ଭୁବନେଶ୍ବର: କୋଟିଆକୁ ଆନ୍ଧ୍ର ଓ ଓଡିଶା ବାରମ୍ବାର ମୁହାଁମୁହିଁ ହେଉଛନ୍ତି । କିନ୍ତୁ ଏହାର କୌଣସି ସ୍ଥାୟୀ ସମାଧାନ ବାହାରି ପାରିନାହିଁ । ସୀମା ବିବାଦର ସମାଧାନ ପାଇଁ ଦୁଇ ରାଜ୍ୟର ଅଧିକାରୀ ବୈଠକ ହେଉଛି । ହେଲେ ଫଳ କିଛି ବାହାରି ପାରୁନାହିଁ । ଅନ୍ୟପଟେ କୋଟିଆରେ ଆନ୍ଧ୍ର ବାରମ୍ବାର ଅନୁପ୍ରବେଶ କରି ପ୍ରଭାବ ଦେଖାଇବାକୁ ପ୍ରୟାସ କରୁଛନ୍ତି । ଗତକାଲି ଲୁଚିଛପି ଅନୁପ୍ରବେଶ କରିବା ଆନ୍ଧ୍ର ଅଧିକାରୀଙ୍କୁ ମହଙ୍ଗା ପଡ଼ିଛି । ସ୍ଥାନୀୟ ଜନପ୍ରତିନିଧି ଆନ୍ଧ୍ର ଗୋ ବ୍ୟାକ୍ ନାରା ଦେବାରୁ ଆନ୍ଧ୍ର ଅଧିକାରୀ ଅପଦସ୍ତ ହୋଇ ଫେରିଛନ୍ତି । ଯାହାକୁ ନେଇ ଆରମ୍ଭ ହୋଇଯାଇଛି ରାଜନୀତି । ରାଜ୍ୟ ସରକାରଙ୍କ ଆନ୍ତରିକତା ଅଭାବରୁ ଏପରି ପରିସ୍ଥିତି ଉପୁଜିଥିବା ବିଜେପି ଅଭିଯୋଗ କରିଛି । 5T ସଚିବ ସବୁ ଆଡେ ଯାଉଛନ୍ତି କିନ୍ତୁ କୋଟିଆ କାହିଁକି ଯାଉନାହାଁନ୍ତି ବୋଲି ପ୍ରଶ୍ନ କରିଛି କଂଗ୍ରେସ । ସେପଟେ ଜବାବ ରଖି ପଟାଙ୍ଗି ବିଜେଡି ବିଧାୟକ କହିଛନ୍ତି ଅନୁପ୍ରବେଶକାରୀଙ୍କୁ ଗୋଡାଇ ଗୋଡାଇ ପିଟିବୁ ।
ଏହାବି ପଢନ୍ତୁ- କୋଟିଆରେ ଆନ୍ଧ୍ରର 'ଜଗନ ସୁରକ୍ଷା ଯୋଜନା', ରାଜ୍ୟ ସରକାର ନିଷ୍କ୍ରିୟ କହିଲା ବିଜେପି
କୋଟିଆ ପଞ୍ଚାୟତର ଫାଟୁସିନେରୀ ଗ୍ରାମରେ ଗତକାଲି ଆନ୍ଧ୍ର ସରକାରଙ୍କ ଜଗନ୍ନ ଯୋଜନା କାର୍ଯ୍ୟକାରୀ କରିବାକୁ ଆନ୍ଧ୍ର ଅଧିକାରୀ ଅନୁପ୍ରବେଶ କରିଛନ୍ତି । 233 ଜଣ ହିତାଧିକାରୀଙ୍କୁ ଜଗନ୍ନ ଯୋଜନା ସମ୍ପର୍କରେ ଅବଗତ କରାଇ ପ୍ରମାଣପତ୍ର ମଧ୍ୟ ବଣ୍ଟନ କରିଛନ୍ତି । ସେହିପରି ପଟାଙ୍ଗୀ ବ୍ଲକ ପ୍ରଶାସନ ପକ୍ଷରୁ ଫାଟୁସିନେରି ଗାଁରେ ଭ୍ରାମ୍ୟମାଣ ସାଧାରଣ ବଣ୍ଟନ ବ୍ୟବସ୍ଥା ଆରମ୍ଭ କରିଛି । ଦିବ୍ୟାଙ୍ଗଙ୍କୁ ବିଭିନ୍ନ ଉପକରଣ ସହ ବିଭିନ୍ନ ଯୋଜନାରେ ହିତାଧିକାରୀଙ୍କୁ ସାମଗ୍ରୀ ବଣ୍ଟନ କରାଯାଇଛି । ଭ୍ରାମ୍ୟମାଣ ପିଡିଏସ ଯୋଜନାରେ ପଞ୍ଚାୟତର 2426 ହିତାଧିକାରୀ ଉପକୃତ ହେବେ ବୋଲି କୁହାଯାଇଛି । ଏଣିକି ଘରେ ହିତାଧିକାରୀଙ୍କୁ ଚାଉଳ ଦିଆଯିବ । ହିତାଧିକାରୀଙ୍କୁ ଆଉ ଦୂରକୁ ଯିବାକୁ ପଡ଼ିବ ନାହିଁ । ଫାଟୁସିନେରା, ଫଗୁଣସିନେରୀ ଓ ମାଡ଼କାର ଗ୍ରାମରେ ଏହି ଯୋଜନା ଆରମ୍ଭ ହୋଇଛି । ସୀମା ବିବାଦର ସ୍ଥାୟୀ ସମାଧାନ ବଦଳରେ ଯୋଜନା ବଣ୍ଟନକୁ ନେଇ ଆରମ୍ଭ ହୋଇଛି ରାଜନୀତି ।
ବିଜେପି ରାଜ୍ୟ ସଭାପତି ମନମୋହନ ସାମଲ କହିଛନ୍ତି ଯେ, କୋଟିଆକୁ ନେଇ ବିଜେପିର ମନ ଓ ମତ ସ୍ପଷ୍ଟ । ମୁଁ ରାଜସ୍ବ ବିଭାଗର ମନ୍ତ୍ରୀ ଥିଲି । 1968 ମସିହାରେ ଯେଉଁ କେସ ହୋଇଥିଲା ତାହାର ତର୍ଜମା କରିଥିଲୁ । କେସ ଲଢୁଥିଲୁ । ସେତେବେଳେ ଠିକ ଦିଶା ଦର୍ଶନ କରିଥିଲୁ । ତାହାର ଫଲୋଅପ କରିବା ସରକାରଙ୍କ ଦାୟିତ୍ବ । କିନ୍ତୁ 14 ବର୍ଷ ହେଲା ଓଡିଶା ସରକାର ଏଥିରେ ହେଳା କରିଛନ୍ତି । ସରକାର କେବଳ ପ୍ରଚାର ଓ ଘୋଷଣା ସର୍ବସ୍ବ ହୋଇ ରହିଗଲେ । ସେଠାରେ କାର୍ଯ୍ୟକ୍ରମ ଓ ଲୋକଙ୍କ ସହିତ ଆତ୍ମୀୟତା କମିଗଲା । ସରକାରଙ୍କ ଦୃଢ଼ତା ରହିଲା ନାହିଁ । ଓଡ଼ିଶାର ବୃହତର ସ୍ବାର୍ଥ ଦୃଷ୍ଟିରୁ ଯାହା କରିବା କଥା ନକରି ନିଷ୍କ୍ରିୟ ହେବା କାରଣରୁ ଏହା ହୋଇଛି । କୋଟିଆ ପ୍ରସଙ୍ଗକୁ ଦୃଢ଼ ହସ୍ତରେ ସରକାର ଦମନ କରିବା ଉଚିତ । ସବୁ କାଗଜପତ୍ର ଆମ ପାଖରେ ଅଛି । ଆମ ପାଖରେ ବ୍ୟବସ୍ଥା ଅଛି । କେବଳ ସରକାର ସକ୍ରିୟ ହେବା ଉଚିତ । ଇଚ୍ଛା ଶକ୍ତି ଦରକାର । ଦୃଢ଼ ନିଷ୍ପତ୍ତି ନେବା ଦରକାର । ଯଦି ଏହା ନକରନ୍ତି ଭବିଷ୍ୟତରେ ଲୋକେ ସରକାରଙ୍କୁ କ୍ଷମା ଦେବେନାହିଁ । ଏଥିପାଇଁ କି ଓଡିଶା ଠିକ ଭାବେ ପଦକ୍ଷେପ ନେଉନାହିଁ ବୋଲି ଆଜି ଏ ଅବସ୍ଥା ସୃଷ୍ଟି ହୋଇଛି ।
