ଭୁବନେଶ୍ବର: କପିଳେଶ୍ବର ମନ୍ଦିର ଏଏସଆଇକୁ ଦିଆଯିବା ପ୍ରସଙ୍ଗରେ ଧର୍ମେନ୍ଦ୍ରଙ୍କ ଚିଠି ପରେ ଆରମ୍ଭ ହୋଇଛି ରାଜନୀତି । ଆଜି ରାଜ୍ୟ ସରକାରଙ୍କ ମନ୍ତ୍ରୀ ତଥା ସ୍ଥାନୀୟ ବିଧାୟକ ମନ୍ତ୍ରୀ ଅଶୋକ ପଣ୍ଡା କହିଛନ୍ତି ରାଜ୍ୟ ସରକାର କପିଳେଶ୍ବର ମନ୍ଦିର ଦାୟିତ୍ବ ନିଅନ୍ତୁ ।
ରାଜଧାନୀ ସୁନ୍ଦରପଦା ସ୍ଥିତ କପିଳେଶ୍ବର ମନ୍ଦିରର ଏଏସଆଇକୁ ଦିଆଯିବାକୁ ନେଇ ଅନୁମତି ମିଳିବାକୁ ନେଇ ଏବେ ଆରମ୍ଭ ହୋଇଛି ରାଜନୀତି । ଗୋଟିଏ ପଟେ ଏଏସଆଇ ଦାୟିତ୍ବ ନେବାକୁ ସେବାୟତମାନେ ପ୍ରଶଂସା କରିଥିବା ବେଳେ ରାଜ୍ୟ ସରକାରଙ୍କ ମନ୍ତ୍ରୀ ପ୍ରଶ୍ନ ଉଠାଇଛନ୍ତି । ଏଏସଆଇ ଯେଉଁ ମନ୍ଦିରର ଦାୟିତ୍ବ ହାତକୁ ନେଇଛି ତାର କଣ ଉନ୍ନତି ହୋଇଛି ବୋଲି ସେ ପ୍ରଶ୍ନ କରିବା ସହିତ ରାଜ୍ୟ ସରକାର ଏହି ଦାୟିତ୍ବ ତୁଲାଇପାରିବେ ବୋଲି ଯୁକ୍ତି ବାଢିଛନ୍ତି ମନ୍ତ୍ରୀ ଅଶୋକ ପଣ୍ଡା ।
ପୂର୍ବରୁ ଭୁବନେଶ୍ବର ସାଂସଦ ଅପରାଜିତା ଷଡଙ୍ଗୀ 4 ଏପ୍ରିଲରେ ବିଭାଗୀୟ କେନ୍ଦ୍ର ମନ୍ତ୍ରୀ ଜି କିଶାନ ରେଡ୍ଡୀଙ୍କୁ ସାକ୍ଷାତ କରିଥିଲେ । କହିଥିଲେ ଏହି ମନ୍ଦିରର ରକ୍ଷଣାବେକ୍ଷଣ ଦାୟିତ୍ବ ଏଏସଆଇକୁ ଦିଆଯାଉ । ଛତିଶା ନିଯୋଗ ସେବାୟତମାନେ ମଧ୍ୟ ଏଏସଆଇକୁ ଦେବା ପାଇଁ ଦାବି ରଖିଥିଲେ । ଗତକାଲି କେନ୍ଦ୍ର ମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଚିଠି ଲେଖିଛନ୍ତି କେନ୍ଦ୍ରମନ୍ତ୍ରୀ ଜି କିଶାନ ରେଡ୍ଡୀଙ୍କୁ । ଏଏସଆଇ ରକ୍ଷଣାବେକ୍ଷଣ ଦାୟିତ୍ବ ନେବା ପାଇଁ କେନ୍ଦ୍ର ସରକାର ଅନୁମତି ପ୍ରଦାନ କରିବା ପରେ ଏବେ ଶ୍ରେୟ ରାଜନୀତି ଆରମ୍ଭ ହୋଇଯାଇଛି ।
