ଭୁବନେଶ୍ବର: ରାଜଧାନୀର ୱାର୍ଡ ନମ୍ବର ୫୨ ଦେଇ ଯାଇଥିବା ଡ୍ରେନ୍ ନମ୍ବର ୭ର ହେବ ବିକାଶ । ଏନେଇ ଯୋଜନା କରିଛି ଭୁବନେଶ୍ବର ମହାନଗର ନିଗମ । ୭ ନମ୍ବର ମୁଖ୍ୟ ନାଳର ପୁନରୁଦ୍ଧାର ପାଇଁ ୧୯ ଏସଏଚଜି ମହିଳାଙ୍କୁ ୭ ଏକର ସ୍ଥାନର ଦାୟିତ୍ବ ଦିଆଯାଇଛି । ବିଏମସି କମିଶନର ଶନିବାର ଏହି ଅଞ୍ଚଳ ଗସ୍ତ କରି ନାଳ ସଫେଇ ଓ ବିକାଶ କାର୍ଯ୍ୟର ସମୀକ୍ଷା କରିଥିଲେ । ପରେ କାର୍ଯ୍ୟରେ ନିୟୋଜିତ ଥିବା ଏସଏଚଜି ମହିଳାଙ୍କ ସହ ଆଲୋଚନା କରିଥିଲେ । ବାକି ଥିବା କାର୍ଯ୍ୟକୁ ଯୁଦ୍ଧକାଳୀନ ଭିତ୍ତିରେ ଶେଷ କରି ମୌସୁମୀ ପୂର୍ବରୁ ମୁଖ୍ୟ ନାଳ ଓ ପାରିପାର୍ଶ୍ବିକ ବିକାଶ କାର୍ଯ୍ୟ ଶେଷ କରିବାକୁ କୁହାଯାଇଛି ।
ସୂଚନା ଅନୁସାରେ, ଗତ ଏପ୍ରିଲ୍ ମାସ ୨୨ ତାରିଖଠାରୁ ୭ ନମ୍ବର ମୁଖ୍ୟ ନାଳର ବିକାଶ ଆରମ୍ଭ ହୋଇଛି । ଏହି ମଧ୍ୟରେ ବିଏମ୍ସି କମିଶନର ଓ ମେୟର ସୁଲୋଚନା ଦାସ ଉଭୟ ଉକ୍ତ ଅଞ୍ଚଳ ଗସ୍ତ କରି ନିର୍ମାଣାଧୀନ କାମର ଯାଞ୍ଚ କରିବା ସହ ଏସଏଚଜିଙ୍କୁ ନିର୍ଦ୍ଧାରିତ ସମୟ ମଧ୍ୟରେ କାମ ସାରିବାକୁ କହିଛନ୍ତି । ହେଲେ ନାଳ ବିକାଶରେ ମୁଖ୍ୟ ବାଧକ ସାଜିଛି ଜବରଦଖଲ । ନାଳ ଉପରେ ଓ କଡ଼ରେ ଥିବା ଜନସ୍ବାସ୍ଥ୍ୟ ଓ ବିଏମସିର ଜମି ଉପରେ କିଛି ଲୋକ ବେଆଇନ ଭାବେ ଘର ନିର୍ମାଣ କରିଛନ୍ତି । ସେମାନଙ୍କ ମଧ୍ୟରୁ କିଛି ଜନସ୍ବାସ୍ଥ୍ୟ ବିଭାଗର ଅବସରପ୍ରାପ୍ତ କର୍ମଚାରୀ ହୋଇଥିବାବେଳେ ବାକି ଲୋକ ସରକାରୀ କର୍ମଚାରୀ ହୋଇଥିବା ସୂଚନା ରହିଛି । ତେବେ ଏମାନଙ୍କ ଘର ଉଚ୍ଛେଦ ନହେବାରୁ ନାଳ ବିକାଶ ପଛାଉଛି ।