ସେହିପରି ପିସିସି ସଭାପତି ଶରତ ପଟ୍ଟନାୟକ କହିଛନ୍ତି ଯେ, ଆମେ ପୂର୍ବରୁ ଘୋଷଣା କରିଛୁ ଓଡ଼ିଶାର ଗୋଟେ ଇଞ୍ଚ ଜମି କାହାକୁ ଦିଆଯିବନାହିଁ । କଂଗ୍ରେସ ଏହି ଶପଥ ନେଇଛି । କଂଗ୍ରେସ ଜୋରଦାର ଲଢେଇ କରିବ । ଯାହା ବଳିଦାନ ଦେବା କଥା ଦେବୁ ହେଲେ ଇଞ୍ଚେ ଜାଗା ଦେବୁନାହିଁ । ବିଜେଡି-ବିଜେପି ସରକାର ମିଳିତ ଭାବେ ଥିବା ସମୟରେ କିଛି କଲେ ନାହିଁ । ଏବେ ନବୀନ ସରକାର ଚୁପ ବସିଛନ୍ତି । ମୁଖ୍ୟମନ୍ତ୍ରୀ ନିଜେ ଯାଇକି ସ୍ଥିତି ଅନୁଧ୍ୟାନ କରନ୍ତୁ । ନହେଲେ 5 ଟି ସଚିବଙ୍କୁ ପଠାନ୍ତୁ । ରାଜ୍ୟର ବିଭିନ୍ନ ଜିଲ୍ଲା ଗସ୍ତ କରୁଛନ୍ତି ତେବେ 5ଟି ସଚିବ କୋଟିଆକୁ କାହିଁକି ଯାଉନାହାନ୍ତି ବୋଲି ସେ ପ୍ରଶ୍ନ କରିଛନ୍ତି । ଜିଲ୍ଲାପାଳ ଓ ଅନ୍ୟାନ୍ୟ ଅଧିକାରୀ ଉପସ୍ଥିତ ଅଛନ୍ତି, ସେମାନେ କଣ କରୁଛନ୍ତି କିଛି ଜଣାପଡୁନାହିଁ । ଏହି ସମସ୍ୟାର ସ୍ଥାୟୀ ସମାଧାନ ପାଇଁ ଆନ୍ଧ୍ର ଓ ଓଡ଼ିଶାର ମୁଖ୍ୟମନ୍ତ୍ରୀ ଆଲୋଚନା କରନ୍ତୁ । ବିଜେଡି କେବଳ ଭୋଟ ପାଇଁ ରାଜନୀତି କରେ ।
ଏହାବି ପଢନ୍ତୁ- ପାହାଡ କୋଳରେ ଲୁଚକାଳି ଖେଳୁଛି ବର୍ଷାରାଣୀ ! ଥରେ କୋଟିଆର ସୌନ୍ଦର୍ଯ୍ୟ ଦେଖିଲେ ଲାଖିଯିବ ଆଖି
ସେପଟେ କୋଟିଆରେ ଆନ୍ଧ୍ରର ଅନୁପ୍ରବେଶ ପ୍ରସଙ୍ଗରେ ବଡ଼ ବୟାନ ରଖିଛନ୍ତି ପଟାଙ୍ଗୀ ବିଧାୟକ ପ୍ରୀତମ ପାଢୀ । ପ୍ରୀତମ କହିଛନ୍ତି ଯେ, କୋଟିଆକୁ ଅନୁପ୍ରବେଶ କଲେ ମାଡ ଖାଇବେ । ନେତା, ଅଧିକାରୀଙ୍କୁ ଗୋଡାଇ ଗୋଡାଇ ମାଡ ହେବ । ଗତକାଲି ସେମାନଙ୍କୁ କୋଟିଆରେ ବିରୋଧ କରାଯାଇଥିଲା । ଶେଷ ରକ୍ତବିନ୍ଦୁ ଯାଏଁ କୋଟିଆ ଲଢେଇ ଜାରି ରହିବ । ବିଜେପି କଥା କାହିଁକି କହୁଛନ୍ତି । ବିଜେପି ଖାଲି କଥା କହିବା ପାଇଁ ଅଛି । ଓଡିଶା କିମ୍ବା ଓଡ଼ିଆଙ୍କ ସ୍ବାର୍ଥ ପାଇଁ ତାଙ୍କର ଅବଦାନ ନାହିଁ । ମୁଖ୍ୟମନ୍ତ୍ରୀ ଓଡ଼ିଶା ଓ ଓଡ଼ିଆଙ୍କ ପାଇଁ କାର୍ଯ୍ୟ କରି ଆସୁଛନ୍ତି । ଏଥିରେ ବିଜେପି ହତୋତ୍ସାହିତ ହୋଇ ଏପରି ପ୍ରଳାପ କରୁଛି । ଦୀର୍ଘ ବର୍ଷ ହେଲା ଓଡ଼ିଶାରେ ଅନ୍ୟ ଦଳର ସରକାର ଓଡ଼ିଶାରେ ଥିଲା । କୌଣସି ସରକାରଙ୍କ କୋଟିଆ ପ୍ରତି ଦୃଷ୍ଟି ନଥିଲା । ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଓଡ଼ିଶାର ଦାୟିତ୍ବ ନେବା ପରେ ଆଜି କୋଟିଆ ଅନ୍ୟାନ୍ୟ ଅଞ୍ଚଳଠାରୁ ଅଧିକ ବିକଶିତ ହୋଇଛି । କୋଟିଆରେ ସମସ୍ତ ସୁବିଧା ଉପଲବ୍ଧ ଅଛି । କୋଟିଆର ସାମାଜିକ ଓ ଆର୍ଥିକ ଉନ୍ନତି କେମିତି ହେବ ସେନେଇ ବ୍ୟବସ୍ଥା ହୋଇଛି । ରାସ୍ତା, ବିଜୁଳି, ସ୍ବାସ୍ଥ୍ୟ ଓ ଅନ୍ୟାନ୍ୟ ବ୍ୟବସ୍ଥା ହୋଇଛି । ଯେହେତୁ ଆଗରୁ କୋଟିଆରେ ରାସ୍ତା ଓ ଅନ୍ୟାନ୍ୟ ସୁବିଧା ନଥିବାରୁ ଆନ୍ଧ୍ରପ୍ରଦେଶ ପଶି ପାରୁନଥିଲା । ଏବେ ସବୁ ସୁବିଧା ଥିବାରୁ ଆନ୍ଧ୍ର ପଶିବାକୁ ଚେଷ୍ଟା କରୁଛି, ଡ୍ରାମା କରୁଛନ୍ତି । 1936ରୁ କୋଟିଆ ଆମର ରହିଛି । ନିର୍ବାଚନ, ଉନ୍ନୟନ କାମ ଚାଲିଛି । ସୁପ୍ରିମକୋର୍ଟଙ୍କ ନିର୍ଦ୍ଦେଶକୁ ଆନ୍ଧ୍ର ସରକାର ସମ୍ମାନ ଦେବା ଦରକାର । କିନ୍ତୁ ଆନ୍ଧ୍ର ଏହାର ଖିଲାପ କରୁଛି । ସୁପ୍ରିମକୋର୍ଟ ଆନ୍ଧ୍ର ଉପରେ କାର୍ଯ୍ୟାନୁଷ୍ଠାନ ନେବା ଦରକାର । ଗତକାଲି ମଧ୍ୟ ଆନ୍ଧ୍ରର କିଛି ଅଧିକାରୀ ଆମ ଅଞ୍ଚଳକୁ ଆସିଥିଲେ । ଆମ ସମର୍ଥକ ତାଙ୍କୁ ବିରୋଧ କରିଛନ୍ତି । ସେଠାରୁ ଘଉଡାଇ ଦେଇଛନ୍ତି । ଆନ୍ଧ୍ରକୁ କୋଟିଆରେ ପଶେଇ ଦିଆଯିବନାହିଁ ।
ଇଟିଭି ଭାରତ, ଭୁବନେଶ୍ବର
