ଖୋର୍ଦ୍ଧା:ମାରଣାସ୍ତ୍ର ଧରି ଉତ୍ପାତ କରୁଥିଲା ଯୁବକ । ସ୍ଥାନୀୟ ଅଞ୍ଚଳରେ ସୃଷ୍ଟି କରୁଥିଲା ଆତଙ୍କରାଜ । ତେବେ ଏକ ସପ୍ତାହିକ ହାଟରେ ଆତଙ୍କ ସୃଷ୍ଟି କରିବାକୁ ଆସି ସ୍ଥାନୀୟ ଅଞ୍ଚଳର ଯୁବକଙ୍କ ଦ୍ବାରା ଧରାପଡି ନିର୍ଧୁମ ମାଡ ଖାଇଥିବା ଖବର ସାମ୍ନାକୁ ଆସିଛି । ଏପରି କିଛି ଘଟଣା ଦେଖିବାକୁ ମିଳିଛି ଖୋର୍ଦ୍ଧା ଜିଲ୍ଲା ବେଗୁନିଆ ବ୍ଲକ ଅନ୍ତର୍ଗତ ସିକୋ ଦୋଳପଡ଼ିଆରେ ।
ମିଳିଥିବା ସୂଚନା ଅନୁସାରେ ରବିବାର ଚାଲିଥିବା ହାଟରୁ ବାରମ୍ବାର ମୋବାଇଲ, ଗାଡି ଏବଂ ସୁନାଚେନ ଆଦି ଚୋରି ଯାଉଥିବା ବେଳେ ଲୋକମାନେ ସ୍ଥାନୀୟ ସିକୋ ଫାଣ୍ଡିରେ ଅଭିଯୋଗ କରୁଥିଲେ । କିନ୍ତୁ ପୁଲିସ ଏହି ସବୁ ଘଟଣାରେ ମୁଣ୍ଡ ନପୁରାଇ ଅଭିଯୋଗ ପାଇ ନୀରବରେ ବସିଯାଉଥିଲା । ତେବେ ରବିବାର ସନ୍ଧ୍ୟା ସମୟରେ ୩ ଜଣ ଯୁବକ ବିଭିନ୍ନ ମାରଣାସ୍ତ୍ର ଧରି ହାଟ ଭିତରେ ଲୋକମାନଙ୍କୁ ଡରାଇ ଆତଙ୍କରାଜ ସୃଷ୍ଟି କରୁଥିବା ବେଳେ ସିକୋ ଗ୍ରାମର କିଛି ସାହସୀ ଯୁବକ ସେମାନଙ୍କୁ କାବୁ କରିବା ପାଇଁ ପ୍ରସ୍ତୁତ ହେଉଥିବାବେଳେ ସେମାନଙ୍କ ମଧ୍ୟରୁ ଦୁଇଜଣ ଖସି ପଳାଇବାରେ ସକ୍ଷମ ହୋଇଥିଲେ । କିନ୍ତୁ ରଣପୁର ଥାନା ମୟୁରଝାଲିଆ ଗ୍ରାମର ତପନ ପ୍ରଧାନ ନାମକ ଜଣେ ଯୁବକଏକ ବନ୍ଧୁକ ଧରିଥିବା ବେଳେ ସ୍ଥାନୀୟ ଲୋକମାନେ ତାକୁ କାବୁ କରି ନିସ୍ତୁକ ମାଡ ଦେବା ସହ ସ୍ଥାନୀୟ ଜଙ୍କିଆ ଥାନାରେ ଜିମା ଦେଇଥିବା ଜଣାପଡିଛି । ତେବେ ଯୁବକକୁ ମାଡ ମରାଯିବା ଘଟଣାର ଭିଡିଓ ଭାଇରାଲ ହେବାରେ ଲାଗିଛି ।
ଖୋର୍ଦ୍ଧାରୁ ଗୋବିନ୍ଦ ଚନ୍ଦ୍ର ପଣ୍ଡା, ଇଟିଭି ଭାରତ
