ଭୁବନେଶ୍ବର: ପାଠପଢା ସମୟରୁ କୁଶଳୀ ହେବେ ଛାତ୍ରଛାତ୍ରୀ । ଏଥିପାଇଁ ଛାତ୍ରଛାତ୍ରୀଙ୍କୁ ଦିଆଯିବ ତାଲିମ । ଏଥିପାଇଁ ମୋ କଲେଜ ଓ ଏସ.ଏସ.ୟୁ. ମଧ୍ୟରେ ଚୁକ୍ତିପତ୍ର ସ୍ବାକ୍ଷରିତ ହୋଇଛି । ରାଜ୍ୟର ଉଚ୍ଚଶିକ୍ଷା ଅନୁଷ୍ଠାନର ଯୁବକଯୁବତୀଙ୍କୁ ଅଧିକ କୁଶଳୀ ଗଢିବା ତଥା ଆତ୍ମନିଯୁକ୍ତି ତାଲିମ୍ ଯୋଗାଇବା ନିମନ୍ତେ ଏହି ବୁଝାମଣା ହୋଇଛି । ଏସ.ଏସ.ୟୁ.ର ଆଜୀବନ ସଭାପତି ତଥା ଆଧ୍ୟାତ୍ମିକ ଗୁରୁ ଶ୍ରୀ ଶ୍ରୀ ରବି ଶଙ୍କରଙ୍କ ଉପସ୍ଥିତିରେ ଏହି କାର୍ଯ୍ୟକ୍ରମ ଆୟୋଜିତ ହୋଇଛି । ‘ମୋ କଲେଜ’ର ଅଧ୍ୟକ୍ଷ ଆକାଶ ଦାସନାୟକ ଏବଂ ଏସ.ଏସ.ୟୁର ସଭାପତି ପ୍ରଫେସର ରଜିତା କୁଲକର୍ଣ୍ଣି ଉପସ୍ଥିତ ରହି ଏହି ଚୁକ୍ତିପତ୍ର ସ୍ବାକ୍ଷର କରିଛନ୍ତି ।
‘ମୋ କଲେଜ’ ଅଧିନରେ ରହିଥିବା ରାଜ୍ୟର ସମସ୍ତ କଲେଜ ଓ ବିଶ୍ବବିଦ୍ୟାଳୟରେ ‘ଉଦ୍ୟୋଗୀ ସେଲ (ଇ-ସେଲ)’ ଗଢାହେବ । ଏହି ସେଲ ଆତ୍ମ ନିଯୁକ୍ତି ସୃଷ୍ଟି ତଥା କୃଷି ଭିତ୍ତିକ ଷ୍ଟାର୍ଟ-ଅପ୍ ନେଇ ବିଦ୍ୟାର୍ଥୀଙ୍କୁ ତାଲିମ୍ ଯୋଗାଇବ। ଏନେଇ ପ୍ରଥମେ କେତେଜଣ ବିଦ୍ୟାର୍ଥୀ ଓ ଷ୍ଟାଫ୍ ସଂଯୋଜକ/ ସଂଯୋଜିକାଙ୍କୁ ଚୟନ କରାଯିବ। ପରେ ସେମାନଙ୍କ ନିମନ୍ତେ ସ୍ବତନ୍ତ୍ର ତାଲିମ୍ (ଟ୍ରେନିଂ ଅଫ ଟ୍ରେନର୍ସ) ଯୋଗାଇ ଦିଆଯିବ । ଏହି ସେଲ୍ର ତାଲିମପ୍ରାପ୍ତ କର୍ମକର୍ତ୍ତାମାନେ ନିୟମିତ ବ୍ୟବଧାନରେ ଆତ୍ମନିଯୁକ୍ତି ସମ୍ପର୍କିତ କାର୍ଯ୍ୟକ୍ରମ, କର୍ମଶାଳା ଓ ଆଲୋଚନାଚକ୍ର ଆଦି ଆୟୋଜନ କରିବେ ।
ଏହା ମଧ୍ୟ ପଢନ୍ତୁ: ପରୀକ୍ଷାରେ ଛାତ୍ରଛାତ୍ରୀଙ୍କୁ ଚାପମୁକ୍ତ ପାଇଁ ଆରମ୍ଭ ହେବ ସ୍ବତନ୍ତ୍ର ସେଲ
