ଭୁବନେଶ୍ବର: ଓଡିଶାର ଆର୍ଥିକ ପରିଚାଳନା ଗତ କିଛି ବର୍ଷ ହେବ ଶୃଙ୍ଖଳିତ ହେବାରେ ଲାଗିଛି । ଫଳରେ ରାଜ୍ୟର ଆର୍ଥିକ ସ୍ଥିତି ଏବଂ ଋଣ ପରିଚାଳନା ଅନ୍ୟ ରାଜ୍ୟମାନଙ୍କ ତୁଳନାରେ ଭଲ ସ୍ଥିତିରେ ରହିଛି । କହିବାକୁ ଗଲେ ରାଜ୍ୟର ଅର୍ଥ ବ୍ୟବସ୍ଥା ସୁଧୁରୁଛି । ଗତ ଜୁଲାଇ ମାସ ଶେଷ ସୁଦ୍ଧା ରାଜ୍ୟରେ ରାଜ୍ୟର ଋଣ ପରିମାଣ ୮୮୪୮୭ କୋଟି ଟଙ୍କା ରହିଛି । ସେହିପରି ମୁଣ୍ଡପିଛା ଋଣଭାର ୧୯୧୭୧ ଟଙ୍କାକୁ ହ୍ରାସ ପାଇଛି । ଓଡିଶା ରାଜ୍ୟ ମହାଲେଖାଗାରଙ୍କ ସୂଚନା ଅନୁଯାୟୀ ଏହି ତଥ୍ୟ ଦେଇଛନ୍ତି ରାଜ୍ୟ ସରକାର ।
ରାଜ୍ୟ ସରକାରଙ୍କ ସୂଚନା ଅନୁଯାୟୀ ରାଜ୍ୟରେ ରାଜସ୍ବ ଆଦାୟ ପୂର୍ବବର୍ଷ ତୁଳନାରେ ୧୯ ପ୍ରତିଶତ ଅଧିକ ଅଭିବୃଦ୍ଧି ହୋଇଛି । ୨୦୨୩-୨୪ ଆର୍ଥିକ ବର୍ଷର ଅଗଷ୍ଟ ସୁଦ୍ଧା ରାଜ୍ୟରେ ନିଜସ୍ବ ରାଜସ୍ବ ସଂଗ୍ରହ ପରିମାଣ ୪୧୨୩୧ କୋଟି ଟଙ୍କା ହୋଇଥିଲା । ପୂର୍ବ ଆର୍ଥିକ ବର୍ଷର ଅଗଷ୍ଟ ମାସ ତୁଳନାରେ ଏହା ୧୨.୯ ପ୍ରତିଶତ । ସେହିପରି ଗତ ଅଗଷ୍ଟ ସୁଦ୍ଧା ରାଜ୍ୟରେ ନିଜସ୍ବ ଟିକସ ରାଜସ୍ବ ସଂଗ୍ରହ ପରିମାଣ ୨୦୧୩୧ କୋଟି ଟଙ୍କା ହୋଇଥିବା ବେଳେ ଏହା ଗତବର୍ଷ ତୁଳନାରେ ୧୪.୫ ପ୍ରତିଶତ ଅଧିକ ରହିଛି । ସେହିପରି ଗତ ଅଗଷ୍ଟ ସୁଦ୍ଧା ନିଜସ୍ବ ଅଣଟିକସ ରାଜସ୍ବ ସଂଗ୍ରହ ପରିମାଣ ୨୧୧୦୦ କୋଟିରେ ପହଞ୍ଚିଛି । ପୂର୍ବବର୍ଷ ଅଗଷ୍ଟ ତୁଳନାରେ ଏହା ୧୧.୫ ପ୍ରତିଶତ ଅଧିକ ବୋଲି ଆକଳନ କରାଯାଇଛି ।
ଏହା ବି ପଢନ୍ତୁ- Supplementary Budget: 28200 କୋଟିର ଅତିରିକ୍ତ ବଜେଟ, ଆମ ଓଡିଶା ନବୀନ ଓଡିଶାକୁ 1302 କୋଟି
