ଖୋର୍ଦ୍ଧା: ଜିଲ୍ଲାରେ ଅନିୟମିତ ବର୍ଷା ଯୋଗୁ ଚଳିତ ବର୍ଷ ଚାଷ କାର୍ଯ୍ୟରେ ବ୍ୟାହତ ହେବା ସହ ବଢିଛି ଚାଷୀଙ୍କ ଚିନ୍ତା । ବର୍ଷା ଅଭାବରୁ ଚାଷ କାର୍ଯ୍ୟ ପ୍ରଭାବିତ ହୋଇଛି । ଏଭଳି ପରିସ୍ଥିତିରେ ବିଭିନ୍ନ ନଦୀ ଓ ନାଳରେ ନିର୍ମାଣ କରାଯାଇଥିବା ଜଳସେଚନ ପ୍ରକଳ୍ପ ନିମ୍ନମାନର କାର୍ଯ୍ୟ ଯୋଗୁଁ ନିର୍ମାଣ ହୋଇଥିବା ବନ୍ଧ ଭାଙ୍ଗି ଯିବାରୁ ଜଳସେଚନ ପ୍ରଭାବିତ ହୋଇଛି । ବାରମ୍ବାର ପ୍ରଶାସନ ଅଧିକାରୀମାନଙ୍କୁ ବନ୍ଧ ଭାଙ୍ଗିବା ସମ୍ପର୍କରେ ଗୁହାରି କରିବା ପରେ ବି କିଛି ସୁଫଳ ନମିଳିବାରୁ ବାଧ୍ୟ ହୋଇ ଚାଷୀମାନେ ସୋମବାର ବନ୍ଧରେ ବାଲି ବସ୍ତା ପକାଇ ଚାଷ ଜମିକୁ ପାଣି ମଡାଇବା ଦୃଶ୍ୟ ଦେଖିବାକୁ ମିଳିଛି ।
ଏ ହେଉଛି ସ୍ଥାନୀୟ ବୋଲଗଡ ବ୍ଳକ ଅସରଳା ପଞ୍ଚାୟତର । ଚାଷ ଜମି ପାଇଁ ଜଳସେଚନ ବ୍ୟବସ୍ଥା କରିବା ପାଇଁ 2 ବର୍ଷ ତଳେ 3 ଲକ୍ଷ ଟଙ୍କା ବ୍ୟୟ ଅଟକଳରେ ବୋଲଗଡ ବ୍ଳକ ଅସରଳା ପଞ୍ଚାୟତ ମାଳିବନ୍ଧଠାରେ ଏକ ଚେକ୍ ଡ୍ୟାମ ନିର୍ମାଣ କରାଯାଇଥିଲା । ଲକ୍ଷ୍ୟ ଥିଲା ଅସରଳା ମାଗୁରା ଓ ପୁଆଣିଆ ଗ୍ରାମର ଶତାଧିକ ଏକର ଚାଷ ଜମିକୁ ଜଳସେଚନ ବ୍ୟବସ୍ଥା କରିବା । କିନ୍ତୁ ଦୁଭାର୍ଗ୍ୟର ବିଷୟ କି ନିମ୍ନମାନ କାମ ଯୋଗୁଁ ବନ୍ଧ ଭାଙ୍ଗି ଯିବା ଫଳରେ ନଦୀରେ ପାଣି ଥାଇ ମଧ୍ୟ ଚାଷ ଜମିକୁ ପାଣି ଯାଇପାରୁନି । ଫଳରେ ଚାଷ କରି ଗୁଜୁରାଣ ମେଣ୍ଟାଉଥିବା ଚାଷୀମାନେ ଏକତ୍ରିତ ହୋଇ ନଦୀରେ ଏକ ବାଲି ବନ୍ଧ ପକାଇ ଚାଷଜମିକୁ ପାଣି ମଡାଉଥିବା ଦେଖାଯାଇଛି । ଯାହାକି ସରକାରଙ୍କ ଚାଷୀମାନଙ୍କ ପ୍ରତି କେତେ ଆନ୍ତରିକତା ଅଛି ଏଥିରୁ ସ୍ପଷ୍ଟ ପ୍ରତୀୟମାନ ହେଉଛି।
ଖୋର୍ଦ୍ଧାରୁ ଗୋବିନ୍ଦ ଚନ୍ଦ୍ର ପଣ୍ଡା, ଇଟିଭି ଭାରତ
