ଖୋର୍ଦ୍ଧା: ଆଉ ଦୁଇ ଦିନ ପରେ ସାରା ରାଜ୍ୟରେ ଘରେ ଘରେ ପାଳନ ହେବ ଗଣପର୍ବ ରଜ । ଝିଅଙ୍କ ପାଇଁ ଉଦ୍ଦିଷ୍ଟ ଏହି ପର୍ବରେ ସାମୂହିକ କାର୍ଯ୍ୟକ୍ରମ ଓ ପିଠାପଣାର ଆସର ଜମୁଥିବା ବେଳେ ଚଳିତବର୍ଷ କୋରୋନା ମାଡରେ ଫିକା ପଡିବ ରଜ ମଉଜ । ଏନେଇ ଶୁକ୍ରବାର ଠାରୁ ଆସନ୍ତା 20 ତାରିଖ ପର୍ଯ୍ୟନ୍ତ ଖୋର୍ଦ୍ଧା ଉପଖଣ୍ଡରେ 144 ଧାରା ଲାଗୁ କରିଛନ୍ତି ଉପଜିଲ୍ଲାପାଳ ଶାନ୍ତନୁ ମହାନ୍ତି ।
ଏହି ନିର୍ଦ୍ଦେଶ ମୁତାବକ ଖୋର୍ଦ୍ଧା ଉପଖଣ୍ଡ ଅନ୍ତର୍ଗତ ଖୋର୍ଦ୍ଧା, ବେଗୁନିଆ, ବୋଲଗଡ, ଚିଲିକା ଓ ବାଣପୁର ଅଞ୍ଚଳରେ କୌଣସି ରଜ ଉତ୍ସବ ଆୟୋଜନ କରିହେବ ନାହିଁ । ରାଜ୍ୟରେ ବଢୁଥିବା କୋରୋନା ଆକ୍ରାନ୍ତ ସଂଖ୍ୟାକୁ ନଜରରେ ରଖି ଏପରି ନିଷ୍ପତ୍ତି ନେଇଛନ୍ତି ଉପଜିଲ୍ଲାପାଳ । ତେବେ ଆଗକୁ ଗୋଷ୍ଠୀ ସଂକ୍ରମଣର ଭୟକୁ ଏଡାଇବା ପାଇଁ ଏହି ପଦକ୍ଷେପ ଅତି ଜରୁରୀ ବୋଲି ଉପଜିଲ୍ଲାପାଳ ସୂଚନା ଦେଇଛନ୍ତି ।
ଖୋର୍ଦ୍ଧାରୁ ଗୋବିନ୍ଦ ଚନ୍ଦ୍ର ପଣ୍ଡା, ଇଟିଭି ଭାରତ