ମୁଖ୍ୟ ନାଳ ଉପରେ ଏହି ଜବରଦଖଲ ରହିଛି । ପ୍ରାୟ ୭ ପରିବାର ଏଠାରେ ବସବାସ କରୁଛନ୍ତି । ସେମାନଙ୍କୁ ସେଠାରୁ ହଟାଇବା ଲାଗି ବିଏମସି ଡ୍ରେନଜ୍ ବିଭାଗ ନିକଟରେ ଚିଠି ଲେଖିଥିବା ବେଳେ ଆସନ୍ତା ସପ୍ତାହରେ ସେମାନଙ୍କୁ ସେଠାରୁ ଉଚ୍ଛେଦ କରାଯିବ ବୋଲି ବିଏମସି ସୂଚନା ଦେଇଛି । ଉଭୟ ଜନସ୍ବାସ୍ଥ୍ୟ ଓ ବିଏମସି ଜମିରେ ଜବରଦଖଲ ରହିଥିବା ବିଏମସି କହିଛି । ନା ସେ ଲୋକଙ୍କର ରାଜୀବ ଆବାସ ଯୋଜନାରେ ଘର ମିଳିବାର ଅଛି, ନା ଜାଗା ମିଶନରେ ପଟ୍ଟା । ତେଣୁ ବିନା କୌଣସି ସମସ୍ୟାରେ ସେମାନଙ୍କୁ ଉଚ୍ଛେଦ କରାଯାଇ ବିକାଶକୁ ଆଗକୁ ବଢ଼ାଯିବ ବୋଲି ବିଏମସି ବରିଷ୍ଠ ଅଧିକାରୀ କହିଛନ୍ତି ।
ଉଲ୍ଲେଖଯୋଗ୍ୟ, ରାଜଧାନୀ ଭୁବନେଶ୍ବରର ମୁଖ୍ୟ ନାଳଗୁଡ଼ିର ଉନ୍ନତି ଜାରି ରହିଛି । ବିଏମସି ପକ୍ଷରୁ ମୁକ୍ତା ଯୋଜନା ଅଧୀନରେ ଏହି ବିକାଶ କରାଯାଇଥିବା ବେଳେ ପ୍ରମୁଖ ମୁଖ୍ୟ ନାଳରେ ଲୋକ୍ ଜୋନ୍ ପ୍ରୋଜେକ୍ଟ ନାମରେ କିଛି ଅଂଶ ବିକାଶ କରାଯାଉଛି । ଯେଉଁଠି କି ପ୍ରାକୃତିକ ଉପାୟରେ କିପରି ଜଳ ବିଶୋଧନ କରାଯାଇ ନାଳର ଉନ୍ନତିକରଣ କରାଯିବ ସେନେଇ ଯୋଜନା ପ୍ରସ୍ତୁତ ହୋଇଛି । ନାଳର ଉଭୟ ପାର୍ଶ୍ବରେ ପାଦ ଚଲା ରାସ୍ତା ସହ ମୁଖ୍ୟ ନାଳ ପାର୍ଶ୍ବରେ ଫୁଲ ଗଛ ଲଗାଇବା ସହ ଆବଶ୍ୟକ ସ୍ଥଳେ ଗଛ କାଟି ସୌନ୍ଦର୍ଯ୍ୟକରଣ କାମ କରାଯିବାକୁ ଯୋଜନା ପ୍ରସ୍ତୁତ ହୋଇଛି । ପୂର୍ବରୁ ମୁଖ୍ୟ ନାଳ ନମ୍ବର ୧୦ର ନିକୋ ପାର୍କ ଅଞ୍ଚଳରେ ଲେକ୍ ଜୋନ୍ ପ୍ରକଳ୍ପ ଜାରି ରହିଛି ।
ଅନ୍ୟପଟେ ମୌସୁମୀ ପୂର୍ବରୁ ଡ୍ରେନ୍ ସଫେଇ ହେବା ନେଇ ବିଏମସି କମିଶନରଙ୍କ ସମୀକ୍ଷା ବୈଠକରେ ନିଷ୍ପତି ନିଆଯାଇଛି । ତେବେ ବର୍ଷା ହେଲେ ଭୁବନେଶ୍ବରବାସୀଙ୍କୁ ଜଳଯନ୍ତ୍ରଣା ଭୋଗିବାକୁ ପଡ଼ୁଛି । ଚଳିତବର୍ଷ ମଧ୍ୟ ଭୁବନେଶ୍ବରବାସୀ ଜଳଯନ୍ତ୍ରଣା ଭୋଗିବେ । କାରଣ ସବୁ ୱାର୍ଡରେ ଏବେ ଡ୍ରେନ୍ ପୁନରୁଦ୍ଧାର ଓ ନୂଆ ଡ୍ରେନ୍ ନିର୍ମାଣ ଚାଲିଥିବା ବେଳେ ମୁଖ୍ୟ ନାଳଗୁଡ଼ିକର ସମ୍ପ୍ରସାରଣ କରାଯାଉଛି ।