ଭୁବନେଶ୍ବର: ଜୟଦେବ ଭବନରେ ପାଳିତ ହୋଇଯାଇଛି ଗୀତ ଗୋବିନ୍ଦର ରଚୟିତା ଜୟଦେବଙ୍କ ଜୟନ୍ତୀ । ଏହି ଅବସରରେ କଳ୍ପତରୁ ପ୍ରତିଭା ସମ୍ମାନ ଓ ଶିଳ୍ପୀ ସମ୍ବର୍ଦ୍ଧନା କାର୍ଯ୍ୟକ୍ରମ ମଧ୍ୟ ଅନୁଷ୍ଠିତ ହୋଇଯାଇଥିଲା । ଜୟଦେବ ଫାଉଣ୍ଡେସନ୍ ଟ୍ରଷ୍ଟ ଓ କଳ୍ପତରୁ ଆର୍ଟ ଆଣ୍ଡ୍ କ୍ରାଫ୍ଟ ଆସୋସିଏସନର ମିଳିତ ଆନୁକୂଲ୍ୟରେ ଏହି କାର୍ଯ୍ୟକ୍ରମ ଆରମ୍ଭ ହୋଇଥିଲା । ଐତିହାସିକ ପ୍ରଫୁଲ୍ଲ ଚନ୍ଦ୍ର ତ୍ରିପାଠୀ ସଭାପତିତ୍ବରେ ଆରମ୍ଭ ହୋଇଥିବା କାର୍ଯ୍ୟକ୍ରମରେ ମୁଖ୍ୟ ଅତିଥି ଭାବେ ବରିଷ୍ଠ ସାମ୍ବାଦିକ ତଥା ସୁବାର୍ତ୍ତାର ସମ୍ପାଦକ ପ୍ରଦ୍ୟୁମ୍ନ ଶତପଥୀ ସାମିଲ ହୋଇଥିଲେ ।
ଏନେଇ ପ୍ରଦ୍ୟୁମ୍ନ ଶତପଥୀ କହିଥିଲେ ଯେ, ''ଜୟଦେବକଙ୍କୁ ପୃଥିବୀର ଶ୍ରେଷ୍ଠ କବି । ଏଥିପାଇଁ ତାଙ୍କୁ ତାଙ୍କୁ ବିଶ୍ବ ମାନବ ସଭ୍ୟତାର ପ୍ରତିଭା କହିଲେ ଅତ୍ୟୁକ୍ତି ହେବନାହିଁ । ଜୟଦେବ ହେଉଛନ୍ତି ରାଜ୍ୟର ଅଦ୍ବିତୀୟ ତଥା ଶ୍ରେଷ୍ଠ କବି । ସବୁଠୁ ବଡ଼ ଓ ବଳିଷ୍ଠ କାବ୍ୟ ଗୀତଗୋବିନ୍ଦ ଲେଖି ଓଡ଼ିଶାକୁ ସାରା ବିଶ୍ବରେ ଗୌରବମଣ୍ଡିତ କରିଛନ୍ତି । ଓଡିଆ ଜାତିର ପ୍ରାଣ ପରିଚୟ ବିଶ୍ବନିୟନ୍ତା ଜଗନ୍ନାଥଙ୍କ ପ୍ରିୟ ହେଉଛି ଗୀତଗୋବିନ୍ଦ । ଓଡିଶାର ଅନେକ ମନ୍ଦିରରେ ଗୀତଗୋବିନ୍ଦ ବୋଲାଯିବାର ପରମ୍ପରା ଏବେ ମଧ୍ୟ ପ୍ରଚଳିତ ରହିଛି । ଜୟଦେବଙ୍କ ରଚିତ ଗୀତଗୋବିନ୍ଦ ସଂପର୍କରେ ବହୁକଥା ବିଭିନ୍ନ ରାଜ୍ୟରେ ପ୍ରଚଳିତ ରହିଛି ଏବଂ ଏସବୁର ଅଲୌକିକତା ଆଜି ମଧ୍ୟ ଲିଭିନାହିଁ । ବିଭିନ୍ନ ଶୁଭ କାର୍ଯ୍ୟରେ ଗୀତଗୋବିନ୍ଦର ବିଭିନ୍ନ ପରମ୍ପରା ଏବେ ମଧ୍ୟ ରହିଛି । ତାଙ୍କ ରଚିତ ଗୀତଗୋବିନ୍ଦ 72ଟି ଭାଷାରେ ଅନୁବାଦ ହୋଇସାରିଲାଣି ।''
ଚିତ୍ରଶିଳ୍ପୀ ଜନାର୍ଦ୍ଦନ ପରମଗୁରୁ, ଶ୍ବେତପଦ୍ମା ମିଶ୍ର, କଣ୍ଠଶିଳ୍ପୀ ବିଦ୍ୟାଧର ଶତପଥୀ, ଫଟୋ ସମ୍ବାଦିକ ଗଣେଶ ସାହୁ, ମୋହନ ସାହୁ, ରଞ୍ଜନ କୁମାର ମହାନ୍ତି, ସସ୍ମିତା କାମ୍ଲେଙ୍କୁ ଚଳିତବର୍ଷର କଳ୍ପତରୁ ପ୍ରତିଭା ସମ୍ମାନ ପ୍ରଦାନ କରାଯାଇଥିଲା । ସେହିପରି ନୃତ୍ୟଶିଳ୍ପୀ ଟ୍ବିଙ୍କିଲ୍ ମିଶ୍ରଙ୍କୁ କଳ୍ପତରୁ ଶିଶୁ ପ୍ରତିଭା ସମ୍ମାନ ପ୍ରଦାନ କରାଯାଇଥିଲା । ପରେ ଓଡ଼ିଶାର ବିଭିନ୍ନ ପ୍ରାନ୍ତରୁ ଅନେକ ଚିତ୍ରଶିଳ୍ପୀଙ୍କୁ ସମ୍ବର୍ଦ୍ଧିତ କରାଯାଇଥିଲା । ଏହି ଅବସରରେ ସ୍କୁଲ ପିଲାମାନଙ୍କୁ ନେଇ ଚିତ୍ରାଙ୍କନ ପ୍ରତିଯୋଗିତା କରାଯାଇ ଶ୍ରେଷ୍ଠ ପ୍ରତିଯୋଗୀମାନଙ୍କୁ ପୁରସ୍କୃତ କରାଯିବା ସହ କୁନି କୁନି କଳାକାରଙ୍କ ଦ୍ବାରା ସାଂସ୍କୃତିକ କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା ।
ଇଟିଭି ଭାରତ, ଭୁବନେଶ୍ବର
