ଖୋର୍ଦ୍ଧା: ସପ୍ତାହେ ଧରି ପୂଜାର୍ଚ୍ଚନା ପରେ ଧରାପୃଷ୍ଠରୁ ବିଦାୟ ନେଉଛନ୍ତି ଧନଦାତ୍ରୀ ମା’ ଲକ୍ଷ୍ମୀ । ଖୋର୍ଦ୍ଧାର ଗଜଲକ୍ଷ୍ମୀ ପୂଜାକୁ ଢେଙ୍କାନାଳର ଗଜଲକ୍ଷ୍ମୀ ପୂଜା ସହ ତୁଳନା କରି ଜାକଜମକରେ ସାମୂହିକ ଭସାଣି ଉତ୍ସବ ପାଳନ କରିବାକୁ ପୂଜା କମିଟି ଓ ଜିଲା ପ୍ରଶାସନ ପକ୍ଷରୁ ଯୋଜନା କରାଯାଇଥିଲା । ଏନେଇ ଜିଲ୍ଲାପାଳ, ଅତିରିକ୍ତ ଜିଲ୍ଲାପାଳଙ୍କ ଅଧ୍ୟକ୍ଷତାରେ ଜିଲ୍ଲାର ବରିଷ୍ଠ ପୋଲିସ ଅଧିକାରୀଙ୍କ ଠାରୁ ଆରମ୍ଭ କରି ପୂଜା କମିଟି କର୍ମକର୍ତ୍ତା, ସମାଜସେବୀ, ସାମ୍ବାଦିକମାନଙ୍କୁ ନେଇ ଏକାଧିକ ବୈଠକ ହୋଇଥିଲା । କିନ୍ତୁ ଶେଷରେ ଆଜି ଏହି ସାମୂହିକ ଭସାଣି ଉତ୍ସବ ଫସର ଫାଟିଯାଇଛି । ପ୍ରାୟ ୪୦ ଭାଗ ମଣ୍ଡପ ଭସାଣିରେ ଭାଗ ନେଇ ନାହାନ୍ତି ।
ତେବେ ସେପ୍ଟେମ୍ବର ୧୭ ତାରିଖରେ ଜିଲ୍ଲାପାଳଙ୍କ ଅଧ୍ୟକ୍ଷତାରେ ବସିଥିବା ପ୍ରସ୍ତୁତି ବୈଠକରେ ନିଷ୍ପତ୍ତି ନିଆଯାଇଥିଲା ଯେ ସହରର ସମସ୍ତ ୩୧ଟି କମିଟିର ପୂଜା ମେଢ଼ ବିଜେବି ପଡିଆ ନିକଟରେ ଏକତ୍ରିତ ହୋଇ ଗୋଟିଏ ରାସ୍ତାରେ ଏକସଙ୍ଗରେ ବିସର୍ଜନ କରିବେ । କିନ୍ତୁ ପରବର୍ତ୍ତୀ ବୈଠକରେ କେବଳ ନିର୍ଦ୍ଦିଷ୍ଟ କେତେକ ପୂଜା କମିଟିକୁ ଡକାଯାଇଥିଲା । ଏହାର ବିରୋଧ କରି କିଛି ପୂଜା ମଣ୍ଡପ ସେମାନଙ୍କ ମେଢ଼କୁ ମିଳିତ ଭସାଣିରେ ସାମିଲ କରି ନଥିଲେ । ତେବେ ଭସାଣିରେ ସାମିଲ ହୋଇଥିବା ସମସ୍ତ ମେଢ଼ ପାରମ୍ପରିକ ବାଜା ବାଣରେ ସହର ପରିକ୍ରମା କରିଥିବା ଦେଖିବାକୁ ମିଳିଛି । ଏଥିସହ ବିଳମ୍ବିତ ରାତି ପର୍ଯ୍ୟନ୍ତ ଏହି ଭସାଣି ଉତ୍ସବ ଚାଲିଥିବା ଦେଖିବାକୁ ମିଳିଥିଲା ।
ଇଟିଭି ଭାରତ, ଖୋର୍ଦ୍ଧା