ଏବେ ମଧ୍ୟ ୭ ମୁଖ୍ୟ ଡ୍ରେନ ସମ୍ପସାରଣ ଅଟକି ରହିଥିବା ବେଳେ ଜମି ଅଧିଗ୍ରହଣ ହୋଇପାରୁନଥିବାରୁ ଏଥର ମଧ୍ୟ ବର୍ଷା ଜଳ ନିଷ୍କାସନରେ ଅଡ଼ୁଆ ହେବ ବୋଲି ଆଶଙ୍କା ପ୍ରକାଶ ପାଇଛି । ହେଲେ ଚଳିତବର୍ଷ ଭୁବନେଶ୍ବର ମହାନଗର ନିଗମ ଅଞ୍ଚଳରେ ଜଳବନ୍ଦୀ ଯନ୍ତ୍ରଣାକୁ କମାଇବା ଲାଗି ବିଏମସି ଗୁରୁତ୍ବ ଦେଇଥିଲା । ଚଳିତ ମୌସୁମୀକୁ ଦୃଷ୍ଟିରେ ରଖି ନିୟମିତ ଡ୍ରେନ୍ ଏବଂ ସଫେଇ କାମର ସମୀକ୍ଷା କରାଯାଉଛି ।
ଏହି ପରିପ୍ରେକ୍ଷୀରେ ଶନିବାର ବିଏମ୍ସି କମିଶନର ବିଜୟ ଅମୃତା କୁଲାଙ୍ଗେଙ୍କ ଅଧ୍ୟକ୍ଷତାରେ ଏକ ସ୍ବତନ୍ତ୍ର ସମୀକ୍ଷା ବୈଠକ ଅନୁଷ୍ଠିତ ହୋଇଯାଇଥିଲା । ଓ୍ବାର୍ଡରେ ଚାଲୁ ରହିଥିବା କାର୍ଯ୍ୟକୁ ତ୍ୱରାନ୍ବିତ କରି ଏହା କିପରି ନିର୍ଦ୍ଧାରିତ ସମୟ ସୀମା ମଧ୍ୟରେ ଶେଷ ହେବ ଏବଂ ଏହାର କ୍ଷେତ୍ର ସମୀକ୍ଷା ରିପୋର୍ଟ ନିୟମିତ ପ୍ରଦାନ କରିବାକୁ ସଂପୃକ୍ତ ଅଧିକାରୀଙ୍କୁ କମିଶନର କୁଲାଙ୍ଗେ ନିର୍ଦ୍ଦେଶ ଦେଇଛନ୍ତି । ବୈଠକରେ ୨୦୨୩-୨୪ରେ ଡ୍ରେନର ପଙ୍କୋଦ୍ଧାର ଏବଂ ଆନୁସଙ୍ଗିକ କାର୍ଯ୍ୟର ସମୀକ୍ଷା କରାଯାଇ ବିଏମସି ଦ୍ବାରା ଦିଆଯାଇଥିବା ସମୟ ମଧ୍ୟରେ ନିର୍ଦ୍ଧାରିତ ସଫେଇ ଓ ପଙ୍କ ଉଦ୍ଧାର କାମ ସାରିବାକୁ କମିଶନର ଘରୋଇ ସଫେଇ ସଂସ୍ଥାଙ୍କୁ ନିର୍ଦ୍ଦେଶ ଦେଇଛନ୍ତି । ୨୦୨୩-୨୪ ପାଇଁ ଡ୍ରେନ୍ ସଫେଇ, ପଙ୍କ ଉଦ୍ଧାର, କଲଭର୍ଟ ଜାଲି ଏବଂ ଡ୍ରେନ୍ ଉଭୟ କାନ୍ଥର ସଫେଇ କାମ ଦାୟିତ୍ୱ ନେଇଥିବା ସଂସ୍ଥାକୁ ସ୍ବଚ୍ଛତାର ସହ କାମ କରିବାକୁ ତାଗିଦ କରାଯାଇଛି ।
