ଖୋର୍ଦ୍ଧା:ବେଗୁନିଆ ବ୍ଲକ ଅନ୍ତର୍ଗତ ଗୋବିନ୍ଦପୁର ଗାଁରେ କୁକୁଡ଼ା ମଡ଼କ । କୁକୁଡ଼ା ଫାର୍ମରେ ହଜାର ହଜାର ସଂଖ୍ୟାରେ କୁକୁଡ଼ା ମରି ପଡିଛନ୍ତି। ଗତ ୨ ରୁ ୩ ଦିନ ହେବ କୁକୁଡ଼ା ପ୍ରବଳ ମାତ୍ରାରେ କୁକୁଡା ମରୁଥିବା ବେଳେ କୁକୁଡ଼ାକୁ ପୋତି ଦିଆଯାଉଥିବା ଦେଖିବାକୁ ମିଳିଛି ।
କୁକୁଡା ମଡ଼କ ଖବର ଗଣମାଧ୍ୟମରେ ପ୍ରସାରଣ ହେବାପରେ ଘଟଣାସ୍ଥଳରେ ଖୋର୍ଦ୍ଧା ମୁଖ୍ୟ ପ୍ରାଣୀ ଚିକିତ୍ସକ ଏବଂ କଟକସ୍ଥିତ ପ୍ରାଣୀରୋଗ ବିଶେଷଜ୍ଞର ସହ ନିର୍ଦ୍ଦେଶକ ଘଟଣାସ୍ଥଳରେ ପହଞ୍ଚିଛନ୍ତି । ପରୀକ୍ଷା ପାଇଁ କୁକୁଡ଼ାଙ୍କ 10ଟି ମୃତ ପକ୍ଷୀ ଭୋପାଳ ପଠାଯାଇଥିବା ଜଣାପଡ଼ିଛି ।
ତେବେ ମୃତ କୁକୁଡ଼ା ଗୁଡିକୁ ନିୟମ ଅନୁସାରେ ଜେସିବି ମେସିନ ସାହାଯ୍ୟରେ ପୋତାଯାଇଛି । ସେହିପରି ସ୍ଥାନୀୟ ଅଞ୍ଚଳରେ ଥିବା ଅନ୍ୟ ଫାର୍ମ ଗୁଡିକରୁ କୁକୁଡାଙ୍କ ନମୁନା ସଂଗ୍ରହ କରାଯିବ ବୋଲି କହିଛନ୍ତି ଜିଲା ମୁଖ୍ୟ ପ୍ରାଣୀଧନ ଚିକିତ୍ସା ଅଧିକାରୀ । ସେପଟେ ରିପୋର୍ଟ ଆସିବା ପରେ କୁକୁଡ଼ା ମୃତ୍ୟୁର କାରଣ ସ୍ପଷ୍ଟ ହେବ । ସେପଟେ ରାଜସ୍ଥାନ ଓ ଉତ୍ତରାଖଣ୍ଡ ଆଦି ରାଜ୍ୟରେ ବାର୍ଡ ଫ୍ଲୁ ଆରମ୍ଭ ହୋଇଯାଇଥିବା ବେଳେ ଖୋର୍ଦ୍ଧାରେ ଏପରି କୁକୁଡା ମଡକକୁ ନେଇ ସ୍ଥାନୀୟ ଅଞ୍ଚଳରେ ଭୟର ବାତାବରଣ ସୃଷ୍ଟି ହୋଇଛି ।
ଖୋର୍ଦ୍ଧାରୁ ଗୋବିନ୍ଦ ଚନ୍ଦ୍ର ପଣ୍ଡା, ଇଟିଭି ଭାରତ
