ଭୁବନେଶ୍ବର: ପଦ୍ମପୁର ଉପନିର୍ବାଚନ ପାଖେଇ ଆସୁଥିବାବେଳେ ସରଗରମ ହେଉଛି ରାଜ୍ୟ ରାଜନୀତି । ସେପଟେ ଫସଲ ବୀମା ରାଶିରୁ ବଞ୍ଚିତ ହୋଇ ଆନ୍ଦଳନରେ ଚାଷୀ । ଫସଲ ବୀମା ଚାଷୀଙ୍କ ପାଖରେ ପହଞ୍ଚି ପାରୁନଥିବାବେଳେ ବିଜେଡି ଓ ବିଜେପି ପରସ୍ପରକୁ ଦୋଷ ଦେବାରେ ବ୍ୟସ୍ତ । ସେପଟେ ରାଜ୍ୟ ସରକାର ଓ କେନ୍ଦ୍ର ସରକାରଙ୍କ ଝଗଡ଼ା ମଧ୍ୟରେ କଂଗ୍ରେସ ଫାଇଦା ନେବାକୁ ପ୍ରସ୍ତୁତ ହେଲାଣି ।
କେନ୍ଦ୍ରକୁ ଦୋଷ ଦେଲେ ରାଜ୍ୟ କୃଷିମନ୍ତ୍ରୀ
ପ୍ରଧାନ ମନ୍ତ୍ରୀ ଫସଲ ବୀମା ଯୋଜନାରେ ଚାଷୀ ମାନଙ୍କୁ ସେମାନଙ୍କର ପ୍ରାପ୍ୟ ମିଳୁ ନଥିବାବେଳେ ବିଜେଡି ସରକାରର କୃଷିମନ୍ତ୍ରୀ ରଣେନ୍ଦ୍ର ପ୍ରତାପ ସ୍ବାଇଁ କେନ୍ଦ୍ର ସରକାରଙ୍କୁ ଟାର୍ଗେଟ କରିଛନ୍ତି । କେନ୍ଦ୍ର ସରକାରଙ୍କ ଅବହେଳା କାରଣରୁ ଫସଲ ବୀମା ଅର୍ଥ ଚାଷୀଙ୍କ ପାଖରେ ପହଞ୍ଚିପାରୁନାହିଁ ବୋଲି ଅଭିଯୋଗ କରିଛନ୍ତି ରାଜ୍ୟ କୃଷିମନ୍ତ୍ରୀ । ସେ କହିଛନ୍ତି, "ରାଜ୍ୟରେ କୃଷିମାନଙ୍କ ପାଇଁ ସରକାର ବିଭିନ୍ନ ଯୋଜନା କରୁଛନ୍ତି । ବିଭିନ୍ନ କୃଷି ଭିତ୍ତିକ କାର୍ଯ୍ୟ ରାଜ୍ୟ ସରକାରଙ୍କ ତରଫରୁ ତ୍ବରିତ ହେଉଛି । ତେବେ କେନ୍ଦ୍ର ସରକାରଙ୍କୁ ଅନୁରୋଧ କରୁଛି, ଆମ ରାଜ୍ୟର ଚାଷୀମାନଙ୍କୁ ବାକିଥିବା ବୀମା ଟଙ୍କା ତୁରନ୍ତ ପ୍ରଦାନ କରନ୍ତୁ ।"
'ଫସଲ ବୀମାକୁ ନେଇ ରାଜ୍ୟ ସରକାର ଡ୍ରାମା କରୁଛନ୍ତି'
ବୀମା ରାଜନୀତିକୁ ନେଇ ଜବାବ ରଖିଛି ବିଜେପି । ରାଜ୍ୟ ବିଜେପି ସାଧାରଣ ସମ୍ପାଦକ ପୃଥ୍ବୀରାଜ ହରିଚନ୍ଦନ କହିଛନ୍ତି, "ରାଜ୍ୟ ସରକାର ଫସଲ ବୀମାକୁ ନେଇ ଡ୍ରାମା କରୁଛନ୍ତି । ଚାଷୀଙ୍କୁ ଯଦି କେହି ଅବହେଳା କରିଥାଏ ସିଏ ହେଉଛି ରାଜ୍ୟ ସରକାର । ସମଗ୍ର ରାଜ୍ୟରେ ଏବେ ଚାଷୀ ମାରଣ ବ୍ୟବସ୍ଥା ଚାଲିଛି । ସରକାରଙ୍କ ଅବହେଳା କାରଣରୁ ଚାଷୀ ହନ୍ତସନ୍ତ ହେଉଛନ୍ତି ।" ତେବେ ଆଉ ଏଭଳି ମିଛ ରାଜନୀତି କରି ପଦ୍ମପୁରବାସୀଙ୍କୁ ବିଜେଡି ଭୁଆଁ ନବୁଲାଉ ବୋଲି କହିଛନ୍ତି ବିଜେପି ସାଧାରଣ ସମ୍ପାଦକ ।
ଫାଇଦା ନେବ କଂଗ୍ରେସ !
