ଭୁବନେଶ୍ବର: ମହାନଦୀ ସଙ୍କଟର ସମାଧାନ ଟ୍ରିବ୍ୟୁନାଲ ଦ୍ବାରା ସମ୍ଭବ ନୁହେଁ । ଦୁଇ ରାଜ୍ୟ ସରକାର ସମାଧାନର ବାଟ ବାହାର କରନ୍ତୁ । ମହାନଦୀ ଚରମ ସଙ୍କଟ ଭିତରେ ବଞ୍ଚିବାର ରାହା ଖୋଜୁଛି । ଅଣ ମୌସୁମୀ ସମୟରେ ମହାନଦୀ ଶଯ୍ୟା ଶୁଖିଲା ପଡୁଛି । ମହାନଦୀ କୂଳରେ ଥିବା ଅନେକ ଗାଁ ଓ ସହରାଞ୍ଚଳରେ ପାଣି ମିଳିବା କଷ୍ଟକର ହୋଇପଡିଛି l ଜଳ ସେଚନ ଗଭୀର ଭାବରେ ପ୍ରଭାବିତ ହୋଇଛି । ଦଳଗତ ରାଜନୀତି ପାଇଁ ଏହି ପ୍ରସଙ୍ଗକୁ କାବେରୀ ଭଳି ବିବାଦ କରିବାକୁ ଚାହୁଁଥିବା କହିଛନ୍ତି ଜଳମାନବ ରାଜେନ୍ଦ୍ର ସିଂହ । ମହାନଦୀ ବଞ୍ଚାଇ ସଂଗଠନର ଏକ ସାମ୍ବାଦିକ ସମ୍ମିଳନୀକୁ ସମ୍ଭୋଧନ କରି ଉକ୍ତ ମନ୍ତବ୍ୟ ରଖିଛନ୍ତି ରାଜେନ୍ଦ୍ର ସିଂହ ।
ରାଜେନ୍ଦ୍ର ସିଂହ ଆହୁରି କହିଛନ୍ତି, ''କେବଳ ଟ୍ରିବ୍ୟୁନାଲ ଉପରେ ନିର୍ଭର କଲେ ହେବ ନାହିଁ । ଦୁଇ ରାଜ୍ୟ ଓଡିଶା ଏବଂ ଛତିଶଗଡ ଭିତରେ ଆପୋଷ ଆଲୋଚନା ଦ୍ବାର ବନ୍ଦ ହେବା ଉଚିତ ନୁହେଁ । ଉଭୟ ରାଜ୍ୟର ମୁଖ୍ୟମନ୍ତ୍ରୀ ଏଥିପାଇଁ ଚେଷ୍ଟା କରନ୍ତୁ । ସମସ୍ୟାର ସମାଧାନ ପାଇଁ ଆବଶ୍ୟକ ପଡିଲେ ମଧ୍ୟସ୍ଥତା କରିବାକୁ ପ୍ରସ୍ତୁତ । ନଦୀର ଅଧିକାର ବିଷୟରେ ଦୁଇ ରାଜ୍ୟ ଭାବନ୍ତୁ । ମହାନଦୀ ଲଢେଇ କାବେରୀ ଲଢେଇ ପରି ନ ହେଉ । ରାଜ୍ୟ ସରକାର ଓ ରାଜନୈତିକ ଦଳ ଚୁପ ବୋଇ ବସିଲେ ଆଗକୁ ଅବସ୍ଥା ସଙ୍ଗୀନ ହେବ ।
ସାମ୍ବାଦିକ ସମ୍ମିଳନୀରେ ମହାନଦୀ ଅବବାହିକାରେ ଜଳ ସଂରକ୍ଷଣ ନେଇ ପ୍ରଶ୍ନ ଉଠାଇଛନ୍ତି ଜଳପୁରୁଷ ରାଜେନ୍ଦ୍ର ସିଂହ । ମହାନଦୀ ପ୍ରଦୂଷିତ ହୋଇଛି । ଇଟାଭାଟି, ବାଲି ଓ ମାଟି ମାଫିଆଙ୍କ କବଳରେ ମହାନଦୀ ଡହଳବିକଳ ହେଉଛି । ସରକାର କୌଣସି କାର୍ଯ୍ୟନୁଷ୍ଠାନ ଗ୍ରହଣ କରୁନାହାନ୍ତି ଏହା ଅତ୍ୟନ୍ତ ପରିତାପର ବିଷୟ । ରାଜନୀତିରୁ ଉପରକୁ ଉଠି ମହାନଦୀର ସୁରକ୍ଷା ପାଇଁ ଆଗକୁ ବଢିବା ଆହ୍ବାନ ଦେଇଛନ୍ତି ଜଳମାନବ ରାଜେନ୍ଦ୍ର ସିଂହ । ଆଜି ଏକ ଆଲୋଚନା ସଭା ଆୟୋଜନ ହେବ । ଆସନ୍ତା 8 ଓ 9 ତାରିଖରେ ପୁରୀରେ ବନ୍ୟା ଓ ମରୁଡିକୁ ନେଇ ଜାତୀୟ ଜଳ ସମ୍ମିଳନୀ ଅନୁଷ୍ଠିତ ହେବ ।
