ଖୋର୍ଦ୍ଧା: ଦିନ ଥିଲା ଯେତେବେଳେ ଠୁଙ୍ଗାର ଚାହିଦା ଅଧିକ ଥିଲା । ସେହି ସମୟରେ ଠୁଙ୍ଗାର ବ୍ୟବସାୟ ମଧ୍ୟ ବେଶ ଚାଲୁଥିଲା । କ୍ରମଶଃ ପଲିଥିନ ଚାହିଦା ବୃଦ୍ଧି ହେବାରୁ ନିଜର ଅସ୍ତିତ୍ବ ହରାଇଥିଲା ଠୁଙ୍ଗା । ଆଉ ଦେଶରେ ପ୍ଲାଷ୍ଟିକ ଯୋଗୁଁ ପରିବେଶ ପ୍ରଦୂଷଣରେ ବୃଦ୍ଧି ପାଇବାରେ ଲାଗିଥିବାବେଳେ ରାଜ୍ୟ ସରକାର ଏହା ଉପରେ ରୋକ ଲଗାଇଛନ୍ତି । ତେବେ ପୁଣି ଫେରୁଛି କାଗଜ ଠୁଙ୍ଗାର ଆଦର ।
ଆଧୁନିକତାର ଚାକଚକ୍ୟ ଦୁନିଆରେ ପ୍ଲାଷ୍ଟିକ ଓ ପଲିଥିନ ବହୁଳ ବ୍ୟବହାର ହେଉଥିବା ବେଳେ ଏଭଳି ସମୟରେ ବ୍ୟବସାୟର ମାଧ୍ୟମ ପାଲଟିଛି କାଗଜ ଠୁଙ୍ଗା । ତେବେ ପ୍ରଥମ ପର୍ଯ୍ୟାୟରେ ଭୁବନେଶ୍ୱର, ବ୍ରହ୍ମପୁର ଓ ରାଉରକେଲା ସହରରେ ପଲିଥିନ ଉପରେ କଟକଣା ଲାଗୁ କରାଯାଇଥିଲା ।
ଏହାପରେ ଗତ 10 ତାରିଖ ଠାରୁ ପ୍ଲାଷ୍ଟିକ ଓ ବର୍ଜ୍ୟବସ୍ତୁ ପରିଚାଳନା ନିୟମ 2016 ଅନୁଯାୟୀ ଖୋର୍ଦ୍ଧାରେ ପ୍ଲାଷ୍ଟିକ ଓ ପଲିଥିନ ଉପରେ ନିଷେଧାଦେଶ ଜାରି ହୋଇଛି । ବିଳମ୍ବରେ ହେଲେ ମଧ୍ୟ ପ୍ରଶାସନର ଏଭଳି ପଦକ୍ଷପ ପରେ କାଗଜ ଠୁଙ୍ଗାର ପୁଣି ଆଦର ବଢିଛି । ଆଉ ଏହି କାଗଜ ଠୁଙ୍ଗା ପ୍ରସ୍ତୁତ କରି ଖୋର୍ଦ୍ଧା ଉପକଣ୍ଠ ମୁକ୍ତାପୁର ଗାଁର ବହୁ ପରିବାର ନିଜ ଗୁଜୁରାଣ ମେଣ୍ଟାଉଛନ୍ତି ।
ଆଉ ପୂର୍ବ ଅପେକ୍ଷା ଏହି କାଗଜ ଠୁଙ୍ଗାର ଚାହିଦା ଢେର ଅଧିକ ରହୁଥିବାରୁ ଭୁବନେଶ୍ୱର, କଟକ ଖୋର୍ଦ୍ଧା ଆଦି ସ୍ଥାନରୁ ବ୍ୟବସାୟୀ ମାନେ ଆସି ଠୁଙ୍ଗା କିଣିନେଉଥିବା କହିଛନ୍ତି ଠୁଙ୍ଗା ପ୍ରସ୍ତୁତକାରୀ ।
ଖୋର୍ଦ୍ଧାରୁ ଗୋବିନ୍ଦ ଚନ୍ଦ୍ର ପଣ୍ଡା, ଇଟିଭି ଭାରତ