ପଦ୍ମପୁର ରାଜନୀତିର ଗଣିତ ଜଟିଳ ହେଉଥିବାବେଳେ ଉଭୟ ବିଜେଡି ଓ ବିଜେପି ଝଗଡ଼ାର ଫାଇଦା କଂଗ୍ରେସକୁ ଯିବ ବୋଲି ଆଲୋଚନା ହେଉଛି । ରାଜନୀତି ସମୀକ୍ଷକ ରବିଦାସ କହିଛନ୍ତି, "ପଦ୍ମପୁର ଉପନିର୍ବାଚନ ବିଜେଡି ପାଇଁ ଏକ ବଡ ଚ୍ୟାଲେଞ୍ଜ ହେବ । ଧାମନଗର ହାରିବା ପରେ ଚାପରେ ଅଛି ଶାସକ ଦଳ । କାରଣ ଏଠି ଜିତିନପାରିଲେ 2024 ସାଧାରଣ ନିର୍ବାଚନରେ ଏହାର ପ୍ରଭାବ ପଡିବ । ବିଜେଡି ପାଇଁ ଅନୁକମ୍ପା ଭୋଟ ମଧ୍ୟ ଫ୍ୟାକ୍ଟର ରହିବ ।" ଅନଭିଜ୍ଞ ହେଲେ ମଧ୍ୟ ଶିକ୍ଷାଗତ ଯୋଗ୍ୟତାକୁ ଦେଖି ବର୍ଷାଙ୍କୁ ଟିକେଟ ଦେଇଛି ବିଜେଡି । ଗୋଟିଏ ପଟେ ବିଜେପି କୃଷକଙ୍କ ସହିତ ରହିଥିବା କଥା ନାମାଙ୍କନ ଦାଖଲ ନକରି ପ୍ରମାଣ କରୁଥିବାବେଳେ କଂଗ୍ରେସ ପ୍ରାର୍ଥୀ ପୁରୁଖା ନେତା ହୋଇଥିବାରୁ ପୂର୍ବ ଭୋଟ ରକ୍ଷା କରିବାରେ ସହାୟକ ହୋଇପାରେ । ତେଣୁ ଫାଇଦା କଂଗ୍ରେସକୁ ମଧ୍ୟ ମିଳିପାରେ ।
ବିଜେଡି ଓ ବିଜେପି ମଧ୍ୟରେ ପଦ୍ମପୁରକୁ ନେଇ ଟଣାଓଟରା ରାଜନୀତି ଭିତରେ ଉଭୟଙ୍କ ଭିତରେ ସମ୍ପର୍କ ରହିଛି, ତେଣୁ କଂଗ୍ରେସକୁ ଜନସାଧାରଣ ଭରସା କରିବେ ବୋଲି କହିଛନ୍ତି କଂଗ୍ରେସ ବିଧାୟକ ସୁର ରାଉତରାୟ । ସେପଟେ ଚାଷୀଙ୍କ ଆନ୍ଦୋଳନ ମଧ୍ୟ ଜାରି ରହିଛି । ଫସଲ ବୀମା ଯୋଜନାରେ ନ୍ୟାୟ ମିଳିବାକୁ ଦାବି ରଖିବା ସହିତ ପଦ୍ମପୁରକୁ ସ୍ବତନ୍ତ୍ର ଜିଲ୍ଲା ମାନ୍ୟତା ଦାବି ମଧ୍ୟ ଏବେ ରାଜନୀତି ମାହୋଲକୁ ଅଧିକ ଗରମ କରିଛି । ଚାଷୀ ଓ ଚାଷକୁ ଉଭୟ ଶାସକ ଓ ବିରୋଧି ନିର୍ବାଚନୀ ପ୍ରସଙ୍ଗ କରିଥିବାବେଳେ ନିର୍ଣ୍ଣାୟକ ହୋଇପଡିଥିବା ଚାଷୀଙ୍କ ଭୋଟ କୁଆଡେ ଯାଉଛି ତାହା ଉପରେ ରାଜ୍ୟବାସୀଙ୍କ ନଜର ।
ଇଟିଭି ଭାରତ, ଭୁବନେଶ୍ବର
