ଖୋର୍ଦ୍ଧା: ବୋଲଗଡରେ ଅଲୌକିକ ଘଟଣା ଦେଖିବାକୁୂ ମିଳିଛି । ଏଠାରେ ପଥରରୁ ବାହାରିଛି ରାଧାକୃଷ୍ଣଙ୍କ ମୂର୍ତ୍ତି । ଖୋର୍ଦ୍ଧା ଜିଲ୍ଲା ବୋଲଗଡ ବ୍ଲକ ହାଟବସ୍ତ ଗ୍ରାମରେ ଏଭଳି ଦୃଶ୍ୟ ଦେଖିବାକୁ ମିଳିଛି । ଗ୍ରାମର ଶ୍ବପ୍ନେଶ୍ୱର ଦେବଙ୍କ ମନ୍ଦିର ପରିସରରେ ଥିବା ଚଉରା ଗଛ ମୂଳରେ ଏକ ପଥରରେ ଶ୍ରଦ୍ଧାଳୁ ରାଧାକୃଷ୍ଣଙ୍କ ମୂର୍ତ୍ତି ଦେଖିବାକୁ ପାଇଥିଲେ । ଏହି ଅଲୌକିକ ଘଟଣା ଅଞ୍ଚଳରେ ଆଲୋଡନ ସୃଷ୍ଟି କରିଛି ।
ଶ୍ବପ୍ନେଶ୍ୱର ଦେବଙ୍କ ମନ୍ଦିର ପରିସରରେ ଥିବା ଚଉରା ଗଛ ମୂଳରେ ଗ୍ରାମର ହବିଷ୍ୟାଳିମାନେ ରାଧାଦାମୋଦର ପୂଜା କରୁଥିଲେ । ଏହି ସମୟରେ ସଞ୍ଜ ସଳିତା ଲଗାଇ ପଥରରେ ରଖୁଥିବାବେଳେ ରାଧାକୃଷ୍ଣ ମୂର୍ତ୍ତି ବାହାରିଥିବାର ଦେଖି ଆଶ୍ଚର୍ଯ୍ୟ ହୋଇଯାଇଥିଲେ । ରାଧାକୃଷ୍ଣଙ୍କ ମୂର୍ତ୍ତି ଦେଖିବାକୁ ମନ୍ଦିରରେ ଲୋକଙ୍କ ଭିଡ଼ ଜମିଥିଲା । ପ୍ରଥମେ ପଥର ଦେହରୁ ମୂର୍ତ୍ତିର ଉପର ଭାଗ ବାହାରିଥିବା ଦେଖିବାକୁ ମିଳିଥିଲା। ପରେ ସମ୍ପୂର୍ଣ୍ଣ ବାହାରିଥିବା କୁହାଯାଉଛି।
ଏହା ମଧ୍ୟ ପଢ଼ନ୍ତୁ: ବାଲେଶ୍ବରରେ ଅଲୌକିକ ଘଟଣା, ସ୍ବପ୍ନାଦେଶ ପରେ ମାଟିତଳୁ ବାହାରିଲେ ମହାବାହୁ
ଏନେଇ ହବିଷ୍ୟାଳିମାନେ କହିଛନ୍ତି, "କେହି ଏହାକୁ ବିଶ୍ବାସ କରୁଥିବାବେଳେ ଅନ୍ୟ କେତେକ ଏହାକୁ ଅବିଶ୍ବାସ କରୁଛନ୍ତି । ଏଠାରେ ସ୍ବୟଂ ଭଗବାନଙ୍କ ଆବିର୍ଭାବ ହୋଇଛି। ତେଣୁ ଆମେ ଏହି ମୂର୍ତ୍ତିକୁ ପୂଜା କରିବୁ ।" କାର୍ତ୍ତିକ ବ୍ରତଧାରୀମାନେ ପ୍ରତ୍ୟହ କ୍ଷୀର ତୁଳସୀ ଦେଇ ମୂର୍ତ୍ତିକୁ ପୂଜାର୍ଚ୍ଚନା କରୁଥିବାରୁ ଏହା ବଢୁଛି ବୋଲି ମହିଳାମାନେ କହିଛନ୍ତି । ଏଭଳି ଦୃଶ୍ୟ ଦେଖିବାକୁ ହାଟବସ୍ତ ଗ୍ରାମରେ ଥିବା ମନ୍ଦିରକୁ ଶ୍ରଦ୍ଧାଳୁଙ୍କ ସୁଅ ଛୁଟିବାରେ ଲାଗିଛି । କାର୍ତ୍ତିକ ମାସରେ ଭଗବାନ ଆବିର୍ଭାବ ହୋଇଛନ୍ତି କହି ଭକ୍ତ ଭାବବିହ୍ବଳ ହେଉଥିବା ଦେଖା ଦେଇଛି ।
ଇଟିଭି ଭାରତ, ଖୋର୍ଦ୍ଧା
