ଭୁବନେଶ୍ବର: ରାଜ୍ୟରେ ପ୍ରଥମ ଇ-ରିଡିଂ ରୁମ । ଦୃଷ୍ଟିବାଧିତ ଛାତ୍ରୀଙ୍କ ପାଇଁ ପାଠପଢ଼ାରେ ହେବ ସହାୟକ। ରାଜ୍ୟର ପ୍ରଥମ ଇ-ରିଡିଂ ରୁମ ଉଦଘାଟିତ ହୋଇଛି । ରମାଦେବୀ ବିଶ୍ୱବିଦ୍ୟାଳୟରେ ଦୃଷ୍ଟିବାଧିତ ଛାତ୍ରୀଙ୍କ ପାଇଁ ଆରମ୍ଭ ହେଲା ଇ ରିଡ଼ିଂ ରୁମ । ଏହା ଉଦଘାଟନ କରିଛନ୍ତି ମୋ କଲେଜ ଅଭିଯାନର ଅଧ୍ୟକ୍ଷ ଆକାଶ ଦାସନାୟକ। ରମାଦେବୀ ମହିଳା ବିଶ୍ୱବିଦ୍ୟାଳୟରେ ଦୃଷ୍ଟିବାଧିତ ଛାତ୍ରୀଙ୍କ ପାଇଁ ରାଜ୍ୟର ପ୍ରଥମ ଡିଜିଟାଲ ରିଡିଂ ରୁମ୍ ‘ବିନୋଦିନୀ ମହାପାତ୍ର ରିଡିଂ କର୍ଣ୍ଣର’ ମଙ୍ଗଳବାର ଉଦଘାଟିତ ହୋଇଛି । ‘ମୋ କଲେଜ ଅଭିଯାନ’ ଅଧ୍ୟକ୍ଷ ଆକାଶ ଦାସନାୟକ ଏହି ଇ ରିଡିଂ ରୁମର ଉଦଘାଟନ କରିଛନ୍ତି । ଏହି ରୁମ୍ରେ ଦୃଷ୍ଟିବାଧିତ ଛାତ୍ରୀଙ୍କ ପାଇଁ ‘ଜ’ ସଫ୍ଟୱେୟାର ରହିଛି । ଏହି ସଫ୍ଟୱେୟାର ମାଧ୍ୟମରେ ସେମାନେ ଅଡିଓ ବୁକ୍ ବାହାର କରି ଶୁଣିପାରିବେ ଆଉ ପାଠ ମନେରଖିପାରିବେ । ଯାହାଦ୍ୱାରା ସେମାନେ ଶିକ୍ଷାଗ୍ରହଣ କରିବାରେ କୌଣସି ଅସୁବିଧାର ସମ୍ମୁଖୀନ ହେବେ ନାହିଁ । ବିଶ୍ୱବିଦ୍ୟାଳୟର ପୁରାତନ ଛାତ୍ରୀ ତଥା କୁଳସଚିବ ଶ୍ୟାମଳି ମହାପାତ୍ର ନିଜ ମା’ ବିନୋଦିନୀ ମହାପାତ୍ରଙ୍କ ନାମରେ ଏହି ରିଡିଂ ରୁମ୍ ତିଆରି କରିବାକୁ ୧ ଲକ୍ଷ ଟଙ୍କାର ଆର୍ଥିକ ସହାୟତା ଦେଇଥିଲେ । ସେ ଦେଇଥିବା ଅର୍ଥର ଦୁଇଗୁଣା ଅର୍ଥ ଅର୍ଥାତ୍ ୨ ଲକ୍ଷ ଟଙ୍କା ‘ମୋ କଲେଜ’ ପକ୍ଷରୁ ବିଶ୍ୱବିଦ୍ୟାଳୟକୁ ଅନୁଦାନ ଦିଆଯାଇଥିଲା ।
