକୁ କୁହାଯାଇଛି । ହେଲେ ଏଯାଏଁ ରିପୋର୍ଟ ଦେଲେ ନାହିଁ । ପଶ୍ଚିମ ଓଡିଶାର ଲୋକଙ୍କୁ କେବଳ ଭକୁଆ ବନେଇ ଚାଲିଛନ୍ତି ।’’
ଅଭିଯୋଗର ଜବାବ ରଖିଛନ୍ତି ବିଜେଡି ବିଧାୟକ ରାଜକିଶୋର ଦାସ । ସେ କହିଛନ୍ତି, ‘‘କେନ୍ଦ୍ର ସରକାର ସବୁକଥାରେ ଟାଳଟୁଳ ନୀତି ଅବଲମ୍ବନ କରୁଛନ୍ତି । ଗୋଟେ କଥାକୁ ତୋଡିମୋଡି କହିବା । ନିଜ ଉପରକୁ ଦୋଷ ନଆଣି ଅନ୍ୟ ଉପରେ ଠେଲିବା । ରାଜ୍ୟ ଏଇୟା କଲା, ସେଇୟା କଲା କହିବା । କେନ୍ଦ୍ର ବାସ୍ତବରେ ନିଷ୍ପତ୍ତି ନେବା ଦରକାର । ନିଶ୍ଚିତ ଭାବେ ରାଜ୍ୟ କୋର୍ଟକୁ କେନ୍ଦ୍ର ବଲ ଫିଙ୍ଗୁଛି । ତାଙ୍କ ନିଷ୍ପତ୍ତି ସେ ନନେଇ ରାଜ୍ୟ କଲାନାହିଁ’’ ବୋଲି କହୁଛନ୍ତି ।
ଇଟିଭି ଭାରତ, ଭୁବନେଶ୍ବର
