ଭୁବନେଶ୍ବର: ଦଶହରା ବଜାରରେ ଲାଗିଛି ସିନେମା ମେଢ । ନୂଆ ନୂଆ ଫିଲ୍ମ ପାଇଁ ହଲରେ ଲାଗିଛି ଖଚଖଚ ଭିଡ । ସିନେମା ମେଢ ଭିତରେ ହଲରେ ଲାଗିଛି ବାବୁସାନ ଓ ଅମ୍ଳାନଙ୍କ ଫିଲ୍ମ ମାଲ୍ୟଗିର, ଅରିନ୍ଦମଙ୍କ ଫିଲ୍ମ ରାମ ସାଙ୍ଗକୁ , ସୁପରଷ୍ଟାର ସିଦ୍ଧାନ୍ତଙ୍କ ‘କଟକ ଶେଷରୁ ଆରମ୍ଭ’ ରିଲିଜ ହୋଇଯାଇଛି । ପୂଜା ହଲରେ 3ଟି ଫିଲ୍ମ ପରସ୍ପରକୁ କଡ୍ଡା ଟକ୍କର ଦେଉଛନ୍ତି । ସୁପରଷ୍ଟାର ସିଦ୍ଧାନ୍ତ ମହାପାତ୍ରଙ୍କ ଆକ୍ଟିଂ ଦେଖିବାକୁ ଲାଗିଛି ଦର୍ଶକଙ୍କ ଭିଡ । କଟକରେ ଫିଲ୍ମ ରିଲିଜ ହୋଇଥିବା ବେଳେ ଏବେ ଭୁବନେଶ୍ବରର ବିଭିନ୍ନ ହଲରେ ଫିଲ୍ମ ‘ କଟକ ଶେଷରୁ ଆରମ୍ଭ’ ରିଲିଜ ହୋଇଯାଇଛି ।
କଟକର ଇତିହାସ ଓ କଟକର ଭାଇଚାରର କାହାଣୀକୁ ନେଇ ଏହି ସିନେମାଟି ହୋଇଥିବା ବେଳେ ଏଥିରେ ମୁଖ୍ୟ ଚରିତ୍ରରେ ରହିଛନ୍ତି ସିଦ୍ଧାନ୍ତ ମହାପାତ୍ର ଓ ଦେବାଶିଷ । ଏହାସହ ବଡ ପରଦାକୁ କମବ୍ୟାକ କରିଛି ଓଲିଉଡର ଲୋକପ୍ରିୟ ସିଦ୍ଧାନ୍ତ ମହାପାତ୍ର ଓ ଅନୁ ଚୌଧୁରୀଙ୍କ ଯୋଡି । ଆନମିଶ ପ୍ରଡକ୍ସନ ବ୍ୟାନରରେ ନିର୍ମାଣ କରାଯାଇଛି ଏହି ଫିଲ୍ମ । ଯେଉଁଥିରେ ପ୍ରଯୋଜକ ରହିଛନ୍ତି ପ୍ରୀତମ ସାହୁ ଓ ନିର୍ଦ୍ଦେଶକ ସୁଧାଂଶୁ ମୋହନ ସାହୁ । ଏଥିରେ ଦେବାଶିଷଙ୍କୁ ଏକ ଆକ୍ସନ ହିରୋ ଭାବେ ଦେଖିବାକୁ ପାଇବେ ଦର୍ଶକ ତାଙ୍କ ବିପକ୍ଷରେ ରହିଛନ୍ତି ପୂନମ ।
ଏହା ମଧ୍ୟ ପଢନ୍ତୁ...ମାୟା ନଗରୀ ଛାଡି ଚେନ୍ନାଇ ଗଲେ ଆମୀର ଖାନ ? ଜାଣନ୍ତୁ କାରଣ
ପ୍ରଯୋଜକ ପ୍ରୀତମ ସାହୁ କହିଛନ୍ତି, ‘‘କ୍ରାଇମ ଜୋନର ସହ ଏକ ଗ୍ୟାଙ୍ଗଷ୍ଟାର ଉପରେ କାହାଣୀ ପର୍ଯ୍ୟବେସିତ । ତେବେ ଏହି ସିନେମାଟି ଆଜି ଭୁବନେଶ୍ୱରରେ ରିଲିଜ ହୋଇଛି । ସବୁଠାରୁ ବଡ କଥା ହେଲା ଅନୁ ଚୌଧୁରୀ ଓ ସିଦ୍ଧାନ୍ତ ମହାପାତ୍ରଙ୍କୁ କେବଳ ଏକାଠି ଦେଖିବାକୁ ମିଳିବନି ଏଭରଗ୍ରୀନ ଗୀତ ‘ତୁମେ ଯଦି ଗଢିଦିଅ ମୋ ପାଇଁ ବାଲିଘର’ ଦର୍ଶକଙ୍କୁ ପୂରୁଣା ଦିନକୁ ଫେରାଇ ନେବ । ଫିଲ୍ମରେ ଆକ୍ସନ ସହ ଏକ ଦମଦାର ଷ୍ଟୋରୀ ଦେଖିବାକୁ ପାଇବେ ଦର୍ଶକ । ଫିଲ୍ମଟି ଓଡ଼ିଶାର ମୌଳିକ କାହାଣୀ ବା କଟକର ମୌଳିକ କଥାକୁ ନେଇ ପ୍ରସ୍ତୁତ । ଏହାକୁ ଦର୍ଶକ ବେଶ ପସନ୍ଦ କରୁଛନ୍ତି । ଆଶା ଆଗକୁ ମଧ୍ୟ ଏମିତି ଭଲ ପାଇବା ମିଳିବ । ଆସନ୍ତୁ ଫିଲ୍ମ ଦେଖନ୍ତୁ ଏବଂ ଏକ ସୁନ୍ଦର ଫିଲ୍ମର ଅଂଶ ହୁଅନ୍ତୁ । ’’ସେପଟେ କଟକର ସତ ଘଟଣା ସହ ଆକ୍ସନରେ ଭରା ଏହି ସିନେମା ଲୋକଙ୍କୁ ଭଲ ଲାଗିବ ବୋଲି କହିଛି ଅଭିନେତା ।
ଇଟିଭି ଭାରତ, ଭୁବନେଶ୍ବର
