ଭୁବନେଶ୍ବର: ଓଡ଼ିଶା ଷ୍ଟେଟ୍ ମେଡିକାଲ କାଉନସିଲ ଲିମିଟେଡ (OSMCL) ମାଧ୍ୟମରେ ବିତରଣ କରାଯାଉଥିବା ଔଷଧ ପ୍ରଭାବଶାଳୀ ହୋଇପାରିଛି । ବିଶେଷଜ୍ଞ କମିଟି ଓ ରୋଗୀମାନେ ଏହାର ପାର୍ଶ୍ବପ୍ରତିକ୍ରିୟା ବାବଦରେ ଅଭିଯୋଗ କରିନାହାନ୍ତି । ଏନେଇ ମୁଖ୍ୟ ଶାସନ ସଚିବ ସୁରେଶ ଚନ୍ଦ୍ର ମହାପାତ୍ରଙ୍କ ଅଧ୍ୟକ୍ଷତାରେ ଅନୁଷ୍ଠିତ ଉଚ୍ଚସ୍ତରୀୟ ସମୀକ୍ଷା ବୈଠକରେ ନିଷ୍କର୍ଷ ବାହାରିଛି । ରାଜ୍ୟରେ ଔଷଧ ଯୋଗାଣ କେମିତି ଚାଲିଛି ସେନେଇ ମୁଖ୍ୟ ଶାସନ ସଚିବ ମହାପାତ୍ର ରବିବାର ସମୀକ୍ଷା କରିଛନ୍ତି ।
ରାଜ୍ୟ ଔଷଧ ନିଗମ ଦ୍ବାରା ସରକାରୀ ଡାକ୍ତରଖାନାଗୁଡ଼ିକରେ ଖୋଲାଯାଇଥିବା ଔଷଧ ବିତରଣ କେନ୍ଦ୍ର ‘ନିର୍ମାଲ୍ୟ’ରେ ଔଷଧ ପହଞ୍ଚାଇବା ପୂର୍ବରୁ ଏହାର ଗୁଣବତ୍ତା ଯାଞ୍ଚ ଓ ଅନ୍ୟ ପ୍ରକ୍ରିୟା କରାଯାଉଛି । ଏନେଇ ଅନୁଷ୍ଠିତ ବୈଠକରେ ସ୍ବାସ୍ଥ୍ୟ ଓ ପରିବାର କଲ୍ୟାଣ ସଚିବ ଶାଳିନୀ ପଣ୍ଡିତ ପ୍ରକାଶ କରିଛନ୍ତି । ବୈଠକରେ କିଡନୀ ରୋଗୀଙ୍କ ପାଇଁ ଦିଆଯାଉଥିବା ଔଷଧ ସଂପର୍କରେ ମଧ୍ୟ ଚର୍ଚ୍ଚା ହୋଇଥିଲା । ସେପଟେ ଦୀର୍ଘ ଦିନ ହେଲା ଧାରଣାରେ ବସିଥିବା କିଡନୀ ରୋଗୀମାନେ ରାସ୍ତା ଅବରୋଧ କରି ବସିଛନ୍ତି । ମୁଖ୍ୟ ଶାସନ ସଚିବଙ୍କ ଅଧ୍ୟକ୍ଷତାରେ ଅନୁଷ୍ଠିତ ହୋଇଥିବା ବୈଠକର କାଉଣ୍ଟର କରିଛନ୍ତି ଆନ୍ଦୋଳନକାରୀ ।
ରୋଗୀ ଓ ସମ୍ପର୍କୀୟମାନେ ଏହାକୁ ଖଣ୍ଡନ କରି ଅସନ୍ତୋଷ ଜାହିର କରିଛନ୍ତି । ଏନେଇ ଆନ୍ଦୋଳନକାରୀ କହିଛନ୍ତି, "ବୈଠକରେ ଆଲୋଚନା ପରେ ଜାରି ହୋଇଥିବା ନିର୍ଦ୍ଦେଶରେ ଧାରଣାରତ ଆନ୍ଦୋଳନକାରୀମାନେ କୌଣସି ମେଡିସିନ ଦୋକାନରୁ ପଇସା ନେବା କଥା ଉଲ୍ଲେଖ ରହିଛି । ଓଡ଼ିଶାର ଗରିବ ଲୋକଙ୍କ ଉପରେ ସରକାର ଆକ୍ଷେପ କରିଛନ୍ତି ।"
ଏହା ମଧ୍ୟ ପଢ଼ନ୍ତୁ: ଔଷଧ ଦାବିରେ ଆନ୍ଦୋଳନ, ରାଜଧାନୀରେ ରାସ୍ତା ଅବରୋଧ କଲେ କିଡନୀ ରୋଗୀ
ସୂଚନାଯୋଗ୍ୟ, ନିର୍ମାଲ୍ୟ କାଉଣ୍ଟରରେ କିଡନୀ ରୋଗୀ ଓ କିଡନୀ ପ୍ରତ୍ୟାରୋପଣ ହୋଇଥିବା ରୋଗୀଙ୍କୁ ମାଗଣାରେ ଔଷଧ ବିତରଣ କରିବା ପାଇଁ ସରକାର ବ୍ୟବସ୍ଥା କରିଛନ୍ତି । ଔଷଧ ଯୋଗାଇବା ପୂର୍ବରୁ ଏନ୍ଏବିଏଲ୍ ପରୀକ୍ଷାଗାରରେ ଗୁଣବତ୍ତା ଯାଞ୍ଚ କରାଯାଇଥାଏ । ପରୀକ୍ଷାଗାରରେ ଯାଞ୍ଚ ପରେ ଉପଯୋଗୀ ଔଷଧ ହୋଇଥଲେ ତାହା ରୋଗୀଙ୍କୁ ବିତରଣ କରାଯାଇଥାଏ । SCBରେ କିଡନୀ ପ୍ରତିରୋପଣ ବ୍ୟବସ୍ଥା 2012 ମାର୍ଚ୍ଚ 12 ମସିହାରେ ଆରମ୍ଭ ହୋଇଥିଲା । ଏସ୍ସିବିର ବିଶେଷଜ୍ଞ ଡାକ୍ତରଙ୍କ ଦ୍ବାରା ଆଜି ପର୍ଯ୍ୟନ୍ତ 187 ଜଣ କିଡନୀ ରୋଗୀଙ୍କ ସଫଳତାପୂର୍ବକ ପ୍ରତିରୋପଣ କରାଯାଇଛି । ସେହିପରି 120 କିଡନୀ ରୋଗୀଙ୍କ ଚିକିତ୍ସା ଜାରି ରହିଛି । ଏମାନଙ୍କ ମଧ୍ୟରୁ 75 ପ୍ରତିଶତ ରୋଗୀଙ୍କ କହିବା ଅନୁସାରେ ଓଏସ୍ଏମ୍ସିଏଲ୍ ପକ୍ଷରୁ ଦିଆଯାଉଥିବା ଔଷଧ ସେବନ ଦ୍ବାରା କୌଣସି ପାର୍ଶ୍ବପ୍ରତିକ୍ରିୟାର ସାମ୍ନା କରିନାହାନ୍ତି । ସମୀକ୍ଷା ବୈଠକରେ ସ୍ବାସ୍ଥ୍ୟ ବିଭାଗର ଅଧିକାରୀଙ୍କ ସମେତ କର୍ମଚାରୀମାନେ ଉପସ୍ଥିତ ଥିଲେ ।
ଇଟିଭି ଭାରତ, ଭୁବନେଶ୍ବର