ମନ୍ତ୍ରୀ ଅଶୋକ ପଣ୍ଡା କହିଛନ୍ତି ମନ୍ଦିରର ରକ୍ଷଣାବେକ୍ଷଣ ଦାୟିତ୍ବ ଏଏସଆଇକୁ ନ ଦିଆଯାଇ ରାଜ୍ୟ ସରକାରଙ୍କ ଦୃଷ୍ଟିରେ ରହୁ । ରାଜ୍ୟ ସରକାର ଏହାର ଦାୟିତ୍ବ ନେବେ । 3 ବର୍ଷରେ ଏହି ମନ୍ଦିର ପାଇଁ 85 ଲକ୍ଷ ଟଙ୍କା ଖର୍ଚ୍ଚ ହୋଇସାରିଛି । 85 ଲକ୍ଷ ଟଙ୍କା କେମିତି ଖର୍ଚ୍ଚ ହେଲା ତାର ହିସାବ ମଧ୍ୟ ଦେଇଛନ୍ତି । 2018 ମସିହାରୁ ରାଜ୍ୟ ସରକାରଙ୍କ ପ୍ରତ୍ନତତ୍ତ୍ବ ବିଭାଗ ଏହା ସଂରକ୍ଷଣ ଦାୟିତ୍ବ ନେବା ନେଇ ଗେଜେଟ ନୋଟିଫିକେସନ ହୋଇସାରିଛି । ତେଣୁ ଏଏସଆଇକୁ ଦିଆଯିବାର ଆବଶ୍ୟକତା ନାହିଁ । ଏଏସଆଇ ହାତକୁ ଯେଉଁ ମନ୍ଦିରକୁ ଦିଆଯାଉଛି ତାର କଣ ଉନ୍ନତି ହୋଇଛି ବୋଲି ସେ ପ୍ରଶ୍ନ କରିଛନ୍ତି ।
ସେପଟେ ସେବାୟତଙ୍କ ଅଭିଯୋଗ ହେଲା ମନ୍ଦିରର ରକ୍ଷଣା ବେକ୍ଷଣ ହେଉନାହିଁ । ମନ୍ଦିରରେ ଗଛ ଉଠିଲାଣି । ଚାରିଆଡେ ନେଳି ଶିଉଳି ଲାଗିଗଲାଣି । ପାର୍ଶ୍ବ ମନ୍ଦିର ଗୁଡିକ ନଷ୍ଟ ହୋଇଗଲାଣି । ରାସ୍ତା ପାଇଁ ଶିଳାନ୍ୟାସ ହୋଇଥିଲେ ରାସ୍ତା କାମ ଆରମ୍ଭ ହୋଇନାହିଁ । ସେତେବେଳେ ସଂସ୍କୃତି ମନ୍ତ୍ରୀ ଥିଲେ ଅଶୋକ ପଣ୍ଡା । ଏବେ ଏଏସଆଇ ନେବା ପରେ ମନ୍ଦିରର ଉନ୍ନତି ହେବ ବୋଲି ସେମାନେ ଆଶାବାଦୀ ଅଛନ୍ତି ।
ସୂଚନାଯୋଗ୍ୟ ଯେ ବହୁ ପୁରାତନ ମନ୍ଦିର କପିଳେଶ୍ବର ମନ୍ଦିର । ବାବା କପିଳନାଥ ପ୍ରତ୍ୟକ୍ଷ ଦେବତା । ଲୋକଙ୍କ ବହୁ ବିଶ୍ବାସ ରହିଛି ଏହି ଠାକୁରଙ୍କ ଉପରେ । ଲିଙ୍ଗରାଜ ମନ୍ଦିର ନୀତିକାନ୍ତି ସହିତ ଏହି ମନ୍ଦିରର ନୀତିକାନ୍ତିର ସମ୍ପର୍କ ରହିଛି । କିନ୍ତୁ ରକ୍ଷଣା ବେକ୍ଷଣ ଅଭାବରୁ କପିଳେଶ୍ବର ମନ୍ଦିରର ସ୍ଥିତି ବିଗିଡିବାରେ ଲାଗିଛି । ଏବେ ଏଏସଆଇକୁ ଦାୟିତ୍ବ ହସ୍ତାନ୍ତର ପରେ ସ୍ଥିତିରେ ପରିବର୍ତ୍ତନ ଆସିବ ବୋଲି ଆଶା କରାଯାଉଛି ।
ଇଟିଭି ଭାରତ, ଭୁବନେଶ୍ବର
