ଭୁବନେଶ୍ବର : ବିଜେଡ଼ି ନେତା ଏବଂ ରାଜ୍ୟ ସରକାରଙ୍କ ବିରୁଦ୍ଧରେ ବିଜେପିର ଅଭିଯୋଗ । ମଦ ବ୍ୟବସାୟରେ ରାଜ୍ୟ ସରକାରଙ୍କର ସଂପୃକ୍ତି । ଝାଡ଼ଖଣ୍ଡ ସାଂସଦ ହେଉଛନ୍ତି ଏହାର ମାଲିକ କିନ୍ତୁ ବିଜେଡ଼ି ହେଉଛି ମ୍ୟାନେଜର । ଭିଜିଲାନ୍ସ, କ୍ରାଇମ ବ୍ରାଞ୍ଚ, ଅବକାରୀ ବିଭାଗ, ଇଓଡବ୍ଲ୍ୟୁ ସବୁ ଜାଣି ମଧ୍ୟ ଅଜଣା । ମଦ ବ୍ୟବସାୟକୁ ଓଡ଼ିଶାରେ ମ୍ୟାନେଜ କରୁଛନ୍ତି ରାଜ୍ୟ ସରକାର । ଏନେଇ ବିଜେପିର ଉପସଭାନେତ୍ରୀ, କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ସମେତ ଅନ୍ୟ ନେତା ଓ ମନ୍ତ୍ରୀ ନିଜ ମନ୍ତବ୍ୟ ରଖିଛନ୍ତି ।
ବିଜେପିର କହିବା ଅନୁଯାୟୀ, ବିଜେଡ଼ି ନେତା ଏବଂ ରାଜ୍ୟ ସରକାର ମିଶି ମଦ କମ୍ପାନୀକୁ ଓଡ଼ିଶାରେ ପରିଚାଳିତ କରୁଥିଲେ । ଓଡ଼ିଶାର ଅବକାରୀ ବିଭାଗ ହିଁ ସେ କମ୍ପାନୀକୁ ଲାଇସେନ୍ସ ଦେଇଥିଲା । କମ୍ପାନୀର ପ୍ରଡକ୍ସନ, ଟର୍ଣ୍ଣ ଓଭର ଏବଂ ପ୍ରଫିଟ ସବୁ ଓଡ଼ିଶା ସରକାରଙ୍କ ନିୟନ୍ତ୍ରଣରେ ଥିଲା । ଜଣେ ମଦ ବେପାରୀ ଶହ ଶହ କୋଟି ଟଙ୍କା ଠୁଳ ରଖିଥିବା କଥା ରାଜ୍ୟ ସରକାର କେମିତି ଜାଣିପାରିଲେ ନାହିଁ । ଭିଜିଲାନ୍ସ, କ୍ରାଇମ ବ୍ରାଞ୍ଚ, ଅବକାରୀ ବିଭାଗ, ଇଓଡବ୍ଲ୍ୟୁ କ’ଣ ଏତେ ଦିନରୁ ଶୋଇ ରହିଥିଲେ । ରାଜ୍ୟ ସରକାରଙ୍କ ଏସବୁ ସଂସ୍ଥା ଏବଂ ବିଭାଗ ଫେଲ୍ ମାରିଛି । ନିରଞ୍ଜନ ପୂଜାରୀ, ପ୍ରଦୀପ ଅମାତ, ଟୁକୁନି ସାହୁ, ଯୋଗେଶ ସିଂଙ୍କ ଭଳି ନେତା ମାନଙ୍କର ଏଥିରେ ସଂପୃକ୍ତି ଥିବା ବିଜେପି କହିଛି । ଏହି ବିଜେଡ଼ି ନେତା ମାନେ ହିଁ ମଦ ମାଫିଆ ବ୍ୟବସାୟକୁ ଓଡ଼ିଶାରେ ମ୍ୟାନେଜ ଏବଂ ଅପରେଟ କରୁଥିଲେ ।
ଏହା ମଧ୍ୟ ପଡ଼ନ୍ତୁ.....ଆଇଟି ରେଡ: ସାହୁ ବ୍ରଦର୍ସ ଆଣ୍ଡ କୋ ସହିତ ବିଜେଡି ନେତା ମନ୍ତ୍ରୀଙ୍କ ସମ୍ପର୍କ କଣ: ବିଜେପି
ନିକଟରେ ଶ୍ରେଷ୍ଠ ଭିଜିଲାନ୍ସ ବିଭାଗ ଭାବେ ଓଡ଼ିଶା ଭିଜିଲାନ୍ସ ଆୱାର୍ଡ଼ ପାଇଛି । ତେଣୁ ଭିଜିଲାନ୍ସ ଏତେ ବଡ କାରବାର ବିଷୟରେ ଜାଣି ପାରିଲାନି କେମିତି ବୋଲି ପ୍ରଶ୍ନ କରିଛନ୍ତି ରାଜ୍ୟ ବିଜେପି । ରାଜ୍ୟ ସରକାର ଓ ଝାଡ଼ଖଣ୍ଡର କଂଗ୍ରେସ ସାଂସଦ ମିଶି ବେଆଇନ ମଦ କାରବାର ଚଳାଇଥିବା କୁହାଯାଉଛି । ଏହି ମଦ ବ୍ୟବସାୟୀ ହିଁ ନିର୍ବାଚନ ସମୟରେ ବିଜେଡିର ମଦ ଏବଂ ଟଙ୍କାର ସୋର୍ସ । ଏବେ ମିଳୁଥିବା ଟଙ୍କା ନିର୍ବାଚନ ପାଇଁ ଗଚ୍ଛିତ ରଖାଯାଇଛି । ରାଜ୍ୟ ସରକାର କେବଳ ପ୍ରଚାର ପାଇଁ 5T ଏବଂ ଟ୍ରାନ୍ସପାରେନ୍ସୀ କଥା କହୁଛନ୍ତି । ଓଡ଼ିଶାରେ କେମିତି ଓ କାହା ନିର୍ଦ୍ଦେଶରେ ଟେଣ୍ଡର ଦିଆଯାଏ ତାହା ହାଟରେ ପଡ଼ି ଦାଣ୍ଡରେ ଗଡିଲାଣି । ତେବେ ରାଜ୍ୟ ବିଜେପିର ଉପସଭାନେତ୍ରୀ କହିଛନ୍ତି, ’’ଗତକାଲି ବିଜେଡି ଅଭିଯୋଗ ଆଣିଥିଲା ଯେ ବିଜେପିର ସମ୍ପୃକ୍ତି ରହିଛି ତେବେ ଯଦି ପ୍ରମାଣ ଅଛି ବିଜେଡ଼ି ଦେଉ । ମଦ ବ୍ୟବସାୟୀଙ୍କ ସହ ବିଜେଡ଼ି ନେତାଙ୍କ ଫଟୋ ଭାଇରାଲ୍ ହେଉଛି ।’’
ସେପଟେ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଉଲ୍ଲେଖ କରିଛନ୍ତି, ’’ଏହି ବେନାମୀ ଧନର ମୂଳ ଉତ୍ସ କେଉଁଠି ? ଘଟଣାର ସତ୍ୟାସତ୍ୟ କଣ ? ଜବତ ହେଉଥିବା କଳାଧନ ସହ ଓଡ଼ିଶାର କିଛି ମୁଷ୍ଟିମେୟ ଲୋକମାନଙ୍କର ସମ୍ପର୍କ ଅଛି କି? ସଚ୍ଚୋଟତାର ଡିଣ୍ଡିମ ପିଟୁଥିବା କିଛି ଲୋକମାନେ ଏହି ଘଟଣାରେ ଚୁପ୍ କାହିଁକି ? ନୈତିକତାର କଥା କହୁଥିବା କିଛି ରାଜନୈତିକ ଦଳର ନେତାମାନେ ଏହି ଘଟଣାରେ ନୀରବ ଥିବାରୁ ସାଧାରଣ ଜନତାଙ୍କ ମନରେ ସନ୍ଦେହ ସୃଷ୍ଟି ହୋଇଛି । ଗୋଟି ଗୋଟି କରି ଜନତାଙ୍କ ଠାରୁ ହରିଲୁଟ୍ ହୋଇଥିବା ଅର୍ଥ ଅସୁଲ କରଯିବା ସହ ଘଟଣାରେ ସମ୍ପୃକ୍ତ ଥିବା ବ୍ୟକ୍ତିଙ୍କ ବିରୋଧରେ ଦୃଢ କାର୍ଯ୍ୟାନୁଷ୍ଠାନ ନିଆଯିବ, ଏହା ହେଉଛି ମୋଦିଙ୍କ ଗ୍ୟାରେଣ୍ଟି ।’’
ଇଟିଭି ଭାରତ, ଭୁବନେଶ୍ବର
