ଖୋର୍ଦ୍ଧା: ଖବରକାଗଜ ହକରଙ୍କୁ ପରିଚୟ ପତ୍ର ପ୍ରଦାନ (News Hawkers get identy in khordha) । ଖବରକାଗଜ ହକରଙ୍କୁ ଅଣସଙ୍ଗଠିତ ଶ୍ରମିକ ମାନ୍ୟତା ଦେବାକୁ ରାଜ୍ୟ ସରକାର ପ୍ରକ୍ରିୟା ଆରମ୍ଭ କରିଛନ୍ତି । ତୃଣମୂଳ ସ୍ତରରୁ ହକରଙ୍କୁ ଚିହ୍ନଟ କରାଯାଇ ପ୍ରାଥମିକ ପର୍ଯ୍ୟାୟରେ କୋରୋନା ସହାୟତା 6 ହଜାର ଟଙ୍କା ପ୍ରଦାନ କରିଛନ୍ତି ରାଜ୍ୟ ସରକାର ।
ଆଜି ଖୋର୍ଦ୍ଧା ଜିଲ୍ଲା ସଂସ୍କୃତି ଭବନଠାରେ ରାଜ୍ୟ ସରକାରଙ୍କ ଗଣମାଧ୍ୟମ ଉପଦେଷ୍ଟା ମାନସ ମଙ୍ଗରାଜ ମୁଖ୍ୟ ଅତିଥି ଭାବେ ଯୋଗଦେଇ ଖୋର୍ଦ୍ଧା ଜିଲ୍ଲାର 200ରୁ ଊର୍ଦ୍ଧ୍ଵ ହକରଙ୍କୁ ପରିଚୟ ପତ୍ର ବଣ୍ଟନ କରିଛନ୍ତି । ଏହି କାର୍ଯ୍ୟକ୍ରମ ଓଡ଼ିଶାରେ ପ୍ରଥମ କରି ଖୋର୍ଦ୍ଧା ଜିଲ୍ଲାରୁ ଆରମ୍ଭ କରାଗଲା ଏବଂ ଏହା ପର୍ଯ୍ୟାୟ କ୍ରମେ ସବୁ ଜିଲ୍ଲାରେ କରାଯିବ ବୋଲି ସେ କହିଛନ୍ତି । ଖବରକାଗଜ ହକରଙ୍କ ପାଇଁ ସରକାର ବିଭିନ୍ନ ସାମାଜିକ ସୁରକ୍ଷା ବ୍ୟବସ୍ଥା ମଧ୍ୟ କରାଯାଇଛି । କୌଣସି ଦୁର୍ଘଟଣା କିମ୍ବା ଅଘଟଣ ଘଟିଲେ ହକରଙ୍କୁ ସରକାରଙ୍କ ପକ୍ଷରୁ ସହାୟତା କରାଯିବ ବୋଲି ଗଣମାଧ୍ୟମ ଉପଦେଷ୍ଟା କହିଛନ୍ତି । ମୃତ୍ୟୁକାଳୀନ ବୀମା ରାଶି ୨ ଲକ୍ଷ ଟଙ୍କା ରହିଛି।
ବିଶେଷକରି କୋରୋନା ମହାମାରୀ ସମୟରେ ଖବରକାଗଜ ହକର ମାନେ ବେଶ ଅସୁବିଧାର ସମ୍ମୁଖୀନ ହୋଇଥିଲେ । ଆଇନ ଶୃଙ୍ଖଳା, କର୍ଫ୍ୟୁ,କଟକଣା ସମୟରେ ତାଙ୍କ ନିକଟରେ ପରିଚୟ ପତ୍ର ନଥିବାରୁ ସୁରକ୍ଷାଅଧିକାରୀଙ୍କ ରୋଷର ଶିକାର ମଧ୍ୟ ହୋଇଛନ୍ତି । ଲୋକଙ୍କ ନିକଟକୁ ସୂଚନା ପହଞ୍ଚାଇବାରେ ଏମାନେ ପ୍ରମୁଖ ଭୂମିକା ରହିଛି । ଏହାକୁ ବିଚାର କରି ମୁଖ୍ୟମନ୍ତ୍ରୀ ରାଜ୍ୟର ସମସ୍ତ ଖବରକାଗଜ ହକରଙ୍କୁ ପରିଚୟ ପତ୍ର ସୁବିଧା ଆରମ୍ଭ କରିଛନ୍ତି । ଏହି କାର୍ଯ୍ୟକ୍ରମରେ ସୂଚନା ଓ ଲୋକସମ୍ପର୍କ ବିଭାଗ ସଚିବ ବିଷ୍ଣୁପଦ ସେଠୀ, ଖୋର୍ଦ୍ଧା ବିଧାୟକ ଜିତୁ ମିତ୍ର,ଖୋର୍ଦ୍ଧା ଜିଲ୍ଲାପାଳ ସଂଗ୍ରାମ କେଶରୀ ମହାପାତ୍ର, ଅତିରିକ୍ତ ଜିଲ୍ଲାପାଳ ମନୋଜ ପାଢ଼ୀ ପ୍ରମୁଖ ଯୋଗଦେଇ ଥିଲେ ।
ଖୋର୍ଦ୍ଧାରୁ ଗୋବିନ୍ଦ ଚନ୍ଦ୍ର ପଣ୍ଡା, ଇଟିଭି ଭାରତ