ଉଭୟ ଅର୍ଥକୁ ମିଶାଇ ସମୁଦାୟ ୩ ଲକ୍ଷ ଟଙ୍କାରେ ଏହି ରିଡିଂ ରୁମ୍ କର୍ଣ୍ଣର ତିଆରି କରାଯାଇଛି । କାର୍ଯ୍ୟକ୍ରମରେ ‘ମୋ କଲେଜ’ ଅଧ୍ୟକ୍ଷ ଦାସନାୟକ ଏହି ରୁମ୍କୁ ଉଦ୍ଘାଟନ କରି କହିଛନ୍ତି ଯେ, ଏହି ଇ-ରିଡିଂ ରୁମ୍ ବିଶ୍ୱବିଦ୍ୟାଳୟରେ ପଢୁଥିବା ଦୃଷ୍ଟିବାଧିତ ଛାତ୍ରୀଙ୍କ ପାଠପଢ଼ାରେ ଏକ ପ୍ରମୁଖ ଭୂମିକା ଗ୍ରହଣ କରିବ । ପୁରାତନ ଛାତ୍ରୀ ତଥା କୁଳସଚିବ ଶ୍ୟାମଳି ମହାପାତ୍ର ନିଜ ମା’ଙ୍କ ନାମରେ ଏହି ରିଡିଂ ରୁମ୍ ତିଆରି କରିବାକୁ ଅର୍ଥ ଦାନ କରିଥିବାରୁ ସେ ତାଙ୍କୁ ଧନ୍ୟବାଦ ଜଣାଇଛନ୍ତି । ରାଜ୍ୟରେ ଥିବା ପ୍ରତ୍ୟେକ କଲେଜ ଏବଂ ବିଶ୍ୱବିଦ୍ୟାଳୟର ସର୍ବଙ୍ଗୀନ ବିକାଶ କରିବାକୁ ‘ମୋ କଲେଜ ଅଭିଯାନ’ ପ୍ରୟାସ କରିଆସୁଛି ।
ଖାଲି ଏତିକି ନୁହେଁ ଛାତ୍ରଛାତ୍ରୀଙ୍କ ଜୀବନରେ ଏହି ଅଭିଯାନ ନିର୍ଣ୍ଣାୟକ ଭୂମିକା ଗ୍ରହଣ କରୁଛି। ଯଦି ଜଣଙ୍କ ଆତ୍ମବିଶ୍ୱାସ ଦୃଢ଼ ଅଛି ଏବଂ ଲକ୍ଷ୍ୟ ସ୍ଥିର ରହିଛି, ତେବେ ନିଶ୍ଚିତ ଭାବେ ଲକ୍ଷ୍ୟ ହାସଲ ହୋଇପାରିବ । ରାଜନୀତି ବିଜ୍ଞାନ ବିଭାଗ ଯୁକ୍ତତିନି ଶେଷ ବର୍ଷର ଦୃଷ୍ଟିବାଧିତ ଛାତ୍ରୀ ଝିଲ୍ଲୀ ପ୍ରଧାନ କହିଛନ୍ତି ଯେ, ଉନ୍ନତମାନର ଜ୍ଞାନକୌଶଳ ମାଧ୍ୟମରେ ଶିକ୍ଷାଗ୍ରହଣ କରିବା ଆମର ବହୁତ ବଡ଼ ସ୍ୱପ୍ନ ଥିଲା । ଆଉ ସେ ସ୍ୱପ୍ନ ଆଜି ପୂରଣ ହୋଇଛି । ଆଜି ଆମମାନଙ୍କ ପାଇଁ ବହୁତ ବଡ଼ ଦିନ । ଆମ ଭଳି ଦିବ୍ୟାଙ୍ଗ ପିଲାଙ୍କ ଶିକ୍ଷା ପାଇଁ ଡିଜିଟାଲ୍ ରିଡିଂ ରୁମ୍ କରାଯାଇଥିବାରୁ କୁଳପତି ପ୍ରଫେସର ଅପରାଜିତା