ୟୁନିଟ-୧ ମାର୍କେଟକୁ ଅନିର୍ଦ୍ଦିଷ୍ଟ କାଳ ପାଇଁ ବନ୍ଦ କଲା ବ୍ୟବସାୟୀ ସଂଘ, ପାର୍କିଂ ସମସ୍ୟାର ସମାଧାନ ଦାବି

ପାର୍କିଂ ବ୍ୟବସ୍ଥାର ସୁବିଧା ନହେବାରୁ ୟୁନିଟ୍ ୧ ମାର୍କେଟ ବନ୍ଦ କରି ଆନ୍ଦୋଳନକୁ ଓହ୍ଲାଇଛନ୍ତି ବ୍ୟବସାୟୀ ସଂଘ । ପାର୍କିଂ ସମସ୍ୟାକୁ ବ୍ୟବସାୟୀ ସଂଘ ଓ ଉଠାଦୋକାନୀଙ୍କ ମଧ୍ୟରେ ଲାଗି ରହିଛି ବିବାଦ । ଅଧିକ ପଢନ୍ତୁ

ଭୁବନେଶ୍ବର: ବନ୍ଦ ରହିଛି ୟୁନିଟ ୧ ମାର୍କେଟ । ଧାରଣାରେ ବସିରହିଛନ୍ତି ରାଜଧାନୀ ଦୈନିକ ମାର୍କେଟ ବ୍ୟବସାୟୀ । ପାର୍କିଂ ବ୍ୟବସ୍ଥାର ସୁବିଧା ନହେବାରୁ ୭ ଦଫା ଦାବିକୁ ନେଇ ଅନିର୍ଦ୍ଦିଷ୍ଟ କାଳ ପାଇଁ ସମ୍ପୂର୍ଣ୍ଣ ମାର୍କେଟକୁ ବନ୍ଦ କରି ଆନ୍ଦୋଳନକୁ ଓହ୍ଲାଇଛି ବ୍ୟବସାୟୀ ସଂଘ । ତେବେ ପାର୍କିଂ ସମସ୍ୟାକୁ ନେଇ ଗତ ଗୁରୁବାର ଦିନ ୟୁନିଟ ୧ ମାର୍କେଟ ବ୍ୟବସାୟୀ ଓ ଉଠାଦୋକାନୀଙ୍କ ମଧ୍ୟରେ କଥା କଟା କାଟି ହୋଇଥିଲା । ଏହାର ସ୍ଥାୟୀ ସମାଧାନକୁ ନେଇ ଗତକାଲି ବିଏମ୍ସି କମିଶନରଙ୍କ ସହ ଆଲୋଚନା ବିଫଳ ହେବ ପରେ ଆଜିଠାରୁ ଧାରଣାରେ ବସି ରହିଛନ୍ତି ଶତାଧିକ ବ୍ୟବସାୟୀ ।

ୟୁନିଟ-1 ବ୍ୟବସାୟୀ ସଂଘ ସଭାପତି ଗୟାଧର ସ୍ୱାଇଁ କହିଛନ୍ତି,‘‘ ଉଠାଦୋକାନୀଙ୍କ ପାଇଁ ମାର୍କେଟରେ ପାର୍କିଂ ସମସ୍ୟା ଦେଖାଦେଇଛି । ଅନୁମତି ଦିଆଯାଇଥିବା ଭେଣ୍ଡିଙ୍ଗ ଜୋନରୁ ଅଧିକ ଜାଗା ମାଡ଼ି ବସି ବ୍ୟବସାୟ କରୁଥିବାରୁ ଭିଡ ଜମୁଛି । ପାର୍କିଂ ସମସ୍ୟା ପାଇଁ ସାମଗ୍ରୀ କିଣିବାକୁ ଆସୁଥିବା ଲୋକମାନେ ଅସୁବିଧାରେ ପଡୁଛନ୍ତି । ହଜାର ହଜାର ଟଙ୍କାର ଜରିମାନା ଗ୍ରାହକଙ୍କର କଟୁଛି । ତେଣୁ ମାର୍କେଟରୁ ଉଠାଦୋକାନୀ ବା ଭେଣ୍ଡିଙ୍ଗ ଜୋନକୁ ଉଠାନ୍ତୁ ବୋଲି ଦାବି କରିଛନ୍ତି । କାରଣ ଉଠାଦୋକାନୀଙ୍କ ଭୁଲ ପାଇଁ ଏଠାରେ ଟ୍ରାଫିକ ଜମା ହେବାରୁ ବିଏମ୍ସି ଏହାକୁ ନୋ ପାର୍କିଂ ଜୋନ କରିଦେଇଛି । ଏହାସହ ଗ୍ରହକାଙ୍କ ପାଇଁ ଯେଉଁ ଭୂତଳ ପାର୍କିଂ ହେଉଛି ତାହାକୁ ଆମେ ସ୍ୱାଗତ କରୁଛୁ । କିନ୍ତୁ ତାକୁ ନେଇ ଅନେକ ସମସ୍ୟା ଦେଖାଦେଇଛି । ଯେଉଁମାନେ ସେଠାରେ ଗାଡି ରଖିବେ ସେମାନଙ୍କର ହାଟକୁ ଆସିବା ପାଇଁ କୌଣସି ବ୍ୟବସ୍ଥା ବା ରାସ୍ତା ନାହିଁ । ଯାହା ଫଳରେ ଗ୍ରାହକଙ୍କ ସଂଖ୍ୟା କମିବାରେ ଲାଗିଛି ।’’

ଅନ୍ୟପଟେ ଏକ ନମ୍ବର ହାଟ ବନ୍ଦ ନେଇ ବିଏମସି କମିଶନର ବିଜୟ ଅମୃତ କୁଲାଙ୍ଗେ କହିଛନ୍ତି, ‘‘ୟୁନିଟ ୧ ବ୍ୟବସାୟୀ ଓ ଉଠଦୋକାନୀ ଉଭୟଙ୍କ ସହ ଆଲୋଚନା କରି ଦୁଇ ରୁ ତିନି ଦିନ ଭିତରେ ସାମସ୍ୟା ସମାଧାନ ଦିଗରେ ପଦକ୍ଷେପ ନିଆଯିବ । ବ୍ୟବସାୟୀମାନଙ୍କ ଯେଉଁ ଦାବି ରହିଛି ସେହି ଦାବି ଗୁଡ଼ିକ ଉପରେ ମଧ୍ୟ ଆଲୋଚନା ହେବ। କାରଣ ଏହି ହାଟ ଉପରେ ରାଜଧାନୀର ଅଧିକାଂଶ ଲୋକେ ଦୈନଦିନ ଜୀବନର ସାମଗ୍ରୀ ନେବା ପାଇଁ ନିର୍ଭର କରିଥାନ୍ତି । ତେଣୁ ଏହା ବନ୍ଦ ରହିବାରୁ ଗ୍ରହକାମାନେ ବେଶ ପ୍ରଭାବିତ ହେବେ ।’’

ଇଟିଭି ଭାରତ, ଭୁବନେଶ୍ବର