ଖୋର୍ଦ୍ଧା: ବାଘମାରୀରେ ଲିଫ୍ଟମାଗି ଲୁଟ ଉଦ୍ୟମ କରୁଥିବା ଜଣେ ବ୍ୟକ୍ତିକୁ ସ୍ଥାନୀୟ ଲୋକେ କାବୁ କରି ଥାନାରେ ଦେଇଛନ୍ତି । ବାଘମାରୀଠାରୁ ଫତେଗଡ ଅଞ୍ଚଳକୁ ମୋଟର ସାଇକେଲରେ ଦୁଇଜଣ ଯାଉଥିବା ବେଳେ ବାଘମାରୀ ବଜାର ଠାରେ ଜଣେ ଅପରିଚିତ ବ୍ୟକ୍ତି ଆଗ ଛକ ସିମରକୁ ଯିବାକୁ କହି ଲିଫ୍ଟ ମାଗିଥିଲେ । ମୋଟର ସାଇକେଲରେ ଯାଉଥିବା ବ୍ୟକ୍ତି ଦୁଇ ଜଣ ସଦହୃଦୟତାର ସହ ଯୁବକଙ୍କୁ ଲିଫ୍ଟ ଦେଇଥଲେ ।
ମାତ୍ର ଯୁବକ ଜଣକ ସିମର ବଜାରଠାରୁ ଆଗକୁ ଯିବାକୁ ଜିଦ୍ କରିବା ସହ ବ୍ୟକ୍ତି ଜଣକ ବାଇକ ଆରୋହୀଙ୍କ ମୁଣ୍ଡରେ ବନ୍ଧୁକ ଲଗାଇଥିଲେ । ଫଳରେ ଯୁବକ ଦ୍ୱୟ ଆଗକୁ ଟିକେ ଯାଇ ପାଟି କରିଥିଲେ । ପାଟି ଶୁଣି ସେଠାରେ ଉପସ୍ଥିତ ଲୋକେ ପହଞ୍ଚି ଯୁବକ ଦୁଇଙ୍କୁ ଉଦ୍ଧାର କରିବା ସହ ବନ୍ଧୁକ ଲଗାଇଥିବା ବ୍ୟକ୍ତିଙ୍କୁ କାବୁ କରି ବାଘମାରୀ ଥାନାକୁ ହସ୍ତାନ୍ତର କରିଥିଲେ ।
ବାଘମାରି ଥାନାର କର୍ମଚାରୀ ଅଭିଯୁକ୍ତକୁ ଥାନାକୁ ନେବା ସହିତ ବନ୍ଧୁକ ଜବତ କରିଛି । ହେଲେ ଘଟଣା ସମ୍ପର୍କରେ ଥାନାଧିକାରୀ ପ୍ରଣିତା ପଟ୍ଟନାୟକଙ୍କୁ ଯୋଗାଯୋଗ କରିବାକୁ ବାରମ୍ବାର ଚେଷ୍ଟା କରାଯାଇଥିଲେ ମଧ୍ୟ ସମ୍ଭବ ହୋଇ ନାହିଁ ।
ଖୋର୍ଦ୍ଧାରୁ ଗୋବିନ୍ଦ ଚନ୍ଦ୍ର ପଣ୍ଡା, ଈଟିଭି ଭାରତ
