ଖୋର୍ଦ୍ଧା: ବୋଲଗଡ ବ୍ଳକ କାର୍ଯ୍ୟାଳୟର ସମ୍ମିଳନୀ କକ୍ଷରେ ଶୁକ୍ରବାର କୋରୋନା ସଂପର୍କିତ ଏକ ସମୀକ୍ଷା ବୈଠକ ଅନୁଷ୍ଠିତ ହୋଇଯାଇଛି । ଏହି ବୈଠକ ଖୋର୍ଦ୍ଧା ଏଡିଏମଙ୍କ ଅଧ୍ୟକ୍ଷତାରେ ଅନୁଷ୍ଠିତ ହୋଇଥିବା ବେଳେ ଏଥିରେ ଖୋର୍ଦ୍ଧା ଉପଜିଲ୍ଲାପାଳ ଉପସ୍ଥିତ ରହି ବୋଲଗଡ ବ୍ଳକ ଅଞ୍ଚଳରେ ମହାମାରୀ କୋରୋନା ସଂକ୍ରମଣକୁ ରୋକିବା ପାଇଁ ଆବଶ୍ୟକ ଜରୁରୀ ପଦକ୍ଷେପ ବିଷୟରେ ଆଲୋଚନା କରିଥିଲେ ।
ଉକ୍ତ ବୈଠକରେ ବୋଲଗଡ଼ ବିଡ଼ିଓଙ୍କ ସମେତ ବ୍ଳକର ୧୯ ଗୋଟି ପଞ୍ଚାୟତର କୋଭିଡ ୧୯ ପାଇଁ ଦାୟିତ୍ବରେ ଥିବା ସମସ୍ତ ଗ୍ରାମପଞ୍ଚାୟତ ନୋଡାଲ ଅଫିସରମାନେ ଉପସ୍ଥିତ ଥିଲେ । ଅନ୍ୟ ପକ୍ଷରେ ବ୍ଳକ ଅଞ୍ଚଳର କେତେକ ବଜାରର ବଣିକ ସଂଘର କର୍ମକର୍ତ୍ତା ଓ ମହିଳାସଂଘର ମହିଳା ନେତ୍ରୀମାନେ ଯୋଗଦେଇଥିଲେ । ଏହି ବୈଠକରେ ବ୍ଳକ ଅଞ୍ଚଳରେ କୋରୋନା ସଂକ୍ରମଣକୁ ରୋକିବା ପାଇଁ ସମୀକ୍ଷା ଓ ଆଲୋଚନା କରାଯାଇ କେତେକ ଜରୁରୀ ପଦକ୍ଷେପ ଉପରେ ଅଧିକ ଗୁରୁତ୍ବ ଦେବା ପାଇଁ ଏଡିଏମ ଏବଂ ଉପଜିଲ୍ଲାପାଳ ପରାମର୍ଶ ଦେଇଥିଲେ ।
ବିଶେଷ ଭାବେ ଦୋକାନ ବଜାର ଅଞ୍ଚଳରେ ସାମାଜିକ ଦୂରତ୍ୱ ରକ୍ଷା କରାଯିବା ସହିତ ମାକ୍ସ ପରିଧାନ ଉପରେ ଗୁରୁତ୍ବ ଏବଂ ପ୍ରତ୍ୟେକ ଦୋକାନୀ ମାନଙ୍କୁ କୋଭିଡ ଟେଷ୍ଟ କରାଇବା ପାଇଁ ପରାମର୍ଶ ଦେଇଥିଲେ । ଏଥିପ୍ରତି ପ୍ରତ୍ୟେକ ପଞ୍ଚାୟତରେ ପଞ୍ଚାୟତସ୍ତରୀୟ କମିଟି ଏହି ପଦକ୍ଷେପ ଉପରେ ଗୁରୁତ୍ବ ଦେଇ କାର୍ଯ୍ୟକାରୀ କରାଇବାକୁ କୁହାଯାଇଥିବା ବେଳେ ପ୍ଳାଜମା ଡୋନେସନ ପାଇଁ ଲୋକମାନଙ୍କୁ ବୁଝାଇବାକୁ ଗ୍ରାମପଞ୍ଚାୟତ ନୋଡାଲ ଅଫିସ ମାନଙ୍କୁ ନିର୍ଦ୍ଦେଶ ଦେଇଥିବାର ବ୍ଳକ କାର୍ଯ୍ୟାଳୟ ପକ୍ଷରୁ ସୂଚନା ଦେଇଛନ୍ତି ।
ଖୋର୍ଦ୍ଧାରୁ ଗୋବିନ୍ଦ ଚନ୍ଦ୍ର ପଣ୍ଡା, ଇଟିଭି ଭାରତ