ଚୌଧୁରୀ, ସମସ୍ତ ଅଧ୍ୟାପକ, ଅଧ୍ୟାପିକା ଓ ‘ମୋ କଲେଜ ଅଭିଯାନ’କୁ ବହୁତ ଧନ୍ୟବାଦ । ଅନ୍ୟପଟେ କାର୍ଯ୍ୟକ୍ରମରେ ରମାଦେବୀ ବିଶ୍ଵବିଦ୍ୟାଳୟର କୁଳପତି ପ୍ରଫେସର ଅପରାଜିତା ଚୌଧୁରୀ କହିଛନ୍ତି ଜେ, ଆମ ବିଶ୍ୱବିଦ୍ୟାଳୟର ପ୍ରତିଟି ଛାତ୍ରୀ କମ୍ପ୍ୟୁଟର ଶିକ୍ଷା ଗ୍ରହଣ କରିବାର ବ୍ୟବସ୍ଥା ରହିଛି ।
ଏହା ବ୍ୟତୀତ ଦିବ୍ୟାଙ୍ଗ ଛାତ୍ରୀଙ୍କ ସୁବିଧା ପାଇଁ ଏହି ଇ-ଲର୍ଣ୍ଣିଂ ସେଣ୍ଟରରେ ଆମେ ସବୁ ପ୍ରକାରର ସୁବିଧା କରିବାକୁ ଯୋଜନା କରୁଛୁ । ଯେଉଁଥିରେ ଛାତ୍ରୀଙ୍କ ପାଇଁ ସ୍ୱତନ୍ତ୍ର ସଫ୍ଟୱେୟାର ଓ ପ୍ରଶିକ୍ଷଣ ପାଇଁ ସ୍ୱତନ୍ତ୍ର ବ୍ୟବସ୍ଥା ହେବ । ଅନ୍ୟପଟେ କୁଳସଚିବ ଶ୍ୟାମଳି ମହାପାତ୍ର କହିଛନ୍ତି ଯେ, ନଦୀ ଭଳି ଜୀବନରେ ଆଗକୁ ବଢ଼ିବା ପାଇଁ ମୋ ମା’ ବିନୋଦିନୀ ମହାପାତ୍ର ସର୍ବଦା ମୋତେ ଆଉ ମୋ ଭାଇଭଉଣୀମାନଙ୍କୁ ପ୍ରେରଣା ଦିଅନ୍ତି । ଏହି ବିଶ୍ୱବିଦ୍ୟାଳୟର ଜଣେ ପୁରାତନ ଛାତ୍ରୀ ଭାବେ ଏଠାରେ ଏକ ରିଡିଂ କର୍ଣ୍ଣର କରିବାକୁ ସହାୟତା ପ୍ରଦାନ କରିଥିଲି । ଆଜି ତାହା ବାସ୍ତବରେ ପରିଣତ ହୋଇଛି । ଏଥିପାଇଁ ସବୁ ଶ୍ରେୟ ‘ମୋ କଲେଜ ଅଭିଯାନ’କୁ ଦେଉଛି । କାର୍ଯ୍ୟକ୍ରମରେ ସ୍ନାତକୋତ୍ତର ପରିଷଦର ଅଧ୍ୟକ୍ଷ ପ୍ରଫେସର ଚଣ୍ଡିଚରଣ ରଥ, ‘ଉଇ ଫର୍ ୟୁ’ର ଅଭୟ ମହାନ୍ତ, ପ୍ରଫେସର ଚନ୍ଦ୍ରଶେଖର ଲେଙ୍କା, ଲାଇବ୍ରେରୀ ଇନ୍ଚାର୍ଜ ନସିମା ବେଗମ୍, ପାଖାପାଖି ୧୦୦ ଜଣ ଦୃଷ୍ଟିବାଧିତ ଛାତ୍ରୀ ପ୍ରମୁଖ ଉପସ୍ଥିତ ରହିଥିଲେ।
ଇଟିଭି ଭାରତ, ଭୁବନେଶ୍ବର
