ସମ୍ବଲପୁର: ବୁର୍ଲା ଭୀମସାର ମେଡିକାଲରୁ ୨ ଦିନର ନବଜାତକ ଶିଶୁପୁତ୍ର ଚୋରି ଘଟଣା । ଚୋରକୁ ଧରିବା ପାଇଁ ୪ଟି ଟିମ ଗଠନ କରିଛି ପୋଲିସ । କିଛି ଟିମ ତଦନ୍ତ ପାଇଁ ରାଜ୍ୟ ବାହାରକୁ ଯାଇଛି । ଅନ୍ୟପଟେ ରାଜ୍ୟର ସବୁ ଜିଲ୍ଲା ଓ ରାଜ୍ୟ ବାହାରର ଜିଲ୍ଲା ପୋଲିସକୁ ଚୋରି କରିଥିବା ମହିଳାଙ୍କ ସିସିଟିଭି ଭିଡିଓ ଓ ଫଟୋ ପଠାଯାଇଛି । ତେବେ ବର୍ତ୍ତମାନ ସୁଦ୍ଧା ପୋଲିସତୁ ଚୋରର କିଛି ବି ଖୋଜ ଖବର ମିଳିନାହିଁ ।
କ'ଣ ଥିଲା ଘଟଣା:
ସୂଚନା ଅନୁସାରେ, ଛତିଶଗଡ଼ର ମହାଶମୁନ୍ଦ ଜିଲ୍ଲାର ମୋହନ ଦାସଙ୍କ ପତ୍ନୀ ସୀତା ଦାସ ପ୍ରସବ ପାଇଁ ବରଗଡ଼ ଜିଲ୍ଲା ମୁଖ୍ୟ ଡାକ୍ତରଖାନାକୁ ଆସିଥିଲେ । ସେଠାରେ ତାଙ୍କ ଅବସ୍ଥା ଗୁରୁତର ହେବାରୁ ୨୪ ତାରିଖରେ ଡାକ୍ତର ସମ୍ବଲପୁର ବୁର୍ଲା ଭୀମସାରକୁ ସ୍ଥାନାନ୍ତର କରିଥିଲେ । ସେମାନେ ବରଗଡରୁ ଭୀମସାର ଆସିଥିଲେ । ସେଠାରେ ରାତି ୨ଟା ରାତିରେ ସୀତାଙ୍କର ଏକ ଶିଖୁପୁତ୍ର ସନ୍ତାନ ଜନ୍ମ ହୋଇଥିଲା । ତେବେ ସୀତାଙ୍କ ସେବା କରିବା ପାଇଁ ତାଙ୍କ ସହ ତାଙ୍କର ଭଉଣୀ ମଧ୍ୟ ଥିଲେ । ତେବେ ସୀତାଙ୍କ ପ୍ରସବ ପରେ ଜଣେ ଅଜଣା ମହିଳା ଆସି ସୀତାଙ୍କ ଭଉଣୀ ସହିତ ସମ୍ପର୍କ ସ୍ଥାପନ କରିଥିଲେ । ତାଙ୍କୁ ବିଭିନ୍ନ ପ୍ରକାର ଛୋଟ ବଡ଼ ସହାୟତା କରି ବଡ଼ ଚତୁରତାର ସହ ପରିବାରର ମନରେ ବିଶ୍ୱାସ ଜନ୍ମାଇଥିଲେ । ତେବେ ମହିଳା ଜଣଙ୍କର ଚାଲ ବାବଦରେ ଏହି ପରିବାର ପୁରାପୁରି ଅନଭିଜ୍ଞ ଥିଲେ । ଶିଶୁପୁତ୍ରକୁ ଖେଳାଇବାକୁ କହି ବାହାରକୁ ନେଇଥିଲେ । ଖେଳାଇବା ଓ ବୁଲାଇବା ବାହାନାରେ ସେଠାରୁ ଖସି ଚମ୍ପଟ ମାରିଥିଲେ । ତେବେ ମହିଳା ଜଣକ ଶିଶୁପୁତ୍ରକୁ କୋଳରେ ଧରି ବାହାରୁଥିବାର ଦୃଶ୍ୟ ସିସିଟିଭି ଫୁଟେଜରୁ ଦେଖିବାକୁ ମିଳିଛି । ଏନେଇ ପରିବାର ଲୋକ ଅଭିଯୋଗ କରିବା ପରେ ପରେ ପୋଲିସ ସିସିଟିଭି କ୍ୟାମେରା ଯାଞ୍ଚ କରିବା ସହ ତନାଘନା ଆରମ୍ଭ କରିଛି ।
ଏହା ମଧ୍ୟ ପଢ଼ନ୍ତୁ...ଭୀମସାରରୁ ଶିଶୁ ପୁତ୍ର ଚୋରି ଅଭିଯୋଗ, CCTVରେ ମହିଳା କଏଦ ଏହା ମଧ୍ୟ ପଢ଼ନ୍ତୁ...ଆର୍ଥିକ ଅନାଟନରୁ ନବଜାତ କନ୍ୟାକୁ ବିକ୍ରି ଅଭିଯୋଗ |
ପୋଲିସ ପକ୍ଷରୁ ୪ଟି ଟିମ୍ ଗଠନ:
ଏନେଇ ସମ୍ବଲପୁର ଅତିରିକ୍ତ ଏସପି ହରେଶ ପାଣ୍ଡେ କହିଛନ୍ତି, "ପୋଲିସ ପକ୍ଷରୁ ୪ଟି ଟିମ୍ ଗଠନ କରାଯାଇଛି । ସବୁଠି ନାକା ଲାଗିଛି । ୪ଟି ଟିମ୍ ଏବେବି ତଦନ୍ତ ଚଲାଇଛନ୍ତି । ଖୁବଶୀଘ୍ର ଚୋରି ହୋଇଥିବା ଛୁଆକୁ ଉଦ୍ଧାର କରିବୁ । ବର୍ତ୍ତମାନ କିଛି ସନ୍ଦେହଜନକ ନମ୍ବର ପାଇଛୁ । ସେହି ନମ୍ବରକୁ ଟ୍ରାକ କରୁଛୁ । ସବୁ ବୈଷୟିକ ଜ୍ଞାନର ପ୍ରୟୋଗ କରାଯାଇ ଛୁଆକୁ ଉଦ୍ଧାର କରିବା ପାଇଁ ପ୍ରୟାସ କରାଯାଉଛି । ଆଶା କରୁଛୁ ଶୀଘ୍ର ଛୁଆକୁ ଖୋଜି ପାଇବୁ ।"
ଇଟିଭି ଭାରତ, ସମ୍ବଲପୁର
