ଖୋର୍ଦ୍ଧା: ରାସ୍ତା ଅବ୍ୟବସ୍ଥା ନେଇ ବାରମ୍ବାର ଅଭିଯୋଗ ପରେ ବି ଶୁଣିଲାନି ପ୍ରଶାସନ । ଶେଷରେ ପଞ୍ଚାୟତକୁ ସଂଯୋଗ କରୁଥିବା ମୁଖ୍ୟ ରାସ୍ତା ଉପରେ ଧାନ ତଳି ରୋଇଁ ନିଆରା ପ୍ରତିବାଦ ଜଣାଇଲେ ଗ୍ରାମବାସୀ । ଏହି ଘଟଣା କେଉଁ ଉପାନ୍ତ କି ଅପହଞ୍ଚ ଇଲାକାର ନୁହେଁ, ବରଂ ଖୋର୍ଦ୍ଧା ଠାରୁ ମାତ୍ର 20 କିଲୋମିଟର ଦୂରରେ ଥିବା ଗାଁର ସ୍ଥିତି । ଖରାଦିନ ହେଉ ଅବା ବର୍ଷାଦିନ ବେଗୁନିଆ ବ୍ଲକ କଣ୍ଟାବାଡ ପଞ୍ଚାୟତକୁ ସଂଯୋଗ କରୁଥିବା ମୁଖ୍ୟରାସ୍ତାରେ ବର୍ଷ ତମାମ କୃତ୍ରିମ ପୋଖରୀ ସୃଷ୍ଟି ହୋଇଥାଏ । ଆଉ ଏହି ରାସ୍ତା ଦେଇ ପ୍ରତିଦିନ ହଜାର ହଜାର ଲୋକ ସ୍ୱାସ୍ଥ୍ୟସେବା, ହାଟ ଓ ବ୍ୟାଙ୍କ ସେବା ଉପରେ ନିର୍ଭର କରିଥାନ୍ତି ।
ବହୁ ଦିନରୁ ଗ୍ରାମ୍ୟ ଉନ୍ନୟନ ବିଭାଗର ଯନ୍ତ୍ରୀ ଓ ଠିକାଦାର ଏହି ରାସ୍ତାର ମରାମତି ନାମରେ ଲକ୍ଷ ଲକ୍ଷ ଟଙ୍କା ସରକାରୀ ତହବିଲରୁ ଲୁଟୁଥିବା ଅଭିଯୋଗ କରିଛନ୍ତି ସ୍ଥାନୀୟ ବାସିନ୍ଦା । ସ୍ଥାନୀୟ ଜନସାଧାରଣ ବାରମ୍ବାର ଏହାର ମରାମତି ପାଇଁ ଜିଲ୍ଲାପାଳଙ୍କ ଠାରୁ ଆରମ୍ଭ କରି ବିଭାଗୀୟ ଯନ୍ତ୍ରୀଙ୍କୁ ଅବଗତ କରି ନିରାଶ ହେବାପରେ ଆଜି ଉକ୍ତ ରାସ୍ତାରେ ତଳି ରୋଇଁ ପ୍ରତିବାଦ କରିଛନ୍ତି । ସେହିପରି ତୁରନ୍ତ ଏହି ରାସ୍ତାର ମରାମତି 15ଦିନ ମଧ୍ୟରେ କରା ନଗଲେ ରାଜରାସ୍ତାକୁ ଓହ୍ଲାଇବା ପାଇଁ ଚେତାବନୀ ଦେଇଛନ୍ତି । ସେପଟେ ବିଭାଗୀୟ ଯନ୍ତ୍ରୀ ଘଟଣା ସମ୍ପର୍କରେ କ୍ୟାମେରା ସାମ୍ନାରେ ପ୍ରତିକ୍ରିୟା ଦେବାକୁ ମନା କରିଥିବାବେଳେ ତୁରନ୍ତ ରାସ୍ତା କାମ କରାଯିବ ବୋଲି କହିଛନ୍ତି ।
ତେବେ କେବେ ଏହି ରାସ୍ତାର ମରାମତି କରୁଛି ଗ୍ରାମ୍ୟ ଉନ୍ନୟନ ବିଭାଗ ତାହାକୁ ଅପେକ୍ଷା ।
ଖୋର୍ଦ୍ଧାରୁ ଗୋବିନ୍ଦ ଚନ୍ଦ୍ର ପଣ୍ଡା, ଇଟିଭି ଭାରତ