ସେହିପରି ଡ୍ରେନ୍ ସଫେଇ ହେବା ମାତ୍ରେ ଟ୍ରାକ୍ଟର ଯୋଗେ ବର୍ଜ୍ୟ ଏବଂ ପଙ୍କକୁ ଉଠାଇ ନେବାକୁ କୁହାଯାଇଛି । ଆବଶ୍ୟକସ୍ଥଳେ ସମସ୍ତ ମୁଖ୍ୟ ଡ୍ରେନ୍ ସଫେଇରେ ଡ୍ରୋନ୍ କ୍ୟାମେରା ଉପଯୋଗ କରାଯାଇ ଏହାର ସମୀକ୍ଷା କରାଯିବ । ଡ୍ରେନ୍ ସଫେଇ ପାଇଁ ଠିକା ନେଇଥିବା ସଂସ୍ଥା ବର୍ଷାଦିନ ପାଇଁ ଆସନ୍ତା ୭ ଦିନ ମଧ୍ୟରେ କାମ ସାରିବ । ଏହାପରେ ଅକ୍ଟୋବର ମାସ ପର୍ଯ୍ୟନ୍ତ ନିୟମିତ ଡ୍ରେନ୍ ସଫେଇ, ଜାଲିରୁ ଅଳିଆ କାଢ଼ିବା, ଡ୍ରେନ୍ର ଉଭୟ ପାର୍ଶ୍ୱ ସଫା ରଖିବା କାର୍ଯ୍ୟ କରିବ ।
ନଭେମ୍ବର ୨୦୨୩ରୁ ଏପ୍ରିଲ ୨୦୨୪ ପର୍ଯ୍ୟନ୍ତ ଏହି ସଂସ୍ଥାଗୁଡିକ ୪୦ଟି ସ୍ଥାନରେ ଲାଗିଥିବା ଜାଲି ବା ଟ୍ରାସ୍ ରାକ୍ରୁ ଅଳିଆ ବାହାର କରିବେ । ଡ୍ରେନ୍ ସଫେଇ ସମୟରେ ସଂପୃକ୍ତ ଶ୍ରମିକ ପିପିଇ କିଟ୍ର ଉପଯୋଗ ନିଶ୍ଚିତ ଭାବେ କରିବାକୁ ନିର୍ଦ୍ଦେଶ ଦିଆଯାଇଛି । ଏହାସହିତ ମୁଖ୍ୟ ଡ୍ରେନ୍ରେ କାର୍ଯ୍ୟ କରିବା ପାଇଁ ଯେତେ ସମ୍ଭବ ଯାନ୍ତ୍ରିକ ଉପାୟ ଅବଲମ୍ବନ କରି ସଫେଇ କରିବାକୁ କୁହାଯାଇଛି । ସଫେଇର ପୂର୍ବାବସ୍ଥା ଓ ସଫେଇ ପରବର୍ତ୍ତୀ ଅବସ୍ଥାର ଫଟୋ ଚିତ୍ର ଉତ୍ତୋଳନ କରିବା, ବିପଦ ସଂକୁଳ ସ୍ଥାନରେ ବ୍ୟାରିକେଡ୍ ବ୍ୟବସ୍ଥା କରିବା ଆଦି ନିର୍ଦ୍ଦେଶ ଦିଆଯାଇଛି । ୧୦ଟି ମୁଖ୍ୟ ଡ୍ରେନ୍ର ସଫେଇ ସାଙ୍ଗକୁ ବିଏମ୍ସିର ସିଧାସଳଖ ତଦାରଖରେ ଥିବା ୱାର୍ଡ ନଂ-୪, ୫ ଏବଂ ୫୦ର ଡ୍ରେନ୍ କାର୍ଯ୍ୟକୁ ମିଶାଇ ସମୁଦାୟ ୨୨ଟି ପ୍ରକଳ୍ପ ପାଇଁ ୪ କୋଟି ୨୬ ଲକ୍ଷ ଟଙ୍କା ବ୍ୟୟବରାଦ ହୋଇଥିବା ବିଏମ୍ସି କହିଛି । ସଫେଇ ପରେ ଯଦି କୌଣସି ସ୍ଥାନରେ ବର୍ଜ୍ୟବସ୍ତୁ ପଡିଥିବା ରାସ୍ତରେ ଦିଶିଲା ତେବେ କାର୍ଯ୍ୟଭାର ନେଇଥିବା ଏଜେନ୍ସି ତଣ୍ଡ ଗଣିବେ ବୋଲି କହିଛନ୍ତି ବିଏମସି କମିଶନର । ଏହି ବୈଠକରେ ବିଏମସି ବରିଷ୍ଠ ଅଧିକାରୀ ଓ ଘରୋଇ ସଫେଇ ସଂସ୍ଥା କର୍ତ୍ତୃପକ୍ଷ ଉପସ୍ଥିତ ଥିଲେ ।
ଇଟିିଭି ଭାରତ, ଭୁବନେଶ୍ବର
