ଭୁବନେଶ୍ବର: ଜମ୍ମୁ କାଶ୍ମୀରର ପୁଞ୍ଚରେ ଆତଙ୍କବାଦୀ ଆକ୍ରମଣରେ ଶହୀଦ ହୋଇଛନ୍ତି ଓଡ଼ିଆ ପୁଅ ଦେବାଶିଷ ବିଶ୍ବାଳ । ଏହି ଦୁଃଖଦ ଘଟଣାର ଦୁଇ ଦିନ ପରେ ଆଜି ଗାଁ ମାଟିରେ ପହଞ୍ଚିବ ଦେବାଶିଷଙ୍କ ପାର୍ଥିବ ଶରୀର । ଏହାପୂର୍ବରୁ ଆଜି ସକାଳୁ ଭୁବନେଶ୍ବର ବିମାନ ବନ୍ଦରରେ ଶହୀଦ ଯବାନଙ୍କ ମରଶରୀର ପହଞ୍ଚିଛି । ଦିଲ୍ଲୀରୁ ଏକ ସ୍ୱତନ୍ତ୍ର ବିମାନରେ ଆସି ବିଜୁ ପଟ୍ଟନାୟକ ବିମାନ ବନ୍ଦରରେ ପହଞ୍ଚିବା ପରେ ଶହୀଦଙ୍କୁ ଗାର୍ଡ ଅଫ୍ ଅନର ଦିଆଯାଇଛି । ଏହି ସମୟରେ ରାଜ୍ୟପାଳ ପ୍ରଫେସର ଗଣେଶୀ ଲାଲ୍ ଶହୀଦଙ୍କୁ ଶ୍ରଦ୍ଧାଞ୍ଜଳି ଅର୍ପଣ କରିଥିଲେ । ସେହିପରି ମନ୍ତ୍ରୀ ତୁଷାରକାନ୍ତି ବେହେର।, ମନ୍ତ୍ରୀ ଅଶୋକ ଚନ୍ଦ୍ର ପଣ୍ଡ , ଭୁବନେଶ୍ୱର ମେୟର ସୁଲୋଚନା ଦାସ, ବିଧାୟକ ଅନନ୍ତ ନାରାୟଣ ଜେନା ପୋଲିସ କମିଶନର ସୌମେନ୍ଦ୍ର ପ୍ରିୟଦର୍ଶୀ, ଡିସିପି ପ୍ରତୀକ ସିଂ ଙ୍କ ସହ ୧୨୦ ବାଟାଲିଅନର ବରିଷ୍ଠ ସେନା ଅଧିକାରୀ, ଅନ୍ୟ ସେନାଧିକାରୀ ଓ ବିଶିଷ୍ଟ ବ୍ୟକ୍ତି ଶ୍ରଦ୍ଧାଞ୍ଚଳି ଜଣାଇଥିଲେ। ବିଜେପି ରାଷ୍ଟ୍ରୀୟ ମୁଖପାତ୍ର ସମ୍ବିତ୍ ପାତ୍ର ଓ ରାଜ୍ୟ ବିଜେପି ସଭାପତି ମନମୋହନ ସାମଲ ମଧ୍ୟ ଉପସ୍ଥିତ ଥିଲେ। ଏହାପରେ ଜନ୍ମମାଟି ସତ୍ୟବାଦୀ ବ୍ଲକ ଅଭିମୁଖେ ବାହାରିଛି ଶହୀଦ ଦେବାଶିଷଙ୍କ ପାର୍ଥିବ ଶରୀର ।
ଏହା ମଧ୍ୟ ପଢନ୍ତୁ-Debasish Biswal Mortal Remains: କାଲି ସକାଳ 10ଟାରେ ପହଞ୍ଚିବ ଦେବାଶିଷଙ୍କ ପାର୍ଥିବ ଶରୀର
ଏପଟେ ପୁଅକୁ ହରାଇ ସ୍ତବ୍ଧ ହୋଇଯାଇଛନ୍ତି ପରିବାର ଲୋକେ । କାନ୍ଦି କାନ୍ଦି ମାଟିରେ ଲୋଟି ପଡୁଛି ମାଆ ଓ ସ୍ବାମୀଙ୍କୁ ହରାଇ କାନ୍ଦି ଗାନ୍ଦି ନୟାନ୍ତ ହେଲେଣି ପତ୍ନୀ । ଆଜି ଦିନ 10ଟା ସମୟରେ ଜନ୍ମମାଟିରେ ପହଞ୍ଚିବ ଦେବାଶିଷଙ୍କ ପାର୍ଥିବ ଶରୀର । ଶହୀଦଙ୍କ ମରଶରୀରର ଅନ୍ତିମ ସଂସ୍କାର ରାଷ୍ଟ୍ରୀୟ ମର୍ଯ୍ୟାଦାର ସହ କରାଯିବା ନେଇ ସମସ୍ତ ବ୍ୟବସ୍ଥା କରାଯାଇଛି । ଗତକାଲି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଶହୀଦ ଯବାନ ଦେବାଶିଷଙ୍କ ସ୍ମୃତି ଉଦ୍ଦେଶ୍ୟରେ ଶୋକବ୍ୟକ୍ତ କରିଥିଲେ । ଏହାସହିତ ଶହୀଦଙ୍କ ନିକଟତମ ଆତ୍ମୀୟଙ୍କ ପାଇଁ ମୁଖ୍ୟମନ୍ତ୍ରୀଙ୍କ ରିଲିଫ ପାଣ୍ଠିରୁ 25 ଲକ୍ଷ ଟଙ୍କା ଅନୁକମ୍ପାମୂଳକ ସହାୟତା ଘୋଷଣା କରିଥିଲେ ।
