ଖୋର୍ଦ୍ଧା: ନଦୀକୁ ଗାଧୋଇବାକୁ ଯାଇଥିବାବେଳେ ନିଖୋଜ ହେଲେ ବୃଦ୍ଧ । ଏଭଳି ଘଟଣା ଦେଖିବାକୁ ମିଳିଛି ବାଣପୁର ବ୍ଲକ ଅଧିନ ମାଣିକପୁର ଗ୍ରାମରେ । ସୂଚନାନୁଯାୟୀ ସୋମବାର ମାଣିକପୁର ଗ୍ରାମର ଚରଣ ବେହେରା ଗାଧୋଇବା ନିମନ୍ତେ ମାଣିକପୁର ଗ୍ରାମର ଜାମୁଆ ତୁଠ ଶାଳିଆ ନଦୀ ମଧ୍ୟକୁ ଯାଇଥିବାବେଳେ ଜଳର ପ୍ରଖର ସ୍ରୋତରେ ଭାସିଯାଇଛନ୍ତି ।
ତେବେ ନଦୀରେ ବୃଦ୍ଧ ଜଣକ ନିଖୋଜ ହେବାର ୨୪ ଘଣ୍ଟା ବିତିଯାଇଥିଲେ ମଧ୍ୟ ଏପର୍ଯ୍ୟନ୍ତ କୌଣସି ପତ୍ତା ମିଳି ପାରିନାହିଁ । ଆଉ ଏହି ଘଟଣାରେ ଖବର ପାଇ ବାଣପୁର ଅଗ୍ନିଶମ ବାହିନୀ ନଦୀ ମଧ୍ୟରେ ସର୍ଚ୍ଚ ଅପରେସନ ଆରମ୍ଭ କରିଛି l ତେବେ ବୃଦ୍ଧଙ୍କୁ ଉଦ୍ଧାର ପାଇଁ ଆଜି (ମଙ୍ଗଳବାର) ପୁନର୍ବାର ଅଗ୍ନିଶମ ବିଭାଗ ସ୍ଥାନୀୟ ପୋଲିସ ଓ ଗ୍ରାମବାସୀଙ୍କ ମିଳିତ ସହଯୋଗରେ ଚାଲିଛି ସର୍ଚ୍ଚ ଅପରେସନ ।
ଅନ୍ୟପଟେ ପରିବାର ଲୋକ ଓ ଗ୍ରାମବାସୀଙ୍କ ମଧ୍ୟରେ ଖେଳିଯାଇଛି ଶୋକାକୁଳ ପରିବେଶ । ୨ଦିନ ଧରି ନିଖୋଜ ବୃଦ୍ଧଙ୍କ ଘରେ ଚୁଲି ଜଳି ପାରିନାହିଁ । ନଦୀ ପଠାରେ ପରିବାର ଲୋକଙ୍କ କାନ୍ଦ ବୋବାଳିରେ ଫାଟିପଡୁଛି ପୁରା ଅଞ୍ଚଳ l
ଖୋର୍ଦ୍ଧାରୁ ଗୋବିନ୍ଦ ଚନ୍ଦ୍ର ପଣ୍ଡା, ଇଟିଭି ଭାରତ
