ଖୋର୍ଦ୍ଧା: ଜାତୀୟ ଦଳିତ ଆଦିବାସୀ ମହାସଂଘ ୩ ଦଫା ଦାବୀ ନେଇ ଜିଲ୍ଲାପାଳଙ୍କ କାର୍ଯ୍ୟଳୟ ଘେରାଉ କରିଛି । ଲଗାତର ଭାବେ ତହସିଲ, ବ୍ଲକ, ଥାନା ଗୁଡ଼ିକରେ ଅନୁସୂଚିତ ଜାତି ଓ ଜନଜାତି ମାନଙ୍କ ପ୍ରତି ଅବହେଳା ଓ ଅତ୍ୟାଚାର କରାଯାଉଥିବା ଅଭିଯୋଗ କରି ଏହି ଘେରାଉ କରାଯାଇଛି ।
ଭୁବନେଶ୍ଵର ତହସିଲ ଘାଟିକିଆ ମୌଜା ବାରମାଣିଆ ଗାଁର ୧୦ଟି ଦିନ ମଜୁରିଆ ଆଦିବାସୀ ପରିବାରଙ୍କ ୧ ଏକର ୨୦ ଡିସିମିଲ ଜମି ଜାଲିଆତି ହୋଇଥିବା ଅଭିଯୋଗ ହୋଇଛି । ଏହି ଜମିକୁ ବିନା ଅନୁମୋଦନରେ ସମଷ୍ଟି ବିଲଡ଼ରର ସ୍ଥିତପ୍ରଜ୍ଞା ନନ୍ଦ, ନିଶିଥ ନନ୍ଦ ଓ ସେମାନଙ୍କ ସହଯୋଗୀ ୨୦୦୬ ଏବଂ ୨୦୦୭-୦୮ରେ ପୂର୍ଣ୍ଣ କ୍ଷମତା ପତ୍ର ନେଇ ଜାଲ କାଗଜପତ୍ର କରି ଚଞ୍ଚକତା କରିଥିବା ଅଭିଯୋଗ ହୋଇଛି । ‘ସହର’ ଅନୁସୂଚିତ ଜନଜାତି ତାଲିକାଭୁକ୍ତ ହୋଇଥିବା ବେଳେ ସାଧାରଣ ବର୍ଗରେ ଆସୁଥିବା ‘ସଅର’ ଜାତିର ଲୋକେ ଜାଲିଆତି କରି ସେମାନଙ୍କ ଜମି ହଡ଼ପ କରିଥିବା ଅଭିଯୋଗ ହୋଇଛି ।
ପୁରୁଷ ପୁରୁଷ ଧରି ଏହି ପରିବାର ଜମିରେ ଚାଷବାସ କରୁଥିଲେ, ଏବେ ତାହା ମଧ୍ୟ ହେଉ ନାହିଁ । ଭୂମିହୀନ ଅବସ୍ଥାରେ ଏମାନେ ପଡ଼ିରହିଛନ୍ତି । ନ୍ୟାୟ ପାଇଁ ତହସିଲଦାର, ଉପଜିଲ୍ଲାପାଳ, ଭରତପୁର ଥାନା, ଏସିପି-୩, ଅତିରିକ୍ତ ଡ଼ିସିପି, ଡ଼ିସିପି, ପୋଲିସ କମିଶନରଙ୍କ ଦ୍ବାରସ୍ଥ ହୋଇଥିଲେ ମଧ୍ୟ କୌଣସି କାର୍ଯ୍ୟାନୁଷ୍ଠାନ ନିଆଯାଉନଥିବା ଅଭିଯୋଗ ହୋଇଛି । ଯେଉଁଥିପାଇଁ ଆଜି ଶହ ଶହ ଲୋକେ ଜିଲ୍ଲାପାଳଙ୍କ କାର୍ଯ୍ୟଳୟ ଘେରାଉ କରିଛନ୍ତି । ଆଗାମୀ ଦିନରେ ଦାବୀ ପୂରଣ ନହୁଏ ତେବେ ହଜାର ହଜାର ସଂଖ୍ୟାରେ ଲୋକେ ଆନ୍ଦୋଳନକୁ ଓହ୍ଲାଇବେ ବୋଲି ଆନ୍ଦୋଳନକାରୀ ଚେତାବନୀ ଦେଇଛନ୍ତି ।
ଇଟିଭି ଭାରତ, ଖୋର୍ଦ୍ଧା
