ଖୋର୍ଦ୍ଧା: ନିଖୋଜ ଶିଶୁକନ୍ୟାର ମୃତଦେହ ଉଦ୍ଧାର । ନୟାଗଡ ଜିଲ୍ଲା ଚାନ୍ଦପୁର ମଙ୍ଗଳା ସାହିରେ ଏକ ଦେଢ ବର୍ଷର ଶିଶୁ କନ୍ୟା ନିଖୋଜ ଥିବାବେଳେ ସୋମବାର ଶିଶୁଟିର ମୃତଦେହ ଉଦ୍ଧାର ହୋଇଛି ।
ସୂଚନା ଅନୁଯାୟୀ, ସବୁଦିନ ପରି ରବିବାର ମଧ୍ୟ ଦେଢ ବର୍ଷର ଶିଶୁ କନ୍ୟା ପାୟଲ ନିଜ ଘର ନିକଟରେ ଖେଳୁଥିଲା । ହଠାତ୍ ପରିବାର ଲୋକ ଆସି ଦେଖନ୍ତି ତ ପାୟଲ ଘର ନିକଟରେ ନଥିଲା । ଏହାପରେ ପରିବାର ଲୋକ ବହୁ ଖୋଜାଖୋଜି କରିବା ପରେ ପାୟଲକୁ ପାଇ ନଥିଲେ ।
ଏନେଇ ଚାନ୍ଦପୁର ଥାନାରେ ପରିବାର ଲୋକ ଅଭିଯୋଗ କରିଥିଲେ । ଅଭିଯୋଗ ପାଇବାପରେ ଚାନ୍ଦପୁର ପୋଲିସ ମଙ୍ଗଳା ସାହିରେ ପହଞ୍ଚି ଖୋଜାଖୋଜି କରି ଫେରିଯାଇଥିଲେ । ରବିବାର ରାତି ପ୍ରାୟ ୧୧ ଟା ସମୟରେ ପାୟଲର ଅଜା ରୁଷିଆ ବେହେରା ବାଡି ପଟକୁ ଯାଇଥିବା ବେଳେ ହଠାତ୍ ପାୟଲର ମୃତଦେହ ପଡିଥିବା ଦେଖିବାକୁ ପାଇଥିଲେ ।
ପାୟଲର ମୃତଦେହକୁ ପରିବାର ଲୋକେ ଉଦ୍ଧାର କରି ପୋଲିସକୁ ଖବର ଦେଇଥିଲେ । ଖବର ପାଇ ପୋଲିସ ଘଟଣା ସ୍ଥଳରେ ପହଞ୍ଚି ମୃତଦେହକୁ ଉଦ୍ଧାର କରି ତଦନ୍ତ ଆରମ୍ଭ କରିଛନ୍ତି । ଏପଟେ ପରିବାର ଲୋକ ଶିଶୁ କନ୍ୟାକୁ ହତ୍ୟା କରାଯାଇଥିବା ଅଭିଯୋଗ ଆଣିଛନ୍ତି ।
ଖୋର୍ଦ୍ଧାରୁ ଗୋବିନ୍ଦ ଚନ୍ଦ୍ର ପଣ୍ଡା, ଇଟିଭି ଭାରତ
