ଭୁବନେଶ୍ବର: ରାଜ୍ୟ ସରକାର ଆଣିଛନ୍ତି ନୂଆ ଯୋଜନା ନୂତନ ଉନ୍ନତ ଅଭିଳାଷା ବା NUA ଓଡ଼ିଶା । ଆସନ୍ତା ୩ ବର୍ଷରେ ପ୍ରତିବର୍ଷ ଏକ ଲକ୍ଷ ଯୁବକ ଯୁବତୀଙ୍କୁ ଦକ୍ଷ କରିବାକୁ ଲକ୍ଷ୍ୟ ରଖିଛନ୍ତି ସରକାର । ଏଥିପାଇଁ ୩୮୫ କୋଟି ଟଙ୍କା ବ୍ୟୟ ହେବ । ଉନ୍ନତମାନର ପ୍ରଶିକ୍ଷଣ, ଶିଳ୍ପ ସଂଯୋଗକୁ ପ୍ରୋତ୍ସାହନ ଏବଂ ନିଯୁକ୍ତି ଦକ୍ଷତା ବୃଦ୍ଧି କରିବା ଦିଗରେ ଏହି ଯୋଜନା କାର୍ଯ୍ୟ କରିବ । ରାଜ୍ୟର ୩୦ଟି ଜିଲ୍ଲାରେ ଏହି ଯୋଜନା କାର୍ଯ୍ୟକାରୀ ହେବ । ଦକ୍ଷତା ବିକାଶ ଓ ବୈଷୟିକ ଶିକ୍ଷା ବିଭାଗର ଦକ୍ଷତା ଅନୁଷ୍ଠାନ, ସରକାରୀ ଦକ୍ଷତା ଅନୁଷ୍ଠାନ, ଶିକ୍ଷାନୁଷ୍ଠାନ ମାଧ୍ୟମରେ ଦକ୍ଷତା, Reskilling ଏବଂ Upskilling ସୁଯୋଗ ଯୋଗାଇ ଦିଆଯିବ । ତେବେ ନିର୍ବାଚନକୁ ଦୃଷ୍ଟିରେ ରଖି ଏହି ରାଜ୍ୟ ସରକାର ଏହି ଯୋଜନା କରିଥିବା ଅଭିଯୋଗ କରିଛି କଂଗ୍ରେସ ।
ପିସିସି ସଭାପତି ଶରତ ପଟ୍ଟନାୟକ କହିଛନ୍ତି, "୨୦୧୯ ନିର୍ବାଚନ ପୂର୍ବରୁ ବିଜେଡି ସରକାର ବିଜୁ ଯୁବ ବାହିନୀ ଘୋଷଣା କରିଥିଲେ । ସେଥିପାଇଁ ପ୍ରାୟ ୪୦୦ କୋଟି ଟଙ୍କା ବ୍ୟୟ ବରାଦ କରିଥିଲେ । ନିର୍ବାଚନ ବର୍ଷରେ ପ୍ରାୟ ଶହେ କୋଟି ଟଙ୍କା ଖର୍ଚ୍ଚ କରିଥିଲେ । ନିଯୁକ୍ତି ମିଳିବା ଆଶାରେ ଯୁବବର୍ଗ ମାତିଗଲେ । ନିର୍ବାଚନ ସରିଗଲା, ଯୋଜନା ବନ୍ଦ ହୋଇଗଲା । ସେହି ଯୁବକଙ୍କ ଭବିଷ୍ୟତ କଣ ? ରାଜ୍ୟ ସରକାର ସେମାନଙ୍କୁ ଦରମା ଦେଉଛି କି ?" ଯୁବକମାନଙ୍କର ଭବିଷ୍ୟତ ସହ ଖେଳିବାକୁ ରାଜ୍ୟ ସରକାରଙ୍କୁ କିଏ ଅଧିକାର ଦେଲା ବୋଲି ପ୍ରଶ୍ନ କରିଛନ୍ତି ପିସିସି ସଭାପତି ।