୨୦୨୩-୨୪ ଆର୍ଥିକ ବର୍ଷର ଅତିରିକ୍ତ ବଜେଟ ଏଫଆରବିଏମ ଅଧିନିୟମକୁ ଅନୁପାଳନ କରୁଛି । କାରଣ ଏହି ବଜେଟ ଅତିରିକ୍ତ ରାଜସ୍ବ କିମ୍ବା ସଞ୍ଚିତ ସମ୍ବଳର ଉପଲବ୍ଧତା ମଧ୍ୟରେ ପ୍ରସ୍ତୁତ କରାଯାଇଛି । ଏହି ଅତିରିକ୍ତ ବଜେଟ ସହ ରାଜସ୍ୱ ବଳକା ସ୍ଥିତି ବଜାୟ ରହିବ । ବିତ୍ତୀୟ ନିଅଣ୍ଟ ସାମଗ୍ରିକ ରାଜ୍ୟ ଘରୋଇ ଉତ୍ପାଦ ବା ଜିଏସଡିପିର ୩ ପ୍ରତିଶତ ମଧ୍ୟରେ ସୀମିତ ରହିବ । ଏଫଆରବିଏମ ଅଧିନିୟମ ଅନୁଯାୟୀ ରାଜ୍ୟର ଋଣଭାର ଜିଏସଡିପିର ୨୫ ପ୍ରତିଶତ ଏବଂ ସୁଧ ଦେୟ ଏବଂ ରାଜସ୍ବ ଆୟର ଅନୁପାତ ୧୫ ପ୍ରତିଶତ ମଧ୍ୟରେ ରହିବା ଆବଶ୍ୟକ ।
ମହାଲେଖାକାରଙ୍କ ତଥ୍ୟ ଅନୁଯାୟୀ ଗତ ଜୁଲାଇ ଶେଷ ସୁଦ୍ଧା ରାଜ୍ୟର ଋଣ ଭାର ରାଜ୍ୟ ଜିଏସଡିପିର ୧୦.୨୭ ପ୍ରତିଶତ ରହିଛି । ସୁଧ ଦେୟ ଓ ରାଜସ୍ବ ଆୟର ଅନୁପାତ ୧.୯ ପ୍ରତିଶତରେ ସୀମିତ ରହିଛି । ଯାହାକି ବେଶ ପୋଷଣୀୟ ଅଟେ । ରାଜ୍ୟରେ ବିତ୍ତୀୟ ପରିଚାଳନା ବେଶ ଶୃଙ୍ଖଳିତ । ଆର୍ଥିକ ସ୍ଥିତି ଏବଂ ଋଣ ପରିଚାଳନା ଅନ୍ୟ ରାଜ୍ୟଙ୍କ ତୁଳନାରେ ଉତ୍ତମ ସ୍ଥିତିରେ ରହିଛି । ଗତ ଜୁଲାଇ ମାସ ଶେଷ ସୁଦ୍ଧା ରାଜ୍ୟରେ ରାଜ୍ୟର ଋଣ ପରିମାଣ ୮୮୪୮୭ କୋଟି ଟଙ୍କା ରହିଛି ।
ସେହିପରି ମୁଣ୍ଡପିଛା ଋଣଭାର ୧୯୧୭୧ ଟଙ୍କାକୁ ହ୍ରାସ ପାଇଛି । ଯାହା ଅନ୍ୟ ରାଜ୍ୟ ତୁଳନାରେ ବହୁ କମ ରହିଛି । ଏ ଯାଏ ରାଜ୍ୟ ସରକାର ଖୋଲା ବଜାରରୁ ଋଣ କରି ନାହାନ୍ତି । ସେହିପରି ଚଳିତ ଆର୍ଥିକ ବର୍ଷର ପ୍ରଥମ ପାଞ୍ଚ ମାସ ମଧ୍ୟରେ ଅର୍ଥାତ ଗତ ଅଗଷ୍ଟ ସୁଦ୍ଧା ରାଜ୍ୟରେ ସାମଗ୍ରିକ ବ୍ୟୟ ପୂର୍ବ ବର୍ଷ ତୁଳନାରେ ୩୯ ପ୍ରତିଶତ ଅଧିକ । ଗତ ଅଗଷ୍ଟ ଶେଷ ସୁଦ୍ଧା ରାଜ୍ୟର ମୋଟ ବଜେଟ ଅର୍ଥର ମାତ୍ର ୨୯ ପ୍ରତିଶତ ଅର୍ଥ ଖର୍ଚ୍ଚ ହୋଇଛି । ଯାହା ନୈରାଶ୍ୟ ଜନକ ।
ଇଟିଭି ଭାରତ, ଭୁବନେଶ୍ବର
